تەننيستەن مىسىردىڭ داكاحليا قالاسىندا ۇيىمداستىرىلعان جاسوسپىرىمدەر اراسىنداعى ەڭ بەدەلدى ITF Juniors J100 Dakahlia ءتۋرنيرى ءوز مارەسىنە جەتتى, دەپ حابارلايدى Egemen.kz.
اتالعان دودادا ونەر كورسەتكەن 15 جاستاعى دارىندى تەننيسشىمىز ءامىر ومارحانوۆ جارىستىڭ باس جۇلدەسى ءۇشىن وتكەن سايىستا رەسەيلىك ارتەم بوگومولوۆپەن شەبەرلىك بايقاسىپ, اسا تارتىستى باسەكەدە 5:7, 6:1, 7:5 ەسەبىمەن جەڭىسكە جەتتى. فينالدىق سايىسقا دەيىن ءامىر قارسىلاستارىنا بىردە-ءبىر سەت بەرمەي قاپى قالدىرعانىن ايتا كەتكەن ءجون.
وتانداسىمىز وسى جەڭىسىنىڭ ارقاسىندا جاسوسپىرىمدەر اراسىنداعى ITF رەيتينگىندە بىردەن 66 ساتى جوعارىلاپ, 198-ورىنعا كوتەرىلىپ الدى.
سونداي-اق قاراعاندى تەننيس مەكتەبىنىڭ تۇلەگى بۇل كۇندەرى مىسىرداعى تاعى ءبىر ۇلكەن جارىسقا قاتىسىپ جاتىر. ول كەشە كايردەگى J 100 ءتۋرنيرىنىڭ العاشقى اينالىمىن ءساتتى باستاپ, جەرگىلىكتى تەننيسشىدەن 6:3, 6:2 ەسەبىمەن باسىم ءتۇستى.