پويىزعا بيلەتتى «كۇتۋ پاراعىنان» الاسىز

حالقىمىزدىڭ باسىم كوپشى­لى­گى جولعا شىقسا, نەگىزىنەن پويىز­دا جۇرگەندى قولاي كورەدى. ويت­كەنى ول, بىرىنشىدەن, جولاۋشى تاسى­مالىنىڭ باسقا كولىكتەرىنە قارا­عاندا الدەقايدا قاۋىپسىز, ەكىن­شى­دەن قىزمەت اقىسى قا­زاق­ستان حالقىنىڭ 90 پايىزىن قۇ­راي­تىن قاراتابان قاراپايىم جۇرتقا قول­جە­تىمدى. دەسەك تە جىلدىڭ باسقا ماۋسىمىنان الابوتەن جاز مەزگىلى تۋعاندا وتاندىق پويىزعا بيلەت الۋ دەگەن قيامەت-قايىم ەكەنىن ەل كۇندە ايتادى. بىرەر اي بۇرىن ال­ماساڭ, ارزان بيلەت از كۇندە بال­پاناقتاي بولىپ, باعا ءوسىپ كەتەتىنى تاعى بار.

ەندى ەل مۇقتاجىنا ءمان قوي­عان «جولاۋشىلار تاسىمالى» اكتسيونەرلىك قوعامى جاڭا ءبىر قىزمەت ءتۇرىن ۇسىنىپتى. بۇگىنگى جولاۋشى جۇرتتىڭ قولايىنا جاققان الاقاي جاڭالىق سول – «كۇتۋ پاراعى» سەرۆيسى.

«جولاۋشىلار تاسىمالى» اق جازعا قاراي كۇرت ارتاتىن جولاۋشى نوپىرىنە الدىن الا قام جاساپ, قوسىمشا ۆاگوندار شىعارىپ, ونلاين-بيلەت ساتىلىمى مەن ەلەكتروندى بيلەت كاسسالارى, تاعىسىن تاعى سەرۆيستىك قىزمەتتەردى جىل سايىن ارتتىرىپ كەلەدى. دەسە دە بيلەت تاپشىلىعىن ەشقاشان جويا العان ەمەس. ەسەسىنە كەيىنگى ۋاقىتتا ىسكە قوسىلعان «كۇتۋ پا­را­عى» سەرۆيستىك قىزمەتىنىڭ تا­نى­مالدىعى ارتىپ, ونى پايدالاناتىندار قاتارى سوڭعى كەزدە كۇرت ارتىپتى.

Bilet.railways.kz سايتىنداعى وسى سەرۆيستىك قىزمەت ارقىلى ەلىمىزدە بيىل العاشقى جار­تى­جىلدىقتا 70 مىڭعا جۋىق ادام بيلەت الىپتى. مەجەلى جەرگە بيلەت بولماعان جاعدايدا وسى سايتتاعى «كۇتۋ پاراعى» قىز­مەتى ارقىلى جونەلتىلۋىنە 7 كۇن مەرزىمى بار پويىزعا بيلەتكە كەزەككە تۇرۋعا بولادى. ول ءۇشىن اتالعان سايتتا ءار ادام ءوزىنىڭ جەكە كابينەتىن اشىپ, «كۇتۋ پاراعى» تەتىگىن باسادى. سوسىن وزىنە قاجەتتى باعداردى جانە جەكە دەرەكتەرىن تولتىرىپ, ءوتىنىم جىبەرەدى. جەكە دەرەكتەرىنىڭ ىشىندە تەلەفون ءنومىرى مىندەتتى تۇردە كورسەتىلۋى كەرەك. سەبەبى ورىندار بوساعان جاعدايدا جۇيە ءوزى سول تەلەفون نومىرىنە حابارلاما جىبەرەدى. ول حابارلامادا ءوتىنىم ءنومىرى مەن قورعانىش كودى جازىلادى. سول سانداردى جەكە كابينەتكە كىرىپ, «كۇتۋ پا­را­عى تاريحى» دەگەن جەردى باسۋ ارقىلى بيلەت ورنىن برونداي وتىرىپ ەنگىزەدى. ودان ءارى بيلەت قايتا ەركىن ساۋدا اينالىمىنا ءتۇسىپ, كەرى كەتىپ قالماس ءۇشىن 1-1,5 ساعاتتىڭ ىشىندە بيلەتتى ونلاين تۇردە جىلدام ساتىپ الۋ كەرەك. كەلگەن بوس ورىن بويىنشا بيلەتتى اتالعان مەرزىم ىشىندە كاسساعا بارىپ تا الۋعا بولادى.

«وسى جاز ەڭبەك دەمالىسىندا باس­قا قالاعا ساياحاتتاۋ بارىسىندا بيلەت ىز­دەپ تاپپاي, بىردەن وسى قىزمەتكە جۇگىن­دىم. وسىلايشا, بارۋ بيلەتىمدى جولعا شىعۋىما 3-4 كۇن قالعاندا تاپسام, قايتۋ بيلەتىمدى پويىزعا وتىرۋعا ءبىر كۇن قالعان­دا الدىم. ەكەۋىندە دە سمس حابارلاما تەلەفون نو­مى­رىمە 12-24 ساعاتتىڭ ىشىندە كەلدى. وسىلايشا, بۇل قىزمەتتىڭ تيىمدىلىگىنە كوز جەتكىزىپ, ونى قالاي پايدالانۋ كەرەكتىگى تۋرالى بەينەجازبا ءتۇسىرىپ, ونى الەۋ­مەت­تىك جەلىگە سالدىم. كوپ ادام­دار وسى بەينەجازباداعى مەنىڭ نۇسقاۋلىعىم ارقىلى بيلەت العا­نىن ايتىپ, العىس ءبىلدىرىپ جاتتى. بۇل جەردە عالامتور ءتىلىن تەرەڭ ءبىلۋ­دىڭ دە اسا قاجەتى جوق. سەرۆيس وڭاي جولمەن بيلەت الۋعا مۇمكىندىك بەرە­تىندەي ويلاستىرىلعان», دەيدى جو­لاۋشىنىڭ ءبىرى رايحان راحمەتوۆا.

ەندەشە جولعا شىعاردا پويىز­عا بيلەت تاپپاساڭىز, بوسقا قا­مىقپاي, «كۇتۋ پاراعىنا» تەزىرەك تىر­كەلۋ جولىن تابىڭىز.