جولداۋدا ەكونوميكالىق-الەۋمەتتىك ماسەلەگە كوپ كوڭىل ءبولىندى. سونىڭ ىشىندە «بايتاق» جاسىلدار پارتياسىنىڭ ۇستانىمىنا ساي كەلەتىن بىرنەشە تۇسى بار. العاشقىسى – سۋ تاپشىلىعى.
«حالقىمىز «سۋدىڭ دا سۇراۋى بار» دەپ بەكەر ايتپاعان. سۋ – ۇنەمدەپ پايدالانباسا, تەز تاۋسىلاتىن شەكتەۋلى رەسۋرس. ونسىز شارۋالاردىڭ كۇنى قاراڭ. سول سەبەپتى بۇل سالادا زاڭسىزدىققا جول بەرىلمەيدى. تالاپقا باعىنبايتىندار قاتاڭ جازاعا تارتىلادى. ەلىمىز ءۇشىن سۋدىڭ ماڭىزى مۇناي, گاز نەمەسە مەتالدان كەم ەمەس. سۋ شارۋاشىلىعى جۇيەسىن ءتيىمدى دامىتۋ ماسەلەسىمەن دەربەس مەكەمە اينالىسۋى قاجەت دەپ سانايمىن», دەدى پرەزيدەنت.
سۋ ماسەلەسى, اۋىز سۋ, ونى ۇنەمدەپ پايدالانۋدىڭ وزەكتىلىگى ارتقانىن كەيىنگى كەزدە كورىپ وتىرمىز. ەندەشە بۇل باستى ماسەلە ەكەنى تۇسىنىكتى. سوعان بايلانىستى سۋ مينيسترلىگى قۇرىلىپ, مۇنى رەتتەۋدىڭ تەتىكتەرى اتالعان ۆەدومستۆوعا جۇكتەلمەك. بۇل ءبىز ءۇشىن وتە ۇلكەن جەتىستىك. ەلىمىز ترانسشەكرالىق وزەندەرگە تاۋەلدى. سول سەبەپتى سۋ جەتىسپەيدى. وسى ماسەلەنى «بايتاق» پارتياسى ۇنەمى كوتەرىپ كەلدىك.
سونىمەن قاتار مەملەكەت باسشىسى اتوم ەلەكتر ستانساسىن سالۋ جونىندە پىكىر ءبىلدىرىپ, ونى حالىقتىق رەفەرەندۋمعا شىعاراتىنىن مالىمدەدى. ەگەر كوپشىلىك قولداۋ بىلدىرسە, وندا اەس سالىنادى. مەنىڭشە, اتوم ەلەكتر ستانساسى ەلىمىزگە كەرەك. بۇل – عىلىمنىڭ جەتىستىگى. «بايتاق» پارتياسىنىڭ ۇستانىمى وسىنداي. بىراق تەحنولوگيانى دۇرىس تاڭداعانىمىز ءجون. دامىعان, الەمدەگى ەڭ قاۋىپسىز اەس سالۋ كۇن تارتىبىنە شىعادى. ويتكەنى كەلەشەكتە ەنەرگەتيكالىق داعدارىس ورنايتىنى تۇسىنىكتى.
قازىرگى تاڭدا قوعامدا اەس سالۋعا قاتىستى داۋدان گورى, ونىڭ قۇرىلىسىن كىم جۇرگىزەتىنى ءجيى تالقىلانىپ جاتىر. مەنىڭشە, فرانتسيا, جاپونيا سەكىلدى تەحنولوگياسى دامىعان ەلدەردى تاڭداعان ءجون. وسىلايشا, زاماناۋي تاسىلدەر ارقىلى قاۋىپسىز اتوم ەلەكتر ستانساسىن سالا الامىز.
ازاماتحان ءامىرتاي,
«بايتاق» جاسىلدار پارتياسىنىڭ جەتەكشىسى