ايتىسكەر اقىن, ءماجىلىس دەپۋتاتى امانجول التاەۆ قىرعىزستان پرەزيدەنتى ات مىنگىزگەن قازاق اقىنى ءبىرجان قالدىباەۆپەن سويلەسىپ, اعالىق اقىلىن جەتكىزگەنىن ايتتى, دەپ حابارلايدى Egemen.kz.
ء«بىرجان قالدىباەۆ باۋىرىما جاناشىرلىقپەن ايتقان سىن پىكىرىمدى ۇدەتىپ ءتۇرلى سايتتار ءبىر - بىرىنەن كوشىرىپ الىپ شىعارىپ جاتىر ەكەن. جەلى قولدانۋشىلارى اراسىندا دا ماسەلەنىڭ بايىبىنا بارماي, مەنى قىزعانشاقتىق تانىتتى دەپ سان ساققا جۇگىرتىپ جاتقاندار دا بار ەكەن. بۇگىن ءبىرجان باۋىرىممەن سويلەستىك. مەن اعالىق اقىلىمدى جەتكىزدىم, ول دا ىنىلىك ىزەتىمەن ءوز پىكىرىن ايتتى. ەڭ باستىسى ءبىر - ءبىرىمىزدى تۇسىندىك دەپ ويلايمىن. ماسەلەنى داۋعا اينالدىرماي نۇكتەسىن قويىپ, سىيلاستىقتى ساقتاۋعا ۋاعدالاستىق», دەپ جازدى امانجول التاەۆ Facebook پاراقشاسىندا.
سونداي-اق ول ءبىرجاننىڭ تۇلپار مىنگەنىنە قىزعانىشپەن قارادى دەگەن جۇرتتىڭ سوزىنە جاۋاپ بەردى.
«باۋىرىمىزدىڭ تۇلپار مىنگەنىنە تەك قۋانىشپەن قارايمىن. ءوزىم دە وزگە ازاماتتارعا جىلىنا بىرنەشە تۇلپار مىنگىزىپ جۇرگەن ازاماتپىن. ءبىر ەلدىڭ اتىنان بارعاننان كەيىن ايتقان ارناۋى كوركەمدىك تالاپقا, ەستەتيكالىق تالعامعا, بايىپتى مازمۇنعا ساي بولسا ەكەن دەدىم. بۇل - ونەر ولكەسىندەگى بارشامىزعا ورتاق تالاپ. ونەردىڭ ساپاسىن الاسارتىپ الماۋ - ءپارىزىمىز! بىرجان باۋىرىمنىڭ وتباسىنا اماندىق, ىسىنە بەرەكە تىلەيمىن. تاقىمىنان تۇلپار كەتپەسىن», دەي كەلە ول باۋىرلاس قىرعىز ەلىنىڭ, پرەزيدەنتىنىڭ ىستىق ىقىلاسىنا العىس ءبىلدىردى.
ەسكە سالا كەتەيىك, جۋىردا امانجول التاەۆ قىرعىزستان پرەزيدەنتى ات مىنگىزگەن قازاق اقىنى ءبىرجان قالدىباەۆتى سىنعا العان ەدى. كەيىنىرەك قىرعىزستان پرەزيدەنتى سادىر جاپاروۆ «كابار» اگەنتتىگىنە بەرگەن سۇحباتىندا وسى سىنعا قاتىستى جاۋاپ بەردى.