مەملەكەت باسشىسىنىڭ جولداۋى – قوعامنىڭ جاڭا قۇرىلىمىن قالىپتاستىرۋدىڭ كەزەكتى قادامى. كەيىنگى جىلدارى داستۇرگە اينالعانداي, قوڭىر كۇزدىڭ العاشقى كۇندەرى جاريا ەتىلەتىن جولداۋدا ەلىمىزدىڭ ازىق-ت ۇلىك قاۋىپسىزدىگىنە باسا ءمان بەرىلىپ كەلەدى. ال ونى قامتاماسىز ەتۋ ءۇشىن ەكونوميكا مەن ءوندىرىستىڭ نەگىزگى ءبىر سالاسى سانالاتىن اگروونەركاسىپ كەشەنىن جۇيەلى تۇردە, جان-جاقتى دامىتا بەرۋ قاجەت.
بيىلعى جولداۋدا دا: ء«بىز اگروونەركاسىپ كەشەنىندە ناقتى سەرپىلىس جاساۋىمىز كەرەك. اۋىل شارۋاشىلىعى سالاسىنىڭ الەۋەتى وراسان زور. بىراق قولدا بار مۇمكىندىكتەردى ءالى دە تولىق پايدالانباي وتىرمىز. قازاقستاننىڭ اينالاسىندا ءونىم وتكىزەتىن وتە ۇلكەن نارىقتار بار. وندا ساپالى ازىق-ت ۇلىك ونىمدەرى تاپشى. ەلىمىزدىڭ ستراتەگيالىق ماقساتى – ەۋرازيا قۇرلىعىنداعى باستى اگرارلىق ورتالىقتىڭ بىرىنە اينالۋ», دەپ ايرىقشا اتاپ ءوتىلدى.
مەملەكەت باسشىسى ايتقانداي, ول ماقساتقا جەتۋ ءۇشىن الدىمەن وندىرىلگەن ونىمدەردى ءوز كۇشىمىزبەن, جوعارى تالاپتارعا ساي وڭدەۋگە جەدەل كوشۋىمىز كەرەك. ءبىزدىڭ اۋىل شارۋاشىلىعى ونىمدەرى – ءداندى, مايلى داقىلداردىڭ باسىم بولىگى شيكىزات كۇيىندە شەتەلدەرگە جونەلتىلەتىنى بەلگىلى. ەندىگى جەردە بۇل جەڭىل تاجىريبەنى مەيلىنشە قىسقارتۋ كەرەك. وڭدەۋ كاسىپورىندارى سانىن بارىنشا كوبەيتىپ, سالانىڭ جۇمىسىن دۇرىس جولعا قويا بىلسەك قانا وڭدەلگەن ءونىم ۇلەسىن ارتتىرۋ مۇمكىن بولادى.
بيىلعى جىل اۋا رايى تۇرعىسىنان وڭاي بولعان جوق. جاۋىن-شاشىن مولشەرىنىڭ از بولۋى, سۋ تاپشىلىعى اۋىل شارۋاشىلىعى مەن اگرووندىرىستىڭ قالىپتى دامۋىنا ءبىرشاما زيان كەلتىردى. سوندىقتان جولداۋدا اۋىل شارۋاشىلىعى مەن اۋماقتىق دامۋ باعىتىنا بارىنشا باسىمدىق بەرىلگەنىن ءبىز, اۋىل شارۋاشىلىعى ونىمدەرىن وندىرۋشىلەر قۋانا قابىلدادىق.
اگرارلىق ماسەلەلەر تىڭعىلىقتى تاپسىرمالار ءتىزىمىن قۇرايدى. ولارعا شاعىن شارۋاشىلىقتاردى قولداۋ, جەكە شارۋاشىلىق يەلەرىنىڭ ءوزارا بىرىگۋى, ماتەريالدىق-تەحنيكالىق بازانى جاڭارتۋ, يننوۆاتسيالىق امال-تاسىلدەردى وندىرىسكە باتىل ەنگىزۋ سىندى اگروونەركاسىپ كەشەنىن دامىتۋعا نەگىز بولاتىن, سەرپىن بەرەتىن قىزمەتتەر كىرەدى. سونداي-اق كەيىنگى كەزەڭدە قاۋىرت قولعا الىنىپ جاتقان ەگىستىكتى ءارتاراپتاندىرۋدىڭ دا ماڭىزى ەرەكشە. قازىردە ديقاندار بۇرىنعىداي ءداستۇرلى داقىلداردى عانا ەكپەي, ءداندى, مايلى داقىلداردىڭ بىرنەشە ءتۇرىن ەگۋدى مىقتاپ قولعا الۋدا. بۇل دا بولسا – نارىق زاڭى.
سايىپ كەلگەندە, اگروونەركاسىپكە قاتىستى ەگىستىكتى ءارتاراپتاندىرۋ, ءتيىمدى شاعىن جانە ورتا بيزنەستى دامىتۋ, وندىرىسكە وزىق تەحنولوگيالاردى ەنگىزۋ ماسەلەلەرى جولداۋدا ەرەكشە اتاپ وتىلگەن «اۋىل اماناتى» باعدارلاماسىنىڭ حالىققا اسا قاجەتتىگىن, ومىرشەڭدىگىن بىلدىرەدى. اۋىل تۇرعىندارىن, شارۋا باققان ەلدى مەملەكەت تاراپىنان قولداۋ شارالارى سان سالالى. سوندىقتان اتالعان باعدارلامانى ورىنداۋ, ابىرويمەن اتقارۋ – ءوز قولىمىزدا, ءبىزدىڭ مىندەتىمىز.
ەدىگە تولەۋحان ۇلى,
شارۋا قوجالىعىنىڭ
جەتەكشىسى