زاڭسىز يەمدەنىلگەن اكتيۆتەردى مەملەكەتكە قايتارۋ ۇدەرىسى باستالعاننان كەيىن جەمقورلاردان قايتارىلعان قاراجاتتى جيناقتايتىن ارنايى قور قۇرىلعان بولاتىن. وتكەن جىلدىڭ جەلتوقسان ايىنان بەرى قورعا 151,6 ميلليارد تەڭگە تۇسكەن.
ۇكىمەتتىڭ ءباسپاسوز قىزمەتى بەرگەن مالىمەتكە قاراعاندا, ءاۋ باستا كوزدەلگەندەي بۇل قاراجات ەلىمىزدەگى الەۋمەتتىك نىسانداردى سالۋعا, سونىڭ ىشىندە مەكتەپتەر قۇرىلىسىنا جۇمسالىپ جاتىر. اتاپ ايتقاندا, استانا, الماتى, شىمكەنت قالالارىندا 76 مىڭ ورىنعا شاقتالعان (ەكى اۋىسىمدىق) 62 مەكتەپ قۇرىلىسى قارجىلاندىرىلدى.
مەملەكەت باسشىسىنىڭ تاپسىرماسىنا سايكەس قازىناعا قايتارىلعان قاراجات مەكتەپتەردى, قوسالقى عيماراتتاردى جانە ينتەرناتتاردى سالۋ جانە قايتا جاڭعىرتۋ ارقىلى ءۇش اۋىسىمدىق مەكتەپتەر مەن اپاتتى وقۋ ورىندارىنىڭ ماسەلەلەرىن شەشۋگە جانە جالپى ءبىلىم بەرۋ مەكەمەلەرىندەگى ورىن تاپشىلىعىن جويۋعا باعىتتالادى.