ەل فۋتبولىندا جانكۇيەرلەردىڭ سىن ساداعىنا ەڭ كوپ ىلىگەتىندەردىڭ الدىڭعى لەگىندە فۋتبولشىلار تۇرسا, ودان كەيىنگى سىنالاتىنداردىڭ قاتارىندا تورەشىلەردىڭ بار ەكەنى بەلگىلى. وسى رەتتە قازاقستان فۋتبول فەدەراتسياسى تورەشىلىك قىزمەتىنىڭ ساپاسى مەن تورەشىلەردىڭ كوماندالىق جۇمىسىنىڭ تيىمدىلىگىن ارتتىرۋعا باعىتتالعان جاڭا باستامانى ۇسىنىپ وتىر.
ەندى فۋتبولدان OLIMPBET-قازاقستان چەمپيوناتىنىڭ الداعى تۋرلارىنان باستاپ كاسىبيلىك پەن ادىلدىكتىڭ جاڭا ستاندارتتارىن ايقىندايتىن تورەشىلەرگە ارنالعان بونۋس جۇيەسى بويىنشا سىياقى تولەۋ باعدارلاماسى ەنگىزىلەدى.
بۇل باعدارلامانىڭ نەگىزگى ماقساتى – الاڭدا قابىلدانعان شەشىمدەردىڭ ادىلدىگى مەن دالدىگىن قامتاماسىز ەتە وتىرىپ, تورەشىلەر توبىنىڭ نەگىزگى كورسەتكىشتەرىن جاقسارتۋ. باعالاۋ جۇيەسى تورەشىلەر توبىنىڭ دۇرىس شەشىم قابىلداۋىنىڭ ءبىرتۇتاس تەتىگىن قالىپتاستىرۋعا كومەكتەسەدى.
قازاقستان فۋتبول فەدەراتسياسىنىڭ ءباسپاسوز قىزمەتى تاراتقان مالىمەتكە سۇيەنسەك, بونۋس جۇيەسى بويىنشا سىياقى تولەۋ باعدارلاماسى ءار تورەشىنىڭ ويىنداردا تۇراقتى تۇردە الىپ جۇرگەن باعالاۋ كورسەتكىشتەرىن تولىقتىرادى. بۇل جاڭاشىلدىق ارقىلى تورەشىلەر قىزمەتىنىڭ جوعارى ستاندارتتارى بەلگىلەنىپ, ءارى قاراي ول اشىق ىنتالاندىرۋ جۇيەسى ارقىلى رەتتەلەدى.
جوبا تورەشىلەردىڭ كاسىبي وسۋىنە جاڭا پەرسپەكتيۆالار اشادى جانە ولاردى كوماندالىق جۇمىستا جوعارى كورسەتكىشتەرگە قول جەتكىزۋگە ىنتالاندىرادى. قازاقستان فۋتبول فەدەراتسياسى بۇل باستامانىڭ فۋتبول تورەشىلىگىن ودان ءارى دامىتىپ, چەمپيوناتتاعى ويىنداردىڭ ساپاسىن ارتتىرۋدا ماڭىزدى ءرول اتقاراتىنىنا سەنىمدى.