توتەنشە جەمقورلىق

سوڭعى 5 جىلدا ازاماتتىق قورعاۋ ورگاندارىندا 150-گە جۋىق سىبايلاس جەمقورلىق فاكتىسى تىركەلگەن. سىبايلاس جەمقورلىق قىلمىستارى ەلىمىزدىڭ بارلىق وڭىرىندە ورىن العان. ولاردىڭ باسىم بولىگى الماتى, استانا, شىمكەنت قالالارىنا, سونداي-اق قوس­تاناي جانە الماتى وبلىستارىنا تيەسىلى. انىقتالعان قىلمىستاردىڭ ىشىندە پاراقورلىق پەن جىمقىرۋ فاكتىلەرى باسىم. «زاڭسىز سىياقى» ءورت قاۋىپسىزدىگىن قامتاماسىز ەتۋ بويىنشا تەكسەرۋ اكتىسىنە قول قويۋ كەزىندە, وقۋدان وتكىزۋ, رۇقسات بەرۋ جانە جۇمىسقا ورنالاسۋ ءۇشىن بەرىلىپ وتىرعان.

اگەنتتىك توراعاسى اتاپ وتكەندەي, جۇرگىزىلىپ جاتقان سىبايلاس جەمقور­لىققا قارسى جۇمىستارعا قاراماستان, تجم قىزمەتكەرلەرى پارا الۋدان تىيىلار ەمەس. «كۇنى كەشە جەتىسۋ وبلىسىندا جەرگىلىكتى تج ءبولىمى باسشىسى جۇمىسقا العان ادامنان اقشا العانى انىقتالدى. بۇگىنگى ءىس-شارا­نىڭ وتەتىنىن بىلە تۇرا, سوندا دا قىلمىسقا بارىپ وتىر. بۇل ورايدا پروفيلاكتيكالىق تۇرعىدا ناقتى ارەكەت ەتۋ قاجەت. قىزمەتكەرلەردىڭ مىنەز-قۇلقىن تۇزەتىپ, پسيحولوگيالىق كوزقاراسىن وزگەرتۋ ماڭىزدى», دەدى ول.

بۇعان دەيىن سىبايلاس جەمقور­لىق­قا قارسى قىزمەت تجم ورتكە قارسى قىزمەت كوميتەتىنىڭ توراعاسىن, شىمكەنت قالاسىنىڭ جانە جەتىسۋ وبلىسىنىڭ تج دەپارتامەنتتەرى باس­شىلارىن ۇستاعان بولاتىن. ولار ورتكە قارسى قاۋىپسىزدىك سالاسىنداعى «قامقورلىعى» ءۇشىن كاسىپكەرلەردەن جۇيەلى تۇردە پارا الىپ وتىرعان, تەكسەرىلەتىن ۇيىمداردى كەلىسىم­شارت جاساسۋ جولىمەن قىزمەتتەردى ساتىپ الۋعا ماجبۇرلەپ, ولار بويىنشا ۋاقىتىلى اقى تولەۋىن قامتاماسىز ەتتى دەگەن كۇدىككە ىلىنگەن. «بالىق باسىنان ءشىريدى» دەمەكشى, باسشىلاردىڭ ءوزى جەمقورلىق قىلمىسىنا بارعان وقيعالار الماتى قالاسىندا, شىعىس قازاقستان, قىزىلوردا جانە سولتۇستىك قازاقستان وبلىستارىندا دا ورىن العانىن ايتا كەتۋ كەرەك.

توتەنشە جاعدايلار ءمينيسترى س.ءشارىپ­حانوۆ بۇل فاكتىلەردى مويىنداپ, ۆەدومستۆو سىبايلاس جەمقورلىق­قا قارسى كۇرەستى كۇشەيتۋ ءۇشىن تۇبە­گەيلى قادامدار جاسايتىنىن مالىمدەدى. «بۇل ءبىزدىڭ قىزمەتكەرلەر ءۇشىن جاعا ۇستاتارلىق جاعداي. اتالعان ادام­دار بەلگىلى ءبىر جەتىستىكتەرگە قول جەتكىز­گەن ۇزدىك قىزمەتكەرلەردىڭ قاتارىنان بولاتىن. دەگەنمەن وسى جاعدايدا ولاردىڭ ءبىز بىلمەگەن تەرىس قاسيەتى – ەكىجۇزدىلىگى اشكەرەلەنىپ وتىر. بۇدان ءبىز ءتيىستى ساباق الامىز, قاراپايىم ءورت سوندىرۋشىلەر بىزگە سەنىممەن قاراۋى كەرەك», دەدى ول.

سىبايلاس جەمقورلىققا قارسى قىزمەت تاراپىنان توتەنشە جاعدايلار مينيسترلىگىنە جەكە قۇرام اراسىندا جۇرگىزىلەتىن الدىن الۋ جۇمىستا­رىن كۇشەيتۋ ۇسىنىلدى. «سىبايلاس جەمقورلىق تاۋەكەلدەرىنە ىشكى تالداۋ جۇرگىزىپ, پروبلەمالىق ۋچاسكەلەردى زەردەلەۋ, سونداي-اق ۆەدومستۆونىڭ بارلىق قىزمەتكەرلەرىن ادالدىق تۇرعىسىندا تەكسەرۋدى اپروباتسيالاۋ قاجەت», دەدى ا.جۇماعالي.