استانادا سپورت كۇنىنە وراي دەنەشىنىقتىرۋ سالاسى قىزمەتكەرلەرى اراسىندا بۇقارالىق ۆەلوشەرۋ ۇيىمداستىرىلدى.
سپورت سالاسى قىزمەتكەرلەرى تاڭعى ساعات جەتىدەن ەلوردا ىرگەسىندەگى قوسشى قالاسىنىڭ اينالما ۆەلوجولىنا جينالدى. ۆەلوشەرۋگە 300-دەن اسا ادام قاتىستى. ەڭسەرىلۋگە ءتيىس قاشىقتىق – 25 كم.
ولارمەن بىرگە استانا قالالىق اكىمدىگىنىڭ, مادەنيەت جانە سپورت مينيسترلىگىنىڭ لاۋازىمدى تۇلعالارى, ەلىمىزگە تانىمال سپورتشىلار, قالالىق سپورت باسقارماسىنا قاراستى مەكەمە باسشىلارى, سپورت ارداگەرلەرى «ۇركەر» ەلدى مەكەنىنىڭ «جاسىل بەلدەۋ» ساياباعىنا دەيىن جالعاسقان قاشىقتىقتى ءجۇرىپ ءوتتى.
ايتا كەتەيىك, ءىس-شارا بارىسىندا سپورت سالاسىنىڭ قىزمەتكەرلەرىنە مادەنيەت جانە سپورت ءمينيسترى اسحات ورالوۆتىڭ, قالا اكىمىنىڭ ورىنباسارى ەسەت بايكەننىڭ العىسحاتتارى, «ۇزدىك سپورت قىزمەتكەرى», «سپورتتى دامىتۋعا قوسقان ۇلەسى ءۇشىن» توسبەلگىلەرى تابىستالدى.
سونداي-اق بيىل ماۋسىم ايىندا گرۋزيانىڭ باتۋمي قالاسىندا شاحماتتان وتكەن الەم چەمپيوناتىندا توپ جارىپ, 12 جاسقا دەيىنگىلەر اراسىندا الەم چەمپيونى اتانعان ايارۋ التىنبەككە ۆەلوسيپەد سىيعا تارتىلدى.