تەننيستەن ايەلدەر اراسىنداعى ەلىمىزدىڭ ەكىنشى, الەمنىڭ 61-راكەتكاسى يۋليا پۋتينتسەۆا كانادانىڭ مونرەال قالاسىنداعى WTA 1000 ءتۋرنيرىنىڭ ءبىرىنشى اينالىمىندا جەڭىسكە جەتتى.
وسى جارىستىڭ ىرىكتەۋ كەزەڭىنەن وتە الماسا دا, ۇيىمداستىرۋشىلار تاراپىنان ارنايى شاقىرتۋ العان جەرلەسىمىز «مىڭدىق» ءتۋرنيردىڭ العاشقى اينالىمىندا الەمدىك رەيتينگتە 53-ورىندا تۇرعان امەريكالىق بەرنارد پەرامەن كەزدەستى. ەكى سەتكە جالعاسقان ماتچتا جەرلەسىمىز قارسىلاسىن اسا قيىندىقسىز 6:3, 6:4 ەسەبىمەن تىزە بۇكتىرىپ, باسەكەنىڭ ەكىنشى اينالىمىنا ءوتتى.
كەشە كەشكىسىن وتكەن ەكىنشى اينالىمدا پۋتينتسەۆا قازىرگى تاڭدا الەمنىڭ ءۇشىنشى راكەتكاسى اتانعان تاعى ءبىر امەريكالىق تەننيسشى دجەسسيكا پەگۋلامەن شەبەرلىك بايقاستى. سونداي-اق كەشە ەلىمىزدىڭ ۇزدىك تەننيسشىسى ەلەنا رىباكينا دا وسى جارىستاعى العاشقى ويىنىن وتكىزدى. ءبىر كۇن بۇرىن وتۋگە ءتيىس بولعان ەلەنا مەن امەريكالىق دجەننيفەر برەدي اراسىنداعى ماتچ جاڭبىرعا بايلانىستى كەيىنگە شەگەرىلدى. ويىن توقتاتىلعانعا دەيىنگى ەسەپ – 6:6, تاي-برەيكتە امەريكالىق تەننيسشى 4:2 ەسەبىمەن الدا تۇرعان بولاتىن.