مەملەكەت باسشىسى قاسىم-جومارت توقاەۆ قورعانىس مينيسترلىگىنە ءبىلىم بەرۋ جەڭىلدىكتەرىن ۇسىنۋ ارقىلى ازاماتتاردى مەرزىمدى اسكەري قىزمەتكە ىنتالاندىرۋ جانە ارميانىڭ بەدەلىن ارتتىرۋ جونىندە تاپسىرما بەرگەن بولاتىن. عىلىم جانە جوعارى ءبىلىم مينيسترلىگىمەن بىرلەسكەن جوبا بيىل قولعا الىنىپ, كوكتەمدە مەرزىمدى اسكەري قىزمەتىن وتكەرىپ, زاپاسقا شىعارىلعان ازاماتتاردان جوعارى وقۋ ورىندارىنا ءتۇسۋ ءۇشىن قۇجاتتار قابىلداۋ جالعاسىپ جاتىر.
بۇل جوبانىڭ قانداي ارتىقشىلىقتارى بار؟ بىرىنشىدەن, مەرزىمدى اسكەري قىزمەتتەن وتكەن ساربازدار ەكى جىل ىشىندە ۇبت تاپسىرماي-اق جوعارى وقۋ ورنىنا اقىلى نەگىزدە وقۋعا تۇسە الادى. ال اسكەري دايىندىقتا جوعارى ناتيجە كورسەتكەن جاستار وقۋ ورنى ەسەبىنەن تەگىن ءبىلىم الۋ مۇمكىندىگىنە يە بولماق.
ەكىنشىدەن, اقىلى جانە تەگىن وقيتىن ساربازداردىڭ بارلىعى ءوزى تاڭداعان وقۋ ورنىنداعى اسكەري كافەدراعا ەمتيحانسىز قابىلدانىپ, تەگىن وقيدى. ۇشىنشىدەن, اسكەردەن كەلگەن جاستار قورعانىس مينيسترلىگىنىڭ اسكەري وقۋ ورىندارىنا ەمتيحانسىز قابىلدانادى. ول ءۇشىن قارۋلى كۇشتەردىڭ اسكەري بولىمدەرىندە ىرىكتەۋ جۇرگىزىلمەك.
بيىل ساربازدار ءۇشىن 1 500 ورىن بولىنگەن. قازىرگى كۇنگە دەيىن ازاماتتىق جوعارى وقۋ ورىندارىنا 2022 جىلعى كوكتەمدە اسكەرگە شاقىرىلعان 498 ساربازدان قۇجات كەلىپ تۇسكەن. ونىڭ 158-ءى جوو ەسەبىنەن تەگىن وقۋعا, 340-ى ەمتيحانسىز اقىلى نەگىزدە وقۋعا ارنالعان.
ساربازداردىڭ ىرىكتەلۋىن ىڭعايلى جانە اشىق جۇرگىزۋ ماقساتىندا قورعانىس مينيسترلىگىندە قارۋلى كۇشتەردىڭ, ۇلتتىق ۇلاننىڭ, توتەنشە جاعدايلار مينيسترلىگىنىڭ, مەملەكەتتىك كۇزەت قىزمەتىنىڭ جۇزدەن استام اسكەري ءبولىمى تىركەلگەن «سروچنيكي 2.0» تسيفرلىق پلاتفورماسى جۇمىس ىستەيدى. تسيفرلىق بازادا بارلىق جاۋىنگەردىڭ قىزمەت اتقارۋ كەزىندەگى باعالارى كورسەتىلگەن. جۇيە اۆتوماتتى تۇردە ساربازداردىڭ رەيتينگىن وزدەرىنىڭ قورىتىندى باعالارى بويىنشا قۇرىپ, ولاردى جوعارى وقۋ ورىندارىنا بولەدى.
ازاماتتىق جوعارى وقۋ ورىندارىنا ءتۇسۋ ءۇشىن قۇجات قابىلداۋ 25 تامىزعا دەيىن جالعاسادى. ال قورعانىس مينيسترلىگىنىڭ اسكەري جوعارى وقۋ ورىندارىنا قۇجات قابىلداۋ 26 تامىزعا دەيىن ۇزارتىلدى. وسى ورايدا اسكەري ماماندىقتى يگەرۋدى قالايتىن جاستارعا ەلىمىزدىڭ اسكەري جوعارى وقۋ ورىندارىندا قانداي ءبىلىم بەرىلەتىنى جانە نەنى ۇيرەنەتىنى جايىندا قىسقاشا ايتىپ كەتكەن ءجون.
قۇرلىق اسكەرلەرىنىڭ اسكەري ينستيتۋتىندا اسكەري ىستەگى مەنەدجمەنت باعىتى بويىنشا موتواتقىشتار, تانك, دەسانتتىق-شابۋىلداۋ, بارلاۋ, زىمىران اسكەرلەرى مەن ارتيللەريا كومانديرلەرى دايىندالادى. لوگيستيكا باعىتى بويىنشا كۋرسانتتار ماتەريالدىق-تەحنيكالىق, تىلدىق, ازىق-ت ۇلىك, زاتتاي قامتاماسىز ەتۋ جانە زىمىران-ارتيللەريالىق قارۋ-جاراق ماماندىقتارىن مەڭگەرىپ شىعادى. سونداي-اق «اسكەري ءىستى ينجەنەرلىك قامتاماسىز ەتۋ», «رحب-اسكەري ىستەگى قورعاۋ», «اسكەري ۇجىمداعى الەۋمەتتىك جانە يدەولوگيالىق جۇمىس» باعىتتارى بويىنشا وقىتىلادى.
راديوەلەكترونيكا جانە بايلانىس اسكەري-ينجەنەرلىك ينستيتۋتىندا راديوناۆيگاتسيا, راديوتەحنيكا جانە ينجينيرينگ, اۆتوماتتاندىرۋ جانە ينفوكوممۋنيكاتسيالىق تەحنولوگيالار, اقپاراتتىق قاۋىپسىزدىك جانە كيبەرقاۋىپسىزدىك جۇيەلەرى بويىنشا ماماندار دايارلاۋ جۇزەگە اسىرىلادى.
كەڭەس وداعىنىڭ ەكى مارتە باتىرى تالعات بيگەلدينوۆ اتىنداعى اۋە قورعانىسى كۇشتەرىنىڭ اسكەري ينستيتۋتى «اۋە كەمەلەرىن ۇشۋ ارقىلى پايدالانۋ», «اۆياتسيالىق تەحنيكا جانە تەحنولوگيالار» باعىتى بويىنشا ماماندار دايارلايدى. سونداي-اق مارات وسپانوۆ اتىنداعى باتىس قازاقستان مەملەكەتتىك مەديتسينا ۋنيۆەرسيتەتىنىڭ بازاسىندا اسكەري دارىگەرلەردى دايارلاۋ جۇزەگە اسىرىلادى.
اسكەري وقۋ ورنىن بىتىرگەننەن كەيىن تۇلەكتەر جوعارى ءبىلىم تۋرالى ديپلوممەن قوسا, «لەيتەنانت» العاشقى اسكەري شەنىن دە الىپ شىعاتىنىن ايتا كەتكەن ءجون.