قىتايدىڭ چەندۋ قالاسىندا ءوتىپ جاتقان دۇنيەجۇزىلىك جازعى ۋنيۆەرسيادادا ءجۇزۋ سپورتىنان سىنعا تۇسكەن ادىلبەك مۋسين قولا جۇلدە جەڭىپ الدى.
جۋىردا عانا جاپونيانىڭ فۋكۋوكا قالاسىندا وتكەن سۋ سپورتى تۇرلەرىنەن الەم چەمپيوناتىندا باتتەرفلياي ادىسىمەن 100 مەترگە جۇزۋدە جارتىلاي فينالعا دەيىن جەتىپ, ەل رەكوردىن جاڭارتقان (51,68 سەكۋند) وتانداسىمىز جازعى ۋنيۆەرسيادادا ءوز ناتيجەسىن جاقسارتا الماسا دا, جۇلدەگەرلەر قاتارىنان كورىندى.
سەگىز سپورتشى قاتىسقان فينالدىق سايىستا جەرلەسىمىز اتالعان قاشىقتىقتى 52,03 سەكۋندتا باعىندىرىپ, قولا جۇلدەنى يەلەندى. ءبىرىنشى جانە ەكىنشى ورىندار پولشالىق سپورتشىلارعا بۇيىردى. ىرىكتەۋ كەزەڭىندە ادىلبەك مۋسين 52,34 سەكۋند كورسەتكىشىمەن فينالعا جولداما العان بولاتىن. سونىمەن قاتار بيىكتىككە سەكىرۋ بويىنشا باق سىناعان نادەجدا دۋبوۆيتسكايا مەن كريستينا وۆچيننيكوۆا ىرىكتەۋدە ءساتتى ونەر كورسەتكەنىمەن, فينالدا جولدارى بولمادى.
جالپىكوماندالىق ەسەپتە ەلىمىزدىڭ سپورتشىلارى 20 مەدالمەن (2 التىن, 7 كۇمىس جانە 11 قولا) 20-ورىندا كەلەدى. جازعى ۋنيۆەرسيادا بۇگىن مارەسىنە جەتەدى.