سوڭعى جىلدارى قازاقستاندا اەس سالۋ ماسەلەسى ءجيى كوتەرىلىپ, بىرقاتار ءىس-شارالار كەشەنى دە جۇرگىزىلدى. حالىق اراسىندا دا ءتۇرلى ساۋالدار تۋىنداپ, الەۋمەتتىك جەلىدە بولسىن, قوعامدىق تالقىلاۋلاردا بولسىن قىزۋ تالقىلانعان ەدى. بۇگىن مەملەكەت باسشىسى دا بۇل ماسەلەنىڭ انىق-قانىعىنا توقتالىپ ءوتتى, دەپ حابارلايدى Egemen.kz.
«اتوم ەنەرگەتيكاسىن دامىتۋ اسا ماڭىزدى ەكونوميكالىق جانە ساياسي ماسەلەگە اينالدى. اتوم ەلەكتر ستانتسياسىن سالۋ قاجەت پە, جوق پا دەگەن ساۋالعا قاتىستى ءتۇرلى پىكىر بار ەكەنىن بىلەسىزدەر. قازاقستان – الەمدەگى ەڭ ءىرى ۋران ءوندىرۋشى مەملەكەت. ەندەشە ءوز جەرىمىزدە اتوم ستانتسياسىن سالۋعا ابدەن قاقىمىز بار», دەدى قاسىم-جومارت كەمەل ۇلى.
دەسە دە, كەيبىر ساراپشىلار شاعىن يادرولىق ستانتسيالار سالۋ كەرەك دەگەن پىكىر ايتادى. الايدا كوپتەگەن ازامات پەن بىرقاتار ساراپشىلار يادرولىق ستانتسيانىڭ قاۋىپسىزدىگىنە كۇمانمەن قارايتىنى بەلگىلى. بۇل رەتتە مەملەكەت باسشىسى سەمەي پوليگونىن مىسال رەتىندە كەلتىردى.
«سەمەي پوليگونى حالقىمىزعا قانشاما قاسىرەت اكەلگەنىن ەسكەرسەك, ولاردىڭ كۇدىگىن تۇسىنۋگە بولادى. سوندىقتان بۇل ماسەلە بويىنشا قوعامدىق تىڭداۋلاردى, ەگجەي-تەگجەيلى, كەڭ اۋقىمدى تالقىلاۋلاردى جالعاستىرۋىمىز كەرەك. ءبىز ماڭىزدى ستراتەگيالىق ماسەلەلەرگە قاتىستى تۇپكى شەشىمدى رەفەرەندۋم ارقىلى قابىلداۋىمىز قاجەت. بۇل – 2019 جىلى سايلاۋ الدىندا مەنىڭ حالىققا بەرگەن ۋادەم. اتوم ەلەكتر ستانتسياسىن سالۋ نەمەسە سالماۋ ماسەلەسى – بۇل ەلىمىزدىڭ بولاشاعىنا قاتىستى اسا ماڭىزدى ماسەلە. سوندىقتان ونى جالپىۇلتتىق رەفەرەندۋم ارقىلى شەشكەن ءجون دەپ سانايمىن. ناقتى مەرزىمىن كەيىن انىقتايمىز», دەپ ناقتىلادى پرەزيدەنت.