اتىراۋ وبلىستىق تاريحي-ولكەتانۋ مۋزەيىندە قۇندى جادىگەر كوپ. كونە جادىگەرلەر توپتاماسىنىڭ ىشىندە XIX-XX عاسىرلاردا قولدانىلعان اعاش جانە تەرى ىدىستار, ات ابزەلدەرىنىڭ جيىنتىعى بار.
جۇرتشىلىقتى قازاقتىڭ ۇلى اقىنى اباي قۇنانباي ۇلىنىڭ تۇتىنعان بۇيىمدارى ەرەكشە قىزىقتىرادى. قازىر مۋزەي قورىندا اقىننىڭ ءۇش ىشەكتى دومبىراسى مەن توعىزقۇمالاق تاقتاسىنىڭ كوشىرمەسى تۇر. توعىزقۇمالاق تاقتاسىن سالاتىن دورباسى دا بار. دوربا بىلعارىدان تىگىلىپتى.
ءۇش ىشەكتى دومبىرانىڭ ءبىراز ەرەكشەلىگى بار. ۇلتتىق اسپاپتىڭ شاناعى بالقاراعايدان سوپاقشا ەتىپ جاسالىپتى. شىرشا اعاشىنان جاسالعان بەت قاقپاعىندا ءۇش تەسىگى بار. جالپاق مويىنىنىڭ ولشەمى – 75ح12 سم. ءۇش ىشەكتىڭ بۇراۋىن كەلتىرەتىن ءۇش قۇلاعى بار.
ال توعىزقۇمالاق تاقتاسى ءۇش بولەك تاقتايدى ءبىر-بىرىنە جالعاۋ ارقىلى جاسالعان. ەكى جاعىنداعى تاقتايدىڭ ارقايسىسىندا 9 وتاۋ بار. ورتاڭعى بولىگىندەگى تاقتايدا سوپاقشا پىشىندە يرەكتەلگەن گۇل ءتارىزدى ەكى قازان ويىلعان. تاقتايدىڭ بەتى قوڭىر, ەكى قازاننىڭ ءبىرى كوك, ەكىنشىسى قىزعىلت قوڭىر تۇسپەن بويالعان. وتاۋلارعا اق, كوك, قوڭىر سەكىلدى بىرنەشە ءتۇستى بوياۋ جاعىلعان.
«اباي مۇراسىن ۇرپاقتان-ۇرپاققا ناسيحاتتاۋ ماقساتىندا «جيدەباي-ءبورىلى» مەملەكەتتىك قورىق مۋزەيىمەن جاسالعان كەلىسىم بار. 2020 جىلى اقىننىڭ ءوزى تۇتىنعان ءۇش ىشەكتى دومبىراسى مەن توعىزقۇمالاق تاقتاسىنىڭ كوشىرمەسى جاسالىپ, عىلىمي قورعا الىنعان ەدى. ءۇش ىشەكتى دومبىرانىڭ قوڭىر ءۇنى قۇلاققا جاعىمدى ەستىلەدى. بۇل دومبىرانى كەزىندە ابايدىڭ ءوزى دە, ۇلى اقىلباي دا ءجيى تارتقان. قازاقتىڭ ۇلتتىق ويىنى – توعىزقۇمالاقتى شاكىرتتەرىمەن بىرگە, ەكى-ءۇش كۇنگە دەيىن وينايتىن بولعان. ويىندى جاقسى كورگەنى سونشا, قارسىلاسىن جەڭبەي تىنبايدى ەكەن», دەيدى مۋزەي قىزمەتكەرلەرى.
اتىراۋ وبلىسى