قازىر ەلىمىزدى سۋ ماسەلەسى قاتتى الاڭداتىپ وتىرعانى بەلگىلى. پرەزيدەنت تە جولداۋدا ەلىمىز ءۇشىن سۋدىڭ ماڭىزى مۇناي مەن گاز جانە مەتالدان كەم ەمەس ەكەنىن ايتتى. وسى ورايدا سۋ شارۋاشىلىعى جۇيەسىن ءتيىمدى دامىتۋ ماسەلەسىمەن دەربەس مەكەمە اينالىسۋى قاجەت ەكەندىگىن اتاپ ءوتىپ, سۋ رەسۋرستارى جانە يرريگاتسيا مينيسترلىگى قۇرىلاتىنىن جانە وسى مينيسترلىكتىڭ اياسىندا ۇلتتىق گيدروگەولوگيا قىزمەتى قايتا جۇمىس ىستەيتىنىن جەتكىزدى.
مەن مۇنى ءدال ۋاقىتىندا كوتەرىلىپ وتىرعان وزەكتى باستاما دەپ ايتار ەدىم. ويتكەنى بيىل جازعى دەمالىسىمىزدا ەلىمىزدىڭ بىرقاتار ءوڭىرىن, سونىڭ ىشىندە سۋ تاپشىلىعىنان زارداپ شەگىپ وتىرعان وبلىستاردى ارالادىق. اتاپ ايتقاندا, جامبىل وبلىسىندا اۋىل شارۋاشىلىعى جايىلىمدارىنا بارىپ, فەرمەرلەرمەن تىكەلەي كەزدەسىپ سويلەستىك. ماسەلەنى ءوز كوزىمىزبەن كوردىك. بۇل شىن مانىندە كەزەك كۇتتىرمەس شارۋا. ونى دەرەۋ شەشپەسە, ەرتەڭ قيىن بولاتىنى كورىنىپ وتىر. سوندىقتان پرەزيدەنتتىڭ ارنايى مينيسترلىك قۇرۋ, سۋ قورىن ساقتايتىن تەحنولوگيالاردى ەنگىزۋ, سۋ توعاندارىن جاساۋ تۋرالى باستامالارى قۇپتارلىق ءىس.
بۇل جەردە كادر ماسەلەسىن دە ەستەن شىعارماعان دۇرىس. سۋ ماسەلەسى – تەك ەكونوميكالىق ەمەس, ساياسي ماسەلە. شۇكىر, قازاقستاندا سۋ ماسەلەسىن مەملەكەتتىك دەڭگەيدە مەڭگەرگەن, ورتالىق ازيانىڭ گيدرولوگيا, يرريگاتسيا كوشباسشىلارىن جەتىك بىلەتىن مەملەكەتتىك تۇلعالار بار. ولار زەينەت جاسىنا شىقسا دا, تاجىريبەسىمەن سالانى تىعىرىقتان شىعارا الادى.
سۋ رەسۋرستارى جانە يرريگاتسيا مينيسترلىگى قۇرىلعاننان كەيىن ول جەردە جۇمىس ىستەيتىن ادامدار لاۋازىمدىق مىندەتتەرىمەن قاتار ءسوزى ءوتىمدى جانە بەدەلدى بولۋى كەرەك. ءبىز سۋ ماسەلەسىندە كورشىلەرگە بەلگىلى ءبىر دەڭگەيدە تاۋەلدى ەلمىز. سوندىقتان جاڭا مەملەكەتتىك ورگاننىڭ باسشىلارى ءوز ىشىمىزدەگى رەسۋرستاردى ءتيىمدى پايدالانۋمەن قاتار, كورشى مەملەكەتتەرمەن دە وڭتايلى ديالوگ قۇرىپ, ديپلوماتيالىق جولدارمەن شيەلەنىستى جاعدايلارعا جول بەرمەۋگە ءتيىس. بىزدە ونداي قابىلەتتى ازاماتتار بار. بۇل ۇلكەن جۇمىس جانە ونىڭ ناتيجەسى اۋىل شارۋاشىلىعىن دامىتۋ ءۇشىن ماڭىزى زور.
ازات پەرۋاشەۆ,
ءماجىلىس دەپۋتاتى