قاراعاندى وبلىسىنداعى «قازاقستان» شاحتاسىندا 17 تامىزدا ورىن العان اپاتقا بايلانىستى كومىر ءوندىرۋ جانە تاۋ-كەن قازبالارىن ۇڭعىلاۋ جۇمىستارى بەلگىسىز مەرزىمگە توقتاتىلدى. 600-گە جۋىق جۇمىسشى باسقا شاحتالارعا جۇمىسقا ورنالاستىرىلدى. بۇل تۋرالى كومىر وندىرۋشىلەردىڭ «قورعاۋ» كاسىپوداعى حابارلادى, دەپ جازادى Egemen.kz.
«قازىرگى ۋاقىتتا شاحتادا جوندەۋ جۇمىستارى جۇرگىزىلىپ جاتىر. نەگىزگى جۇمىستاردى توقتاتا تۇرۋعا بايلانىستى بوساپ قالعان 600-گە جۋىق جۇمىسشى كومىر دەپارتامەنتىنىڭ باسقا شاحتالارىنا جۇمىسقا ورنالاستىرىلدى. «قورعاۋ» كومىر وندىرۋشىلەر كاسىپوداعى «ارسەلورميتتال تەمىرتاۋ» اق كومپانياسىنىڭ باسشىلىعىمەن جۇمىسىن اۋىستىرعان قىزمەتكەرلەرگە اقى ورىنداعان جۇمىس كولەمىنە قاراي تولەۋگە, وندا دا ورتاشا جالاقىدان تومەن بولماۋعا ۋاعدالاستى», دەلىنگەن اقپاراتتا.
ەسكە سالايىك, 17 تامىزدا «ارسەلورميتتال تەمىرتاۋ» اق-عا تيەسىلى «قازاقستان» شاحتاسىندا اپات بولىپ, 5 كەنشى كوز جۇمعان ەدى.