اباي كۇنى مەرەكەسى ۇلى اقىننىڭ تۋعان جەرىندە ءۇش كۇنگە ۇلاسقان ءتۇرلى مادەني ءىس-شارالارمەن ەل ەسىندە قالدى. سونىڭ ىشىندە شوقتىعى بيىگى اباي وبلىستىق اكىمدىگىنىڭ, دەنەشىنىقتىرۋ جانە سپورت باسقارماسى مەن ءاليحان بوكەيحان جانە شاكارىم ۋنيۆەرسيتەتتەرىنىڭ, ءتۇرلى دەڭگەيدەگى دەمەۋشى كومپانيالار مەن كاسىپكەرلەردىڭ قولداۋىمەن, «El sport» قوعامدىق بىرلەستىگىنىڭ ۇيىمداستىرۋىمەن ەلىمىزدە تۇڭعىش رەت وتكىزىلگەن ۋلترامارافون بولدى. عالىم ءارى تانىمال مارافونشى رامازان سالىقجانوۆتىڭ جەتەكشىلىگىمەن جۇزەگە اسقان ۋلترامارافونعا ەلىمىزدەن جانە شەت مەملەكەتتەردەن بارلىعى 16 سپورتشى قاتىسىپ, «سەمەي-جيدەباي-100 ميل» (160 كم) جانە «سەمەي-ءبورىلى-50 ميل» (80 كم) قاشىقتىقتا باق سىنادى.
«ABAI» حالىقارالىق اۋەجايىنىڭ الدىنان 9 تامىز كۇنى باستاۋ العان مارافون 10 تامىز – اباي كۇنىندە جيدەبايداعى اقىن كەسەنەسى جانىندا اياقتالدى. قالاي دەسەك تە 160 شاقىرىمعا جۇگىرۋگە ەكىنىڭ ءبىرى تاۋەكەل ەتە بەرمەيتىنى بەلگىلى. دەگەنمەن جىگەرىن جانىپ, نامىسىن تۋ ەتكەن ازامات نۇركەلدى امان ەسىمدى قانداسىمىز بۇل قاشىقتىقتى 15 ساعات 32 مينۋت 58 سەكۋندتا ارتقا تاستاپ, ۋلترامارافون چەمپيونى اتاندى. ول سونداي-اق جارىس دەمەۋشىلەرى تىككەن 500 مىڭ تەڭگە قارجىلاي سىياقىنى قانجىعاسىنا بايلادى.
ال 80 شاقىرىمعا مەجەلەنگەن «سەمەي-ءبورىلى» باعىتىن بەتكە العان مارافونشىلار اراسىنان استانالىق الەۋمەتتانۋشى عالىم, پروفەسسور اسقار جاڭابەرگەنوۆتىڭ باعى جاندى. ول بۇل قاشىقتىقتى 6 ساعات 23 مينۋت 24 سەكۋندتا جۇگىرىپ ءوتىپ, ۋلترامارافون چەمپيونى اتانىپ جانە 300 مىڭ تەڭگەگە يە بولدى.
ءاليحان بوكەيحان ۋنيۆەرسيتەتىنىڭ باسشىلىعى دا سپورتتىق ءىس-شاراعا قولداۋ كورسەتىپ, الدىڭعى ورىنداردان كورىنگەن مارافونشىلارعا 100 مىڭ تەڭگە كولەمىندە جۇلدە ۇسىندى. ونى ۋنيۆەرسيتەت پرورەكتورى ازامات ازات ۇلى تابىستادى. مارافون اياقتالعان سوڭ رامازان سالىقجانوۆتى اڭگىمەگە تارتتىق.
«جالپى, بۇل مارافوندى ۇيىمداستىرۋ يدەياسى «El sport» قوعامدىق بىرلەستىگىنىڭ تاراپىنان تۋىنداپ, ونىڭ جۇزەگە اسۋىنا اباي وبلىسىنىڭ اكىمى نۇرلان ۇرانحاەۆ, وبلىستىق سپورت جانە دەنەشىنىقتىرۋ باسقارماسىنىڭ باسشىسى ەرجان ابىلقاسىموۆ, وبلىستىق بۇقارالىق سپورتتىق شارالار وتكىزۋ ورتالىعىنىڭ ديرەكتورى نۇرلان راحىمباەۆ, وزگە دە ەل ازاماتتارى جان-جاقتى قولداۋ كورسەتكەنىن اتاپ وتكىم كەلەدى. مارافوندا جۇيرىكتەر لايىقتى ماراپاتتارعا يە بولدى. جالپى, وسىنداي مارافوندى ءتۇرلى سەريامەن جالعاستىرۋدى قولعا الىپ جاتىرمىز. «El sport» قوعامدىق بىرلەستىگىنىڭ قۇرامىنداعى ازاماتتاردى ايتا كەتكەنىم ءجون بولار. بىرلەستىكتە «سپورت جانە قوعام» ورتالىعىنىڭ باسشىسى مۇحتار ەسقاليەۆ, عىلىمي ساراپشىلار كوميسسياسىندا بەلگىلى عالىمدار جانە بىرنەشە سپورتتىق كلۋبتاردىڭ باسشىلارى بار. بۇل رەسپۋبليكالىق قوعامدىق بىرلەستىك بيىل مامىر ايىندا قۇرىلدى. ءارى قاراي سپورتتىق باعىتتاعى جۇمىستارىمىزدى جالعاستىرا بەرەتىن بولامىز», دەيدى «El sport» قوعامدىق بىرلەستىگىنىڭ باسشىسى رامازان ساتتار ۇلى.
اباي وبلىسى