وتكەن اپتادا كونفەرەنتسيا ليگاسىنىڭ ەكىنشى ىرىكتەۋ كەزەڭىندە ونەر كورسەتكەن ەلىمىزدىڭ ءۇش كومانداسى قارىمتا كەزدەسۋلەرىن وتكىزىپ, وكىنىشكە قاراي, شىمكەنتتىڭ «ورداباسى» كلۋبى جارىس جولىنان شىعىپ قالدى. ال «اقتوبە» مەن قوستانايدىڭ «توبىلى» ءوز الاڭدارىنداعى جاۋاپتى ماتچتا جەڭىلىپ قالسا دا, ەكى ويىننىڭ ناتيجەسى بويىنشا ەۋروكۋبوك جارىسىنىڭ ءۇشىنشى اينالىمىنا جولداما الدى.
تاڭداندىرعان «توبىل»
ەۋروكۋبوك ويىندارىنىڭ ەكىنشى ىرىكتەۋ كەزەڭىنە جەرەبە تارتىلعاندا, فۋتبول ماماندارى «توبىل» مەن «بازەل» اراسىنداعى جۇپتا شۆەيتساريالىق ۇجىمنىڭ كەلەسى كەزەڭگە وتەرىنە كۇماندارى بولماعان. ويتكەنى «توبىلعا» قاراعاندا «بازەلدىڭ» قانداي دەڭگەيدەگى كوماندا ەكەنىن فۋتبول ساراپشىلارىن بىلاي قويعاندا, قاراپايىم جانكۇيەر دە جاقسى بىلەدى. 129 جىلدىق تاريحى بار «بازەل» كلۋبى شۆەيتساريا چەمپيوناتىندا 20 مارتە توپ جارىپ, 13 رەت شۆەيتساريا كۋبوگىن يەلەنگەن. ودان بولەك, ەۋروپا چەمپيوندارى كۋبوگىنىڭ شيرەك فينالىنا, ەۋروپا ليگاسى مەن كونفەرەنتسيا ليگاسىنىڭ جارتىلاي فينالىنا دەيىن جەتكەن.
قوستانايدىڭ «توبىلى» ەۋروپانىڭ وسىنداي داڭقتى كلۋبىنا قارسى جاسىل الاڭعا شىقسا دا, سىرت الاڭداعى ءبىرىنشى ويىندا سەنساتسيا جاساپ, الاڭ يەلەرىن ءوز جەرىندە 3:1 ەسەبىمەن تىزە بۇكتىرە الدى. جەرلەستەرىمىزدىڭ قارىمتا ماتچ الدىندا قارسىلاستارىنان باقانداي ەكى دوپ باسىمدىعى بولسا دا, تاجىريبە ءوز ءسوزىن ايتتى. «ورتالىق» ستاديونداعى ويىندا «بازەل» فۋتبولشىلارى جارتى ساعاتتىڭ ىشىندە ەكى گول سوعىپ, «توبىل» ويىنشىلارىن قيىن جاعدايعا سالىپ قويدى. ابىروي بولعاندا, ۇزىلىسكە دەيىن سەرج دەبلە پەنالتيدى ءساتتى ورىنداپ, سونىڭ ارقاسىندا قوستانايلىقتاردى كەلەسى كەزەڭگە الىپ شىقتى – 1:2.
وسىلايشا, ەكى ويىننىڭ قورىتىندىسى بويىنشا «توبىل» «بازەلدى» جارىس جولىنان ىعىستىرعاننان كەيىن شەتەلدىك باسىلىمدار جەرلەستەرىمىزدىڭ جەڭىسىنە تاڭدانىستارىن ءبىلدىرىپ جاتىر. ماسەلەن, فۋتبول ترانسلياتسيالارىن جۇرگىزەتىن امەريكالىق CBS Sports Golazo ستريمينگتىك سەرۆيسى ءوزىنىڭ Twitter ارناسىندا «توبىلدىڭ» جەڭىسىنە ارنايى پوست ارنادى. «بىلتىرعى كونفەرەنتسيا ليگاسىنىڭ جارتىلاي ءفيناليسى «بازەل» ءدال وسى ءتۋرنيردىڭ بيىلعى ىرىكتەۋ كەزەڭىندە قازاقستاننىڭ «توبىل» كومانداسىنان 4:3 ەسەبىمەن جەڭىلىپ, جارىستى ەكىنشى كەزەڭنەن اياقتاۋعا ءماجبۇر بولدى», دەپ جازادى.
ال ۋكراينانىڭ Ua-football.com باسىلىمى «توبىلدىڭ» كەلەسى كەزەڭگە شىعۋىن سەنساتسيا دەپ باعالادى. «مىنە, سىزدەرگە سەنساتسيا! كەرەمەت! بىلتىرعى جارىستىڭ جارتىلاي ءفيناليسى بيىل توپتىق كەزەڭگە دە جەتە المادى. «بازەل» كەلەسى كەزەڭگە شىعۋ مۇمكىندىگىنەن ءبىر اپتا بۇرىن ءوز الاڭىنداعى جەڭىلىسىنەن كەيىن-اق ايىرىلعان ەدى», دەپ جازادى ۋكراينالىق باسىلىم.
