ەلدىڭ ەلدىگىن ايشىقتايتىن, مەملەكەتىمىزدەگى بىرلىكتىڭ بەرىك ىرگەتاسىن قالايتىن باستى قۇجات بار بىزدە. ول – كونستيتۋتسيا. وتكەن جىلى 5 ماۋسىمدا مەملەكەت باسشىسى قاسىم-جومارت توقاەۆتىڭ باستاماسىمەن نەگىزگى زاڭىمىزعا وزگەرىستەر ەنگىزىلدى. اتا زاڭعا ۇسىنىلعان 56 تۇزەتۋدى كونستيتۋتسيالىق رەفەرەندۋم كەزىندە ەلىمىزدىڭ باسىم بولىگى قولدادى. وسىلايشا, حالىق ءوز تاڭداۋىن جاسادى. جاڭارتىلعان باستى قۇجات ازاماتتاردىڭ قۇقىعىن تانىتىپ, حالىقتىڭ مۇددەسىن قورعاۋدا جاڭا مۇمكىندىكتەرگە, يگى ىستەر مەن باستامالارعا جول اشتى. سول سەبەپتى دە ەگەمەندى ەلىمىزدىڭ جاڭا تاريحىن جازعان ساياسي رەفورما – كونستيتۋتسيالىق رەفورما ەل ومىرىندەگى جاڭا ساپالىق كەزەڭ, وزگەرىستەر باستاۋى.
حالقىمىز ءاۋ باستان «ازاتتىقتىڭ التىن قازىعى» دەپ ايشىقتاعان كونستيتۋتسيادا بارلىق ازاماتتىڭ قۇقىقتارى مەن مىندەتتەرى, مىزعىماس قۇندىلىقتارىمىز بەن قاعيداتتارىمىز, مەملەكەتتىلىگىمىزدىڭ باستى ۇستىندارى ايقىن ءارى انىق جازىلعان. سونداي-اق باس قۇجات مەملەكەتىمىزدىڭ الەۋمەتتىك-ەكونوميكالىق دامۋىنىڭ, زاڭ ۇستەمدىگىنىڭ, تۇراقتىلىق پەن كەلىسىمنىڭ كەپىلى بولىپ قالا بەرمەك.