بيىل زاڭسىز قارۋ ساقتاعان 390 ادام قىلمىستىق جاۋاپكەرشىلىككە تارتىلدى. ال 818 ازامات اكىمشىلىك جاۋاپكەرشىلىك ارقالاعان. بۇل تۋرالى ىشكى ىستەر مينيسترلىگى اكىمشىلىك پوليتسيا كوميتەتى قارۋ اينالىمىن باقىلاۋ باسقارماسىنىڭ باستىعى اسىلبەك ىدىرىسوۆ مالىمدەدى.
ازاماتتاردىڭ زاڭسىز ساقتالعان قارۋ-جاراقتى ەرىكتى تۇردە تاپسىرۋ ءتارتىبى ىشكى ىستەر ءمينيسترىنىڭ 2015 جىلعى 27 ناۋرىزداعى № 266 بۇيرىعىمەن بەكىتىلگەن قاعيداعا سايكەس جۇرگىزىلەدى. قۇجات نەگىزىندە قۇقىق بۇزۋشىلىق ارەكەتى جوق ازامات زاڭسىز ساقتالعان قارۋ-جاراقتى ەرىكتى تۇردە تاپسىرسا, قىلمىستىق جانە اكىمشىلىك جاۋاپكەرشىلىكتەن بوساتىلادى.
– قارۋدى ساتىپ الۋ بويىنشا جىل سايىن وتكىزىلەتىن اكتسيا ىشكى ىستەر مينيسترلىگىنىڭ قوعامدىق قاۋىپسىزدىكتى قامتاماسىز ەتۋ بويىنشا قابىلداپ جاتقان جالعىز ءىس-شارا ەمەس ەكەنىن اتاپ وتكەن ءجون. ماسەلەن, تۇراقتى نەگىزدە «قارۋ», «قۇقىقتىق ءتارتىپ» جانە تاعى دا باسقا وڭىرلىك جانە رەسپۋبليكالىق جەدەل-الدىن الۋ ءىس-شارالارى جۇرگىزىلەدى. ولاردىڭ اياسىندا زاڭسىز اينالىمنان قارۋ مەن وق-دارىلەر الىنادى. وسىنداي ءىس-شارالار ناتيجەسىندە 1,3 مىڭنان اسا اتىس قارۋى تاركىلەندى, – دەدى ول.
جالپى, 2012 جىلدان باستاپ جىل سايىن وتكىزىلىپ كەلە جاتقان زاڭسىز ساقتالعان قارۋ-جاراقتاردى ساتىپ الۋ اكتسياسى بارىسىندا سومماسى 1,9 ملرد تەڭگە بولاتىن 56 مىڭنان اسا اتىس قارۋى جانە 2 ملن اسا ويىق قارۋدىڭ وق-دارىلەرى ەرىكتى تۇردە تاپسىرىلعان. ءارى جوعارىدا اتالعان بۇيرىققا سايكەس, ءوز ەركىمەن وتكىزگەندەرگە قارۋدىڭ تۇرلەرىنە بايلانىستى وتەماقى تولەنەدى.
– قارۋدى وتەماقىعا تاپسىرعانى ءۇشىن تولەنەتىن تولەمدەر مولشەرى ولاردىڭ تۇرىنە, تەحنيكالىق كۇي-جايىنا بايلانىستى ءار قارۋ ءۇشىن 34 مىڭنان 345 مىڭعا دەيىنگى ارالىقتا بولادى. سىياقى كولەمىن ءار وبلىستىق, قالالىق جانە اۋداندىق پوليتسيا ورگاندارىندا قۇرىلاتىن كوميسسيالار بەلگىلەيدى. كريميناليست ماماننىڭ قورىتىندىسى نەگىزىندە اتىس قارۋى, وق-ءدارى نەمەسە جارىلعىش زات رەتىندە تانىلماعان, ءىىم بازاسىندا «تىركەلگەن قارۋ» جانە «كريمينالدىق قارۋ» ەسەبىندە تۇرعان قارۋ-جاراقتارعا, قولدان جاسالعان, سونداي-اق تەگىس ۇڭعىلى, گازدى جانە جاراقات سالاتىن وق-دارىلەرگە سىياقى تولەنبەيدى. 2023 جىلى حالىقتان زاڭسىز ساقتالعان قارۋ-جاراقتاردى ساتىپ الۋ اكتسياسى 10 ساۋىردە باستالدى. اكتسيانى وتكىزۋگە رەسپۋبليكالىق بيۋدجەتتەن 88 ملن تەڭگەدەن اسا قاراجات ءبولىندى. بۇگىندە پوليتسياعا ەرىكتى تۇردە جالپى سومماسى 84 ملن بولاتىن 1 181 قارۋ, 18 مىڭنان اسا وق-ءدارى تاپسىرىلدى. تالداۋ كورسەتكەندەي, قارۋدىڭ ەڭ كوپ تاپسىرىلعانى تۇركىستان وبلىسىندا – 187, جامبىل وبلىسىندا – 134, قىزىلوردا وبلىسىندا – 94, اباي, اقمولا, اقتوبە, شىعىس قازاقستان, قاراعاندى جانە پاۆلودار وبلىستارىندا – 60-تان اسا, – دەدى اسىلبەك ىدىرىسوۆ.
جالپى, پوليتسيا دەپارتامەنتتەرى الدىن الا ۇسىنعان مالىمەتتەرگە سايكەس, استانا, الماتى, شىمكەنت قالالارىندا, اقمولا, اقتوبە, الماتى, اتىراۋ, قاراعاندى, قوستاناي, ماڭعىستاۋ, سولتۇستىك قازاقستان, جەتىسۋ جانە ۇلىتاۋ وبلىستارىندا بولىنگەن قاراجاتتىڭ يگەرىلۋىنە بايلانىستى اكتسيا توقتاتىلعان.