بيىل مادەنيەت جانە سپورت مينيسترلىگى تاراپىنان تۇڭعىش رەت جاريالانىپ وتىرعان جاس اقىندار مەن جازۋشىلارعا بەرىلەتىن ارناۋلى ادەبي سىيلىققا ءوتىنىم قابىلداۋ اياقتالدى. ادەبي سىيلىق 18-35 جاس ارالىعىنداعى قالامگەرلەرگە ارنالعان. بايقاۋعا بارلىعى 53 ۇمىتكەردىڭ قۇجاتى قابىلداندى. ولاردىڭ ىشىندە «بالالار ادەبيەتى» – 17, «دراماتۋرگيا» – 9, «پوەزيا – 13» جانە 14 قاتىسۋشى «پروزا» اتالىمدارى بويىنشا ءوتىنىم بەردى.
قازىرگى تاڭدا بارلىق شىعارمالار ساراپتامانىڭ ءبىرىنشى كەزەڭىندە, ياعني ادەبي سىيلىقتىڭ ساراپشىلار كوميسسياسىنا ۇسىنىلدى. ساراپشىلاردىڭ قاراۋىنا تۋىندىلار اۆتورى جاسىرىلىپ, شيفر بويىنشا تاراتىلدى.
ساراپتامانىڭ ەكىنشى كەزەڭى تامىز ايىنىڭ ەكىنشى جارتىسىنا جوسپارلانىپ وتىر. ادەبي سىيلىق نەگىزگى 4 اتالىم بويىنشا ۇزدىكتەردى انىقتايدى. ءار اتالىمدا جەڭىمپازعا 4 ملن تەڭگە سىياقى جانە «ارناۋلى ادەبي سىيلىقتىڭ لاۋرەاتى» اتاعى, ديپلوم جانە توسبەلگى بەرىلەدى.
جەڭىمپازداردى ماراپاتتاۋ جىل سوڭىنا جوسپارلانعان.
«جاس قالامگەرلەردىڭ شىعارماشىلىعىن قولداۋ, ىنتالاندىرۋ جانە ناسيحاتتاۋ اسا ماڭىزدى. تۇڭعىش رەت ۇيىمداستىرىلىپ وتىرعان سىيلىقتى ەلىمىزدىڭ رۋحاني ورتاسى جىلى قابىلدادى. سالىستىرمالى تۇرعىدا باسقا اتالىمدارعا قاراعاندا «بالالار ادەبيەتى» باعىتىنا كوبىرەك شىعارما تۇسكەنى نەگىزگى ماقساتتارىمىزدىڭ بىرىنە قول جەتكىزگەنىمىز دەۋگە بولادى. بۇگىن جاس قالامگەرلەرگە جاسالعان قولداۋ, ەرتەڭ ۇلكەن جازۋشىلاردىڭ قالىپتاسۋىنا سەپتىگىن تيگىزەتىنى انىق», دەدى مسم ارحيۆ, قۇجاتتاما جانە كىتاپ ءىسى كوميتەتى كىتاپ ءىسى باسقارماسىنىڭ باسشىسى الماز مىرزاحمەت.