پارتيالىق «Tomiris» باعدارلاماسى اياسىندا «ايەلدەردىڭ كوشباسشىلىعى» تاقىرىبىنداعى ترەنينگ-ۆوركشوپتىڭ اشىلۋ سالتاناتى ءوتتى. «Amanat» پارتياسىنىڭ ساياسي مەنەدجمەنت اكادەمياسى بۇل جوبانى پرەزيدەنت جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيامەن, كونراد ادەناۋەر قورىمەن بىرگە ۇيىمداستىردى.
ماجىلىستەگى «Amanat» فراكتسياسىنىڭ دەپۋتاتى, ءىس-شارا مودەراتورى جۇلدىز سۇلەيمەنوۆانىڭ ايتۋىنشا, بيىل جوباعا قاتىسۋعا 300-دەن استام ادام ءوتىنىم ءبىلدىرىپ, ونىڭ 75-ءى ىرىكتەۋ كەزەڭىنە جولداما الدى. ناتيجەسىندە, 42 قاتىسۋشى ىرىكتەۋدەن ىركىلمەي ءوتتى. ايتا كەتەيىك, بىلتىر جوباعا قاتىسقان 37 قىز-كەلىنشەكتىڭ 12-ءسى كەيىن وبلىستىق, قالالىق جانە اۋداندىق ءماسليحاتتاردىڭ دەپۋتاتى بولىپ سايلاندى.
«مەملەكەت باسشىسى ەلىمىزدىڭ جاڭاشا كەلبەتىنىڭ ءبىرى تەڭ ءارى ادىلەتتى قوعام قۇرۋ ەكەنىن ايتقانى بەلگىلى. بىلتىر ەل تاريحىنداعى اسا ماڭىزدى ساياسي وقيعالاردىڭ ءبىرى – جالپىۇلتتىق رەفەرەندۋم وتكىزىلىپ, اتا زاڭىمىزعا وزگەرتۋلەر مەن تولىقتىرۋلار ەنگىزىلدى. 2020 جىلدان بەرى جاڭا سايلاناتىن پارلامەنت ءماجىلىسى مەن بارلىق دەڭگەيدەگى ءماسليحات دەپۋتاتتارىنىڭ 30 پايىزىن ايەلدەر مەن جاستار قۇراۋعا ءتيىس دەگەن مىندەت قويىلدى. بيلىكتەگى ايەلدەر ۇلەسى ارتىپ, ىسكەر ايەلدەرگە مەملەكەتتىك ءتۇرلى قولداۋ كورسەتىلىپ جاتىر. مۇنىڭ بارلىعى كوشباسشى ايەلدەردىڭ قوعامداعى ءرولىن ارتتىرۋدىڭ العىشارتى دەپ بىلەمىن», دەدى پارتيانىڭ اتقارۋشى حاتشىسى داۋلەت كارىبەك.
پرەزيدەنت جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيا توراعاسىنىڭ ورىنباسارى ءلاززات سۇلەيمەن ورتالىق ازيا ەلدەرىمەن سالىستىرعاندا, قازاقستاندا ايەلدەر كوشباسشىلىعى ايتارلىقتاي دامىپ كەلە جاتقانىن جەتكىزدى.
«1991-2010 جىلدار ارالىعىندا ەلىمىزدىڭ وڭتۇستىك وڭىرىندەگى اۋداندىق ءماسليحاتتاردا بىردە-ءبىر ايەل دەپۋتات بولعان جوق. كەيىن, 2010-2022 جىلدارى ۇلتتىق كوميسسيا بارلىق دەڭگەيدەگى ءماسليحاتتاردا ايەل دەپۋتاتتاردىڭ بولۋىن باقىلاۋعا الدى. ماسەلەن, 2010 جىلى ماسليحاتتارداعى ايەل دەپۋتاتتاردىڭ ۇلەسى نەبارى 10 پايىزدى قۇراسا, 2022 جىلى بۇل كورسەتكىش 30 پايىزعا جەتتى. بۇۇ-نىڭ 2021-2022 جىلدارداعى دەرەگىنە سايكەس ەرلەر مەن ايەلدەر اراسىنداعى دامۋ يندەكسى بويىنشا رەسۋرسى وتە جوعارى ەلدەردىڭ قاتارىندا تۇرمىز. بۇل – ساياسي كوشباسشىلىققا قاجەت ەڭ باستى رەسۋرس. ءبىلىمدى, اقىلدى قىز-كەلىنشەكتەر – ەل تىرەگى», دەدى ول.
جيىن باسىندا كونستيتۋتسيالىق سوت توراعاسى ەلۆيرا ءازىموۆا, دەنساۋلىق ساقتاۋ ءمينيسترى اجار عينيات, ءماجىلىس دەپۋتاتى ايگۇل قۇسپان, جامبىل وبلىسى تاراز قالالىق ءماسليحاتىنىڭ دەپۋتاتى, «Tomiris» جوباسىنىڭ بىلتىرعى قاتىسۋشىلارى ايگەرىم داۋلەتباەۆا مەن وكسانا ەرجانوۆا ءسوز الىپ, پارتيا تاراپىنان اتقارىلىپ جاتقان جوبانىڭ ماڭىزى جايىندا وي-پىكىرلەرىمەن ءبولىستى.