اۋىل مەكتەبىنە – ارنايى اۆتوبۋس

«مەملەكەت مەكتەپ وقۋشىلارىنىڭ ساپالى ءبىلىم الۋى ءۇشىن بارلىق جاعدايدى جاساپ كەلەدى. مەكتەپكە توڭباي بارۋى مەن قايتۋىن دا نازاردا ۇستايدى. تاسىمالداۋ كەزىندەگى قاۋىپسىزدىك تە ماڭىزدى. جاڭا اۆتوبۋستار وقۋشىلار ءۇشىن جىلى, ىڭعايلى ءارى قاۋىپسىز», دەدى وبلىس اكىمى ايداربەك ساپاروۆ.

اۆتوبۋستار كونديتسيونەر جانە قاۋىپ­سىزدىك بەلدىكتەرىمەن جابدىقتالعان. كولىكتە ەرەكشە قاجەتتىلىگى بار بالالاردىڭ مۇقتاج­دىقتارى دا ەسكەرىلىپ, پاندۋس پەن جۇرگىزۋشىنى شاقىرۋ تۇيمەسى ورناتىلعان.

ەندى وبلىس بويىنشا اۋىل وقۋشىلارىن بارلىعى 143 اۆتوبۋس تاسىمالدايدى. اۆتوپاركتى جاڭارتۋ جۇمىسى جالعاسىن تابادى.

وبلىستا ءبىلىم سالاسىنا قوماقتى قارجى قۇيىلىپ جاتىر. «جايلى مەكتەپ» ۇلتتىق جوباسى اياسىندا وبلىس ورتالىعىندا 4 جاڭا مەكتەپ سالىنادى. «بەرەكە» شاعىن اۋدانىندا ارنايى مەكتەپ-ينتەرناتتىڭ قۇرىلىسى باستالدى.

سونىمەن قاتار بيىل 49 ءبىلىم نىسانىندا كۇردەلى جوندەۋ جۇرگىزىلىپ جاتىر. سونداي-اق مەكتەپتەردىڭ ماتەريالدىق-تەحنيكالىق بازاسىن نىعايتۋعا 2,2 ملرد تەڭگە باعىتتالدى. وقۋ ورىندارىن تاۋلىك بويى مامانداندىرىلعان كۇزەتپەن قامتاما­سىز ەتۋگە دە قاراجات ءبولىندى.

جاڭا وقۋ جىلىندا 1-4 سىنىپ وقۋشى­لارى مەن بالاباقشالاردا الەۋمەتتىك تۇرعىندا از قامتىلعان وتباسىلاردىڭ بالالارى تەگىن ىستىق تاماقپەن قامتىلادى. سونىمەن قاتار «جاس وركەن» جانە «بەرەكە» شاعىن اۋداندارىندا 2 بالاباقشانىڭ قۇرىلىسى باستالادى.

سولتۇستىك قازاقستان وبلىسى