وقۋ-اعارتۋ مينيسترلىگىنىڭ تاپسىرماسىمەن «جاقسىلىقتى جاسا» ۇرانىمەن 1 تامىزدا باستالعان رەسپۋبليكالىق «مەكتەپكە جول» اكتسياسى 30 قىركۇيەككە دەيىن جۇرگىزىلەدى, سول ورايدا جەتىسۋ وبلىستىق ءبىلىم باسقارماسىنىڭ مالىمدەۋىنشە وبلىستاعى 15 مىڭنان اسا بالاعا كومەك كورسەتۋ جوسپارلانۋدا, دەپ حابارلايدى Egemen.kz.
وبلىستىق ءبىلىم باسقارماسىنىڭ مالىمەتى بويىنشا, اكتسيا بارىسىندا 1 سىنىپقا قابىلدانعان وقۋشىلاردى, سونىمەن بىرگە تۇرمىسى قيىن وتباسىلاردىڭ بالالارىن جانە جاز مەزگىلىندە ەلىمىزدىڭ باسقا وڭىرلەرىنەن وبلىسقا كوشىپ كەلگەن الەۋمەتتىك كومەك الۋدى قاجەت ەتەتىن بالالاردى قامتۋ كوزدەلۋدە.
جەتىسۋ وبلىسى اكىمىنىڭ ءباسپاسوز قىزمەتىنىڭ جازۋىنشا, «مەكتەپكە جول» اكتسياسىن ۇيىمداستىرۋشى اۋداندىق, قالالىق ءبىلىم بولىمدەرى, مەكتەپتەر ءوز قالاسى مەن اۋداندارىنىڭ بارلىق ازاماتتارىنا, كاسىپكەرلەرگە, مەتسەناتتارعا اكتسياعا قوسىلۋ تۇرعىسىنداعى ۇسىنىستارىمەن جۇگىنۋدە. ايتا كەتەرلىگى وبلىستا بىرنەشە جىل قاتارىنان ءوز باستاماسىمەن كومەك كورسەتەتىن دەمەۋشىلەر بار.
اكتسيا ماقساتى—الەۋمەتتىك كاتەگورياداعى بالالارعا وقۋ جىلىنىڭ باستالۋىنا دايىندىق كەزىندە ماتەريالدىق قولداۋ كورسەتۋ. ال بالالاردىڭ مەكتەپكە كەلمەۋىنىڭ الدىن الۋ باعىتىندا ىشكى ىستەر ورگاندارىمەن بىرلەسىپ, بالالاردى تولىق وقۋمەن قامتۋ ماقساتىندا رەيدتەر ۇيىمداستىرۋ كوزدەلگەن.
سونىمەن بىرگە جالپىعا مىندەتتى ءبىلىم بەرۋ قورىنان مەكتەپ وقۋشىلارىن مەكتەپ فورماسىمەن قامتاماسىز ەتۋ جۇمىسى دا جۇرگىزىلۋدە.
وبلىس اكىمىنىڭ ءباسپاسوز قىزمەتىندە «بۇگىنگى كۇنى وبلىس بويىنشا 12118 وقۋشىنىڭ اتا-انالارىنىڭ كارتشوتتارىنا 491,6 ملن. تەڭگە (55,6%) قاراجات اۋدارىلدى. بۇل باعىتتاعى جۇمىس 10 تامىزعا دەيىن اياقتالادى», دەلىنگەن.