پرەزيدەنت قاسىم-جومارت توقاەۆ وتكەن جىلى ەلىمىزدىڭ جىلۋ ەلەكتر ستانتسيالارىندا بولعان اپاتتاردى نازارعا الىپ, ۇكىمەتكە ارنايى تاپسىرما جۇكتەدى, دەپ حابارلايدى Egemen.kz.
«وتكەن قىستا ەلىمىزدىڭ جىلۋ ەلەكتر ستانتسيالارىندا قايتا-قايتا اپات بولدى. بۇل جاعداي جىلدار بويى شەشىلمەگەن ماسەلەنىڭ بەتىن اشىپ بەردى. ينفراقۇرىلىمنىڭ ابدەن توزۋى حالىقتىڭ تۇرمىس ساپاسىنا تىكەلەي اسەر ەتەدى. يندۋستريالاندىرۋ قارقىنىن دا تەجەيدى. ياعني, ينفراقۇرىلىمدى جاڭعىرتپاساق, جاڭا ەكونوميكالىق ۇلگىگە كوشۋ مۇمكىن ەمەس», دەدى پرەزيدەنت.
بۇل رەتتە مەملەكەت باسشىسى ەل ۇكىمەتى جاڭا ينفراقۇرىلىمدىق جوسپاردا وسى سالاداعى بارلىق تۇيتكىلدى اشىق كورسەتىپ, ونى شەشۋ جولدارىن انىقتاۋعا ءتيىس ەكەنىن اشىق ايتتى.
«ەنەرگەتيكالىق قاۋىپسىزدىك ماسەلەسىن دە شەشۋ قاجەت. بۇل سالادا قولدان كەلگەنشە ءوز رەسۋرستارىمىزعا ارقا سۇيەگەن ابزال. باستى مىندەت ەلەكتر ەنەرگەتيكاسى سالاسىنا جۇكتەلەدى. الداعى 5 جىلدا كەمىندە 14 گيگاۆاتتىق جاڭا ەلەكتر قۋاتى ىسكە قوسىلادى. بيىل ەكىباستۇزداعى ءبىرىنشى گرەس-ءتىڭ ءبىرىنشى بلوگىن قايتا قۇرۋ جۇمىستارى اياقتالادى. بۇرىن ەشقاشان تولىق قۋاتىن پايدالانىپ كورمەگەن ستانتسيانىڭ 8 بلوگى تۇگەل جۇمىس ىستەيتىن بولادى. قازىر ەكىنشى گرەس-ءتى كەڭەيتۋ جوباسى جۇزەگە اسىرىلىپ جاتىر, ءۇشىنشى گرەس-ءتىڭ قۇرىلىسى باستالادى», دەدى مەملەكەت باسشىسى جولداۋ بارىسىندا.