ابايدىڭ «سەن مەنى نە ەتەسىڭ؟» دەپ باستالاتىن ولەڭى بار. بۇل تۋرالى نەبىر سىنشى, اقىن-جازۋشىلار قالام تەربەدى. سولاردىڭ اراسىنان بىزگە ۇنايتىنى – تالاسبەك اسەمقۇلوۆتىڭ «ابايدىڭ ۇلى جۇمباعى» ماقالاسى. وندا حاكىمنىڭ ولەڭىن «تاپسىرلەگەن» اۆتور سۇيە الماعان جۇرەكتىڭ جان ازابىن ايتادى.
ياعني ماحابباتقا جەتپەگەن, قۇمارلىق دەڭگەيىندە قالعان مەنمەن جاننىڭ ەگوسى. ال سۇيگەن جۇرەك ەكىنشى جارتىسى قايىرىلماسا دا, ەشقاشان قۇن سۇرامايدى, العىس پەن رازىلىقتان باسقا. ءتىپتى ماڭگىلىككە كوز جازسا دا. ماحابباتقا جەتكەن شىن جۇرەكتىڭ ازابىنىڭ ءوزى عاجاپقا اينالارىن ايگىلەيدى. ءيا, سۇيگەن جۇرەكتىڭ ازابىنىڭ ءوزى عاجاپ. مۇنى ءبىز ماحاببات جىرشىسى ءازىلحان نۇرشايىقوۆتىڭ شىعارمالارىنان عانا ەمەس, ونەگەلى ومىرىنەن دە كورەمىز. ونىڭ جارى حاليمامەن وتكەرگەن سۇيىسپەنشىلىككە تولى, ەكى جارتىدان ءبىر بۇتىنگە اينالعان تۇتاس عۇمىرى – ماحابباتتىڭ ماۋەسى.
قولىمىزعا جازۋشى قايسار ءالىمنىڭ الماتىداعى «مەرەكە» باسپاسىنان 2022 جىلى شىققان «ماحاببات جىرشىسى» اتتى كەزەكتى كىتابى ءتۇستى. بۇل اۆتوردىڭ ءازىلحان نۇرشايىقوۆقا ارناعان ەكىنشى كىتابى ەكەن. جازۋشى مەن جازۋشىنىڭ جازىسقان حاتتارى, ادەبيەت, ءومىر, زامان تۋرالى ويلار مەن پايىمدار لەگى ءبىر ءبولىم. وندا نۇرشايىقوۆتىڭ وقىرماندارى تۋرالى جازعاندارى دا بەيجاي قالدىرمايدى. ءاز-اعاڭدى تانۋدا, ول كىسىنىڭ ومىرىنە ۇڭىلەم دەۋشىلەرگە تاپتىرماس مۇرالار بىرنەشە بولىمگە جۇيەلەنىپ, جەكە تاقىرىپتارعا بولىنگەن. اسىرەسە ءبىز باستان-اياق كوز قىدىرتىپ, وي جۇگىرتىپ پاراقتاعانىمىز ء«ازىلحان حاليمادان سوڭ» حيكاياتى جوعارىداعىداي سويلەۋىمىزگە تۇرتكى بولدى.
«ولمەي قالدىم مەن ارەڭ,
بولعاننان سوڭ جان بولەك.
كۇندە ەڭىرەپ جىلايمىن,
كوزدىڭ جاسىن سەبەلەپ.
قارالى وي دارياسىنا ەندى باتقالى تۇرعاندا حاليماسىنىڭ «تۇرساڭشى, تىكتەل» دەگەن قاتقىل ءۇنى ەستىلىپ...», دەپ تارقاتىپ اكەتەدى اۆتور شىعارماسىن. ەلۋ ءتورت جىل وتاسقان حاليماسىنان ايىرىلعان جازۋشىنىڭ جاي-كۇيى, جۇرەك تەبىرەنىسى, كوزى كەتسە دە ەندىگى عۇمىرىندا كوڭىلىنە مەدەت بولعان ماحاببات ساۋلەسى قامىرىقتى جانعا قانشاما قۋات بەرىپ, شۋاعىنا بولەگەن. بىرەۋلەر ويلاۋى دا مۇمكىن, قايتكەن كۇندە جارتى عاسىردان استام ۋاقىت بىرگە وتاسىپ, ساۋلەلى عۇمىر سۇرگەن جۇرەككە ەگىزىنەن كوز جازعاننان اۋىر قاسىرەت جوق, كوپكە بارمايدى دەپ. ارينە, ونداي جاعدايلاردا ورىن الىپ جاتادى. الايدا شىن سۇيگەن, ماحاببات اتتى باقىتقا بولەنگەن جاننىڭ ازابىنىڭ ءوزى عاجاپ ەكەنىن جوعارىدا تەككە ايتپادىق. حاليمادان سوڭ ءازىلحاننىڭ كۇيى اڭساۋلى جۇرەكتىڭ العىستى سۇيىسپەنشىلىگىن ايگىلەيدى قايسار ءالىمنىڭ جازۋىندا. قۇسادان گورى ارىلۋعا كەلەدى. ەكەۋارا كەشىرگەن ماحابباتتى ءومىردىڭ شۋاعىنا شومىلىپ, ساۋلەسىنە جىلىنۋ كورىنىس بەرەدى. بارلىق بەل-بەلەستەرىن اداقتاپ شىعادى. ادام ولسە دە, شىن جۇرەكتىڭ سۇيىسپەنشىلىككە تولى سەرتى جىلدار بويى ءومىر سۇرە بەرەتىنىن بايقايمىز.
«سوعىس بىتكەن سوڭ ءوزىڭ بىلەسىڭ, مەن ەلگە قايتا الماي ءبىر جارىم جىل زارىعىپ, ماسكەۋدەگى ينستيتۋت اۋرۋحاناسىندا جاتتىم عوي. جاستايعى سول اۋرۋ قايتا اسقىنعان. ويلايتىنىم, سەنى قالاي جەتىمسىرەتپەۋدىڭ قامى. اۋرۋدان قۇلان-تازا جازىلىپ, ساعان قوسىلسام دەپ تىلەدىم. تىلەگىم قابىل بولدى. ماسكەۋ دارىگەرلەرى مەنى ءبىرجولا جازىپ, ساۋىقتىرىپ شىعاردى. ەگەر جازىلماسام, مەن ساعان تۇرمىسقا شىقپايتىن ەدىم, جانداي سۇيگەن سۇيىكتىمە اۋرۋىمدى قالاي جۇقتىرامىن؟ تۋبەركۋلەز – جۇقپالى اۋرۋ. سوندىقتان مەن سەنىڭ جانىڭا جولاۋعا ءتيىس ەمەس بولاتىنمىن. سۇراپىل سوعىستان ارەڭ جانى قالعان سەن سىرقاتتان امان بولسىن دەدىم. وسى تىلەكپەن ءالى جازىلار-جازىلماسىمدى بىلمەي, قينالىپ جۇرگەن كۇندەرىمنىڭ بىرىندە الماتىدا, ۋنيۆەرسيتەتتە وقىپ جۇرگەن ساعان: ء«بىر جاقسى قىز تاۋىپ ۇيلەنىپ الساڭشى», دەپ حات تا جازدىم, بىلەسىڭ. جازۋىن جازسام دا, حات كەتىپ قالعاننان كەيىن اعىل-تەگىل جىلادىم. سەنى وزىمنەن وزگە ەشكىمگە قيمادىم. سەنىڭ جانىڭدى مەندەي تۇسىنەتىن بۇل دۇنيەدە ەشكىم جوق دەپ ەسەپتەدىم. مەنىڭ باعىما قاراي سەن ەشكىمگە ۇيلەنبەپسىڭ. مەن جازىلىپ, ماسكەۋدەن قازاقستانعا قايتتىم. ساعان قوسىلىپ, وسىنشاما باقىتقا يە بولدىم. سول كەزدە مەنى اۋرۋ مەڭدەپ, و دۇنيەگە كەتىپ قالۋىم دا مۇمكىن ەدى. مەنى بالا كۇنىمنەن جابىسىپ, ۇزاققا سوزىلعان سول اۋرۋدان سەن جازدىڭ – سەنىڭ ماعان دەگەن ماحابباتىڭ جازدى. ول راس شىعار. ءوز باسىم ءومىردىڭ ەڭ كۇشتى ءدارىسى ماحاببات دەپ ۇقتىم».
بۇل حاليمانىڭ ازىلحانعا ايتقان سىرى, ماحابباتتىڭ ءسوزى. وسىنداي ادالدىق پەن سۇيىسپەنشىلىكتەن قۋات العان جان يەسى دۇنيەدەن قايتسا دا, ونىڭ ومىرشەڭ رۋحى ەكىنشى جارتىسىن قالعان عۇمىردا جەبەپ وتكەنىنە شىعارما سەندىرەدى. ماحابباتقا يلاندىرادى.