الماتىلىق پەدياتر-مامان جاڭا تۋعان نارەستەلەر مەن كىشكەنتاي بالالاردىڭ ەستۋ قابىلەتىنىڭ بۇزىلۋىن دەر كەزىندە انىقتاۋ ءۇشىن, سونداي-اق مۇگەدەكتىككە اكەپ سوقتىراتىن اۋرۋدى ەرتەرەك ەمدەۋ-وڭالتۋ جانە الدىن الۋ ماقساتىندا اۋديولوگيالىق سكرينينگ جۇرگىزىلۋ قاجەت ەكەنىن ايتتى, دەپ حابارلايدى Egemen.kz.
№36 قالالىق ەمحانانىڭ پەدياتر دارىگەرى ءمولدىر دوسجاننىڭ ايتۋىنشا, بارلىق جاڭا تۋعان نارەستە مەن 6 جاسقا دەيىنگى بالا اۋديولوگيالىق سكرينينگتەن وتەدى.
«ەستۋ پاتولوگياسى بالانىڭ سويلەۋ مەن ءتىل دامۋىنىڭ كەشىگۋىنە, الەۋمەتتىك, ەموتسيونالدىق جانە كوممۋنيكاتسيالىق داعدىلاردىڭ قالىپتاسۋىنىڭ بۇزىلۋىنا, كوگنيتيۆتى دامۋدىڭ كەشىگۋىنە جانە تومەندەۋىنە اكەلەدى. ەستۋ پاتولوگياسىنىڭ تەرىس اسەرىنىڭ اۋىرلىعى ەستۋ قابىلەتىنىڭ بۇزىلۋىنىڭ ءتۇرى مەن دارەجەسىنە, ەستۋ قابىلەتى جوعالۋىنىڭ باستالۋ جاسىنا قاراي ءارتۇرلى بولۋى مۇمكىن. ەستۋ قابىلەتى ناشار بالالاردى ەستۋ ورتاسىنا بىرىكتىرۋدىڭ ساتتىلىگى كوبىنەسە ەستۋ قابىلەتىنىڭ جوعالۋى قانشالىقتى ەرتە انىقتالعانىنا بايلانىستى. ەگەر تۇزەتىلمەگەن ەستۋ قابىلەتىنىڭ جوعالۋى ءتىلدى مەڭگەرۋدىڭ ماڭىزدى كەزەڭىندە ورىن السا, وندا بالالار قابىلداۋ جانە ەكسپرەسسيۆتى سويلەۋدىڭ تەرەڭ بۇزىلۋىن, ورەسكەل دامۋ كەشىگۋلەرىن باستان وتكەرۋى مۇمكىن. ەستۋ قابىلەتىنىڭ بۇزىلۋىن دەر كەزىندە دياگنوستيكالاۋ جانە كومەك كورسەتۋ باعدارلاماسىن باستاۋ ەستۋ قابىلەتىنىڭ جوعالۋىنىڭ جاعىمسىز سالدارىن بارىنشا ازايتۋدىڭ قاجەتتى شارتى بولىپ سانالادى», دەدى مامان.
پەدياتردىڭ ايتۋىنشا, ەستۋ قابىلەتى بۇزىلعان بالالاردىڭ شامامەن جارتىسىندا ەستۋ قابىلەتىنىڭ جوعالۋى مەن كەرەڭدىكتىڭ دامۋى ءۇشىن ايقىن قاۋىپ فاكتورى جوق.
ەستۋ قابىلەتىنىڭ جوعالۋى اتا-انا مەن مامانداردىڭ نازارىن اۋدارماستان, بىرتە-بىرتە ورىن الۋى دا مۇمكىن. سوندىقتان بۇل فاكتور نەوناتالدى كەزەڭنەن باستاپ بالالاردى جاپپاي تەكسەرۋ قاجەتتىلىگىن ايقىندايدى.
جاڭا تۋعان نارەستەگە ارنالعان اۋديولوگيالىق سكرينينگتىڭ ءبىرىنشى كەزەڭى دۇنيەگە كەلگەن نارەستە ءومىرىنىڭ العاشقى 24-72 ساعاتىندا جۇزەگە اسىرىلادى. اۋديولوگيالىق سكرينينگتىڭ ەكىنشى كەزەڭى ەمحانانىڭ بالالاردى دامىتۋ كابينەتىندە 3 اي, 1 جاس, 2 جاس, 3 جاس, 6 جاستا جۇرگىزىلەدى.
«ەمحانا قىزمەتكەرلەرى تىركەلگەن تۇرعىندارعا اۋديولوگيالىق سكرينينگ قاجەت ەكەنىن ۇنەمى حابارلايدى. زەرتتەۋ كەزىندە جەدەل رەسپيراتورلىق جانە جۇقپالى اۋرۋدىڭ بولماۋى مىندەتتى شارت بولىپ تابىلادى. ەستۋ قابىلەتىنىڭ بۇزىلۋى انىقتالعان جاعدايدا بالانى ودان ءارى تەرەڭدەتىلگەن تەكسەرۋگە سۋردولوگيالىق كابينەتكە, تەرەڭدەتىلگەن پەداگوگيكالىق تەكسەرۋدەن وتۋگە جانە تۇزەتۋ ءارى دامىتا وقىتۋ ماسەلەلەرىن شەشۋ ءۇشىن پسيحولوگيالىق-مەديتسينالىق-پەداگوگيكالىق كونسۋلتاتسياعا جىبەرەدى», دەپ تۇيىندەيدى ءمولدىر دوسجان.