مەملەكەت باسشىسى قازاقستان حالقىنا جولداۋىندا كولىك-لوگيستيكا سالاسىنىڭ الەۋەتىن تولىق پايدالانۋ كەرەك ەكەنىن ايتتى, دەپ حابارلايدى Egemen.kz.
«ستراتەگيالىق ماڭىزى بار مىندەتتىڭ ءبىرى – كولىك-لوگيستيكا سالاسىنىڭ الەۋەتىن تولىق پايدالانۋ. قازىر الەمدە جاڭا ەكونوميكالىق كەڭىستىك قالىپتاسىپ جاتىر. قىتايدان ەۋروپاعا, رەسەيگە, ورتالىق ازياعا جانە وسى ايماقتاردان قىتايعا جىبەرىلەتىن تاۋار كولەمى ايتارلىقتاي كوبەيەدى دەگەن بولجام بار. قازاقستان سولتۇستىك پەن وڭتۇستىكتى, باتىس پەن شىعىستى بايلانىستىراتىن جاھاندىق جولايرىقتا ورنالاسقان. بۇل ءبىزدىڭ ەلىمىزگە زور مۇمكىندىك بەرىپ وتىر. سوندىقتان كولىك-لوگيستيكا سالاسى ەكونوميكامىزدى العا باستايتىن باستى كۇشتىڭ بىرىنە اينالۋعا ءتيىس. قازىر باسەكە كۇشەيىپ تۇر. وسىعان وراي بىرقاتار ماڭىزدى ماسەلەنى شۇعىل شەشۋ كەرەك», دەدى پرەزيدەنت.
ونىڭ ايتۋىنشا, ەڭ الدىمەن, «دوستىق-مويىنتى», «باقتى-اياكوز», «داربازا-ماقتاارال» باعىتىنداعى ءىرى تەمىرجول جوبالارىن ساپالى جۇزەگە اسىرۋ قاجەت. ونىڭ قاتارىندا الماتىنى اينالىپ وتەتىن تەمىر جول جەلىسى دە بار. قازاقستان كولىك سالاسىندا رەسەيمەن, قىتايمەن ىنتىماقتاستىعىن جالعاستىرا بەرەدى.
«بىزگە تەڭىز ينفراقۇرىلىمىن دامىتۋعا ارنالعان ءبىرتۇتاس جوسپار كەرەك. وندا قۇرىق پورتىنا ايرىقشا ءمان بەرىلۋگە ءتيىس. قۇرىقتى اقتاۋ پورتى سياقتى تولىققاندى لوگيستيكالىق كلاستەرگە اينالدىرۋىمىز قاجەت. «سولتۇستىك-وڭتۇستىك» حالىقارالىق ءدالىزى دە وتە ماڭىزدى. سول ارقىلى پارسى شىعاناعىنا شىعۋعا بولادى. بىرتىندەپ بۇل باعىتتاعى تەمىرجول جەلىسىنىڭ وتكىزۋ مۇمكىندىگىن ەكى ەسە ارتتىرۋ كەرەك.
الدىمەن «بولاشاق-چەليابينسك» تەمىرجول جەلىسىنىڭ قازاقستانداعى بولىگىن جاڭعىرتۋعا كىرىسۋ قاجەت. حالىقارالىق دالىزدەرمەن ءتيىمدى بايلانىس ورناتۋ ءۇشىن لوگيستيكا قىزمەتىن تولىق ۇسىنۋ ماڭىزدى. استانا, الماتى, شىمكەنت جانە اقتوبە اۋەجايلارى مۋلتيمودالدى ورتالىق بولۋعا ءتيىس», دەدى ول.پرەزيدەنت بۇل ورتالىقتار باسەكەگە قابىلەتتى بولۋ ءۇشىن جۇكتەردى قابىلداۋ جانە تاراتۋ قىزمەتى ساپالى اتقارىلۋى كەرەك ەكەنىن ايتتى. جالپى, سالانى دامىتۋ ءۇشىن تاريف جانە رەتتەۋ ساياساتى دۇرىس جۇرگىزىلۋگە ءتيىس.