ۇلتتىق سپورت قاۋىمداستىعىنىڭ ءبىر جىلدىق جۇمىس ناتيجەسى, ۇلتتىق سپورتتاعى وزەكتى ماسەلەلەر مەن الداعى جوسپارلار تالقىلانعان كەزدەسۋدە قاۋىمداستىق پرەزيدەنتى يسلامبەك سالجانوۆ 1 قىركۇيەكتە «ALAMAN» مەديا بايقاۋى باستالاتىنىن ايتتى, دەپ جازادى Egemen.kz.
ي.سالجانوۆ تۇڭعىش رەت وتكىزىلەتىن بايقاۋدىڭ ماقساتىن اتاپ ءوتتى: ۇلتتىق سپورت تۇرلەرىنىڭ ناسيحاتىن كۇشەيتۋ ءۇشىن وسى سالاداعى جۋرناليستەر, باق وكىلدەرى جانە اۆتورلاردى كاسىبي تۇرعىدان باعالاپ, ەڭ ۇزدىكتەرىن انىقتاۋ.
بايقاۋ 1 قىركۇيەكتەن 2024 جىلدىڭ 1 ناۋرىز ارالىعىندا 6 اي بويى وتكىزىلىپ, وعان وتاندىق جۋرناليستەر, اۆتورلار جانە شەتەلدىك باق وكىلدەرى دە قاتىسا الادى.
بايقاۋدا «ۇزدىك باعدارلاما» (تەلەۆيزيا, راديو), «ۇزدىك اناليتيكالىق ماتەريال» ء(داستۇرلى ءباسپاسوز: گازەت, جۋرنال), «ۇزدىك تانىمدىق ماتەريال» (ينتەرنەت, باق), «ۇزدىك سۇحبات» (YouTube ارنا), «ۇزدىك فوتوسۋرەت» (باق, الەۋمەتتىك جەلى), «شەتەلدىك باق-تا جاريالانعان ۇزدىك ماتەريال» (قازاقتىڭ ۇلتتىق سپورتى تۋرالى), «الەۋمەتتىك جەلىدەگى ۇزدىك ماتەريال» (بلوگينگ, موبيلوگرافيا) سياقتى نوميناتسيالار بار.
بايقاۋدىڭ جەڭىمپازدارى 2024 جىلدىڭ ناۋرىز ايىندا ماراپاتتالادى.
ءۇش ۇزدىك اۆتورعا 1 000 000 تەڭگە (1-ورىن), 700 000 تەڭگە (2-ورىن), 500 000 تەڭگە (3-ورىن) كولەمىندە اقشالاي سىيلىق بەرىلەدى.
ايتا كەتسەك, بايقاۋ 2024 جىلى قازاقستاندا وتكىزىلەتىن V دۇنيەجۇزىلىك كوشپەندىلەر ويىندارى قارساڭىندا وتكىزىلەدى.