بابالارىمىز قايماعىن بۇزباي بۇگىنگە جەتكىزگەن ءداستۇرلى ءدىن مەن سالتىمىز – ەل دىڭگەگى. يمان تارازىسى ءتۇزۋ, دىلىنە بەرىك حالىقتىڭ ورەسى جوعارى, رۋحى بيىك. يسلام ءدىنى دالامىزعا وركەن جايعان تۇستا-اق ۇلت ديىرمەنىنەن ءوتىپ, ياساۋي, ءماشھۇر ءجۇسىپ, اباي, شاكارىم, عۇمار قاراش, سادۋاقاس عىلماني سىندى بىرەگەي تۇلعالارىمىز ارقىلى ەلدىك رۋحانياتپەن بىتە قايناستى.
قازىرگى تاڭدا يسلام عىلىمى ءار باعىتتا زەرتتەلىپ, وعان بىلىكتى عالىمدارىمىزدان باستاپ ەلشىل ازاماتتارعا دەيىن ۇلەس قوسىپ كەلەدى. سولاردىڭ ءبىرى – قازاقستان جۋرناليستەر وداعىنىڭ مۇشەسى, ولكەتانۋشى نارباي تاعاي ۇلى. جاقىندا عالىمنىڭ «يسلامداعى رۋحاني جاڭعىرۋ», «تاقۋالىققا باستار جول», «قۇرانداعى قيامەت پەن قيالداعى قيامەت», ء«بىز تاقۋالىق مەكتەبىندەمىز, بىراق جاقسى وقۋشى ەمەسپىز», ء«ومىر ونەگەسى نەمەسە ءسىز ىزدەگەن كىتاپ» سىندى بەس كىتاپتان تۇراتىن جيناعى كوزىقاراقتى وقىرمانعا جول تارتتى. اۆتور كىتاپتا يسلام ءدىنىن ەل ادەبيەتى مۇرالارى مەن ۇلتتىق تانىم ارقىلى ءتۇسىندىرىپ, ماعىناسىن اشۋعا ۇمتىلادى. ۇلتىمىزدىڭ رۋحاني ساۋلىعى ءۇشىن ءدىني ءبىلىم ءنارى باعالى قۇندىلىق ەكەنىن بايان ەتەدى.
– مەنىڭ ماقساتىم – جالعاندا جاڭىلىس باسپاي, تۋرالىقپەن جاساعىسى كەلەتىندەرگە كەڭەس بەرىپ, دەمەۋ. بىزدىكى ايات-ءحاديستى قۇرمەتتەگەندەردىڭ, ۇلتتىق سالت-ءداستۇردى سىيلاعانداردىڭ ونەگەلى ءومىرىن ناسيحاتتاۋ, پەندەلەردىڭ ومىردەگى كەمشىلىكتەرىنەن پىكىر ءتۇيۋ. ادامدارعا قايىر جاساۋ – ەلگە قايىر جاساۋ. بۇل ۇلتىمىزدىڭ كەمىن تولتىرۋ, ازىن كوبەيتۋ, كۇشىن ارتتىرۋ, جامانىن جاقسارتۋ. بىزگە ەڭ قاجەتى – تىلدەگى ەمەس, جۇرەكتەگى شىنايى يماندىلىق, – دەيدى اۆتور.
حامسا-جيناقتاعى ءدىن مەن ۇلتتىق ەم-دوم, ءدىن مەن بەينەلەۋ ونەرى, سونداي-اق اتادان بالاعا جەتكەن ماقال-ماتەلدەرىمىزدىڭ يماندىلىق نەگىزدەرى بايىپتى تۇسىندىرىلەدى. بايىرعى بۇقارا ايماعىن جايلاعان قازاقتاردىڭ ەتنوگرافياسى مەن تانىم-تۇسىنىگىنەن ماعلۇمات بەرەتىن ەداۋىر تاريحي-تۇرمىستىق ماتەريالدار دا كورىنىس تاپقان.