قوعامنىڭ بارلىق سالاسىن تسيفرلاندىرۋ – ەڭ الدىمەن, جۇمىستىڭ جەدەلدىگىن قامتاماسىز ەتىپ, قىزمەت كورسەتۋ ساپاسىن ارتتىرسا, ەكىنشى جاعىنان ادام فاكتورىنىڭ الدىن الادى. ناتيجەسىندە, سىبايلاس جەمقورلىق سەكىلدى جايسىز كورىنىستەردى بولدىرماۋعا سەپتىگىن تيگىزەدى. وسى ورايدا ۋاقىت تالابىنا وراي قورعانىس سالاسىندا دا بۇل ءۇردىس قارقىندى قولعا الىنىپ جاتىر.
قورعانىس ءمينيسترىنىڭ ورىنباسارى دارحان احمەديەۆتىڭ ايتۋىنشا, «Invisible Government», ياعني «كورىنبەيتىن مەملەكەت» جوباسى شەڭبەرىندە مينيسترلىك ەلىمىزدىڭ قارۋلى كۇشتەرىمەن بايلانىستى بارلىق قىزمەتتى پرواكتيۆتى تۇردە كورسەتىپ, ىسكە اسىرۋدى قولعا العان. سونىڭ ءبىر مىسالى – 18 جاسقا تولعان بوزبالالاردى ءداستۇرلى فورماتتا اسكەرگە شاقىرۋ توقتاتىلىپ, ەلىمىزدىڭ بارلىق وڭىرىندە شاقىرۋ ۋچاسكەلەرىندە تىركەۋ پرواكتيۆتى فورماتتا جۇرگىزىلمەك. ەل ۇكىمەتى قورعانىس مينيسترلىگىنىڭ بۇل باستاماسىن قولدادى.
– كەلەر جىلدىڭ 1 قاڭتارىنان باستاپ ەلىمىزدىڭ بارلىق وڭىرىندە تىركەۋ ناۋقانىن وتكىزۋ پرواكتيۆتى فورماتتا جۇزەگە اسىرىلاتىن بولادى