مادەنيەت جانە سپورت ءمينيسترى اسحات ورالوۆ ۆيتسە-مينيسترلەردىڭ, كوميتەت توراعالارىنىڭ جانە باعىنىشتى مەكەمە باسشىلارىنىڭ قاتىسۋىمەن اپپارات كەڭەسىن وتكىزدى. القالى جيىندا كورەرمەننىڭ سۇرانىسىنا يە كاسسالىق فيلمدەردى مەملەكەتتىك تىلدە دۋبلياجداۋ ماسەلەسى تالقىلاندى.
«جىل باسىنان بەرى ەلىمىزدە بىرنەشە ءىرى كينوپرەمەرا ءوتتى. ولاردىڭ كەيبىرى قازاق تىلىندە دۋبلياجدىڭ بولماۋىنا بايلانىستى كورەرمەننىڭ نازارىنان تىس قالدى. حالىقتىڭ پىكىرىن باقىلاپ وتىرمىز. كاسسالىق فيلمدەر اۋديتورياعا مەملەكەتتىك تىلدە قولجەتىمدى بولۋى كەرەك. مىسالى, بىلتىر مادەنيەت جانە سپورت مينيسترلىگىنىڭ قولداۋىمەن حالىقتىڭ قىزىعۋشىلىعىن تۋدىرعان 3 كينوپرەمەرا قازاق تىلىندەگى دۋبلياجبەن شىقتى. بيىل مادەنيەت سالاسىن دامىتۋدىڭ 7 جىلدىق تۇجىرىمداماسىن ازىرلەپ, ۇكىمەت قاۋلىسىمەن بەكىتتىك. ەندى جىل سايىن كەم دەگەندە 15 كينوپرەمەراعا قازاق تىلىندە دۋبلياج جاسالۋى كەرەك دەگەن مىندەت قويدىق», دەدى ا.ورالوۆ.
ايتا كەتەيىك, مادەنيەت جانە سپورت ءمينيسترى ناۋرىز ايىندا مەملەكەتتىك تىلگە دۋبلياج جاساۋ ءۇشىن فيلمدەردى ىرىكتەۋ ەرەجەسىن بەكىتتى. مينيسترلىك الداعى بىرنەشە جىلدا جالپى پروكاتتاعى قازاق تىلىندەگى فيلمدەردىڭ ۇلەسىن 30%-عا دەيىن جەتكىزۋگە نيەتتى. بۇل كورسەتكىش كاسسالىق شەتەلدىك فيلمدەرگە مەملەكەتتىك تىلدە دۋبلياج جاساۋ ارقىلى دا ارتۋعا ءتيىس.
«تاعى ءبىر وزەكتى ماسەلە – قازاقشا دۋبلياجبەن شىعاتىن كارتينالار سەانسى ءاردايىم كورەرمەنگە ىڭعايلى ۋاقىتتا قويىلا بەرمەيدى. بۇل تۋرالى دا الەۋمەتتىك جەلىلەردە ءجيى جازىلادى. ءفيلمدى مەملەكەتتىك تىلدە كورگىسى كەلەتىندەر كوبىنەسە تۇندە بارۋعا ءماجبۇر. بۇل, ارينە, دۇرىس ەمەس. ءبىز كينوتەاترلاردىڭ جەكەمەنشىك كاسىپ نىسانى ەكەنىن تۇسىنەمىز. دەگەنمەن دە مەملەكەتتىك تۇرعىدان ءبىز دۇنيەجۇزى كورەتىن كينوپرەمەرالاردىڭ قازاق تىلىندە جانە ىڭعايلى ۋاقىتتا كورسەتىلۋىن قامتاماسىز ەتۋگە مىندەتتىمىز. سوندىقتان جەكە كاسىپكەرلەرمەن, كينوتەاترلاردىڭ يەلەرىمەن وسى باعىتتاعى جۇمىستى جانداندىرۋىمىز قاجەت», دەدى مادەنيەت جانە سپورت ءمينيسترى اسحات ورالوۆ.