ەندى قوستانايلىق ۇجىم ءتۋرنيردىڭ ءۇشىنشى اينالىمىندا سولتۇستىك يرلانديانىڭ «دەرري سيتي» كومانداسىمەن كەزدەسەدى. ءبىرىنشى ويىن 10 تامىزدا قوستانايدا, قارىمتا كەزدەسۋ 17 تامىز كۇنى سولتۇستىك يرلانديادا وتەدى.
جولى بولعان «اقتوبە»
بيىلعى ەۋروكۋبوك ويىندارىنا قاتىسىپ جاتقان ءتورت كوماندامىزدىڭ ىشىندە ەڭ جەڭىل قارسىلاس «اقتوبەگە» تۇسسە دە, بىلتىرعى ەل بىرىنشىلىگىنىڭ كۇمىس جۇلدەگەرلەرى ءوز الاڭىندا وتكەن قارىمتا ماتچتا گرۋزيانىڭ «تورپەدوسىنان» جەڭىلىپ قالدى – 1:2. دەگەنمەن «اق-قىزىلدار» دا «توبىل» سياقتى كەلەسى كەزەڭنىڭ ماسەلەسىن سىرت الاڭداعى ويىندا شەشىپ قويعان سوڭ (4:1), ءوز جەرىندەگى جەڭىلىس جالپى ەسەپتەگى جاعدايعا اسا قاتتى اسەر ەتە قويعان جوق – 5:3.
جالپى, «اقتوبەنىڭ» جاۋاپتى ماتچتاعى ويىنىنا قاتىستى ماماندار تاراپىنان دا, جانكۇيەرلەر تاراپىنان دا سۇراق كوپ. ويتكەنى گرۋزيانىڭ «تورپەدو» كلۋبى وزگە ءۇش كوماندامىزدىڭ قارسىلاستارى سياقتى ەۋروپا جاسىل الاڭدارىندا اۋىز تولتىرىپ ايتارلىقتاي ەشقانداي ناتيجەسى جوق تومەن دەڭگەيدەگى كلۋبتىڭ ءبىرى بولاتىن. ەڭ كەيىنگى رەت ولار 2019-2020 جىلعى ەۋرودودا ويىندارىنا قاتىسىپ, بيىل عانا كونفەرەنتسيا ليگاسىندا ويناۋ مۇمكىندىگىنە يە بولعان ەدى. ءۇش جىل بۇرىن «تورپەدو» ەۋروپا ليگاسىنىڭ ءبىرىنشى كەزەڭىندە شىمكەنتتىڭ «ورداباسى» كلۋبىنان ەكى ويىندا 3:0 ەسەبىمەن جەڭىلىپ, جارىستان شىعىپ قالسا, بۇل جولى «اقتوبەدەن» ۇتىلدى.
اقتوبەدەگى ورتالىق ستاديوندا وتكەن قارىمتا كەزدەسۋدە الاڭ قوجايىندارىنىڭ فۋتبولشىلارى نەگە ەكەنى تۇسىنىكسىز, جانىن سالىپ ويناعان جوق. بالكىم, سىرت الاڭداعى ءىرى جەڭىستەن كەيىن «اقتوبە» ويىنشىلارى وزدەرىنىڭ شەبەرلىكتەرىنە شامادان تىس سەنىپ كەتكەن بولۋى كەرەك. سونىڭ سالدارىنان جاۋاپتى ماتچتا 1:2 ەسەبىمەن قارسىلاستارىنا جول بەردى. ءبىرىنشى تايمداعى ماكسيم سامورودوۆتىڭ گولى دا كوماندا ويىنشىلارىن بوساڭسىتىپ جىبەرگەن سياقتى.
ناتيجەسىندە «تورپەدو» فۋتبولشىلارى ەكىنشى تايمدا ۇيىمداسقان ويىن كورسەتىپ, «اقتوبە» قاقپاسىنا ەكى گول دارىتا الدى. كۋتايسي كومانداسىنىڭ ماتچ اياقتالعانعا دەيىن تارازى باسىن تەڭەستىرەتىندەي مۇمكىندىگى بولعان ەدى. الايدا كەزدەسۋدىڭ 77-مينۋتىندا قورعاۋشى نيكا ساندوحادزە ەكى مينۋتتا ەكى سارى قاعاز الىپ, كوماندالاستارىن قيىن جاعدايعا قالدىرىپ كەتتى. 10 ويىنشى بولىپ قالعان «تورپەدو» فۋتبولشىلارى اقىر سوڭىندا نە شابۋىلعا شىعارىن, نە قورعانىسقا كوڭىل بولەرىن بىلمەي, ابدەن ابدىراپ قالدى. «اقتوبە» ويىنشىلارى ماتچ سوڭىنا دەيىن ءبىر ادام كوپ بولىپ ويناسا دا, بۇل باسىمدىعىن جۇزەگە اسىرا المادى.
ەندى اندرەي كارپوۆيچ شاكىرتتەرى كونفەرەنتسيا ليگاسىنىڭ ءۇشىنشى اينالىمىندا رۋمىنيانىڭ «سەپسي» كومانداسىمەن كەزدەسەدى. 2011 جىلى ىرگەتاسى قالانعان «سەپسي» كلۋبى كەيىنگى ءۇش جىلدان بەرى ەۋروكۋبوك ويىندارىنا تۇراقتى قاتىسىپ كەلەدى. كونفەرەنتسيا ليگاسىنىڭ ەكىنشى كەزەڭىندە ولار بولگاريانىڭ داڭقتى تسسكا سوفيا كومانداسىمەن كەزدەسىپ, ەكى ويىننىڭ قورىتىندىسىندا قارسىلاستارىن 6:0 ەسەبىمەن تىزە بۇكتىردى.
«ورداباسىعا» وكپە جوق
قۇرامى جاعىنان دا, فۋتبولشىلاردىڭ دەڭگەيى جاعىنان دا كونفەرەنتسيا ليگاسىنىڭ توپتىق كەزەڭىندە ويناۋ قۇرمەتىنە لايىق بولعان كوماندامىزدىڭ ءبىرى «ورداباسى», وكىنىشكە قاراي, ەۋروكۋبوك جارىستارىنان شىعىپ قالدى. ء«ا» دەگەننەن جىل سايىنعى ەۋرودودا ويىندارىنىڭ قاتىسۋشىسى پولشانىڭ «لەگيا» كلۋبىنا تاپ كەلگەن شىمكەنتتىك ۇجىم ەكى ويىندا دا لايىقتى ونەر كورسەتىپ, مىنەزدى كوماندا ەكەنىن دالەلدەدى. شىمكەنتتە وتكەن العاشقى ويىنداعى تورەشىلەردىڭ قاتەلىگى بولماعاندا, «ورداباسى» كلۋبىنىڭ كەلەسى كەزەڭگە شىعۋى ابدەن مۇمكىن ەدى.
پولشاداعى قارىمتا باسەكەدە دە «ورداباسى» فۋتبولشىلارى ناشار وينادى دەپ ايتا المايمىز. راس, جەرلەستەرىمىز ءبىرىنشى تايمدا كوڭىلدەگىدەي ونەر كورسەتە الماعانىمەن, ەكىنشى تايم تولىعىمەن ءبىزدىڭ جىگىتتەردىڭ باسىمدىعىمەن ءوتتى.
ۇزىلىستەن كەيىن «ورداباسىنىڭ» شابۋىلشىسى ۆسەۆولود سادوۆسكي ەسەپتى قىسقارتقانىمەن, 71-مينۋتتا توماش پەكحارت «لەگيانىڭ» ءۇشىنشى گولىن سوعىپ, كومانداسىن كەلەسى كەزەڭگە الىپ شىقتى. ماتچتىڭ اياقتالۋىنا التى مينۋت قالعاندا سەرگەي مالىي ەسەپتى 3:2-گە جەتكىزگەنىمەن, «ورداباسى» فۋتبولشىلارىنا تارازى باسىن تەڭەستىرۋگە ۋاقىت جەتپەي قالدى.
«ورداباسى» – «لەگيا» اراسىنداعى ويىن تۋرالى ەل فۋتبولىنىڭ اڭىزى يۋسۋپ شاديەۆ پىكىر ءبىلدىرىپ, شىمكەنتتىك كوماندانىڭ كەلەسى كەزەڭگە شىعۋىنا تەك ساتتىلىك قانا جەتىسپەي قالعانىن ايتادى.
«ورداباسى» ەكى ماتچتا دا جاقسى وينادى. ءبىرىنشى كەزدەسۋدەگى تورەشىنىڭ قاتەلىگىن ايتپاعاننىڭ وزىندە, قارىمتا ويىندا دا شىمكەنتتىكتەردىڭ تازا گولىن ەسەپتەمەي قويدى. «لەگيانىڭ» ءۇش گول سوعۋىنا دا «ورداباسىنىڭ» قورعاۋشىلارى جول بەرىپ قويدى. بۇل ويىندا «ورداباسى» جەڭىلمەۋى كەرەك ەدى. بىراق «لەگيا» فۋتبولشىلارىنا دا قۇرمەتپەن قاراعانىمىز ءجون. ولار وزدەرىن جاقسى قىرىنان كورسەتە الدى. وكىنىشكە قاراي, «ورداباسىنىڭ» كەلەسى كەزەڭگە وتۋىنە قاراپايىم ساتتىلىك جەتىسپەي قالدى», دەيدى يۋسۋپ شاديەۆ.
ەندى ەۋروكۋبوك ويىندارىن ءتورت كوماندا بولىپ باستاعان جەرلەستەرىمىز جارىستى ءارى قاراي ءۇش ۇجىممەن جالعاستىرادى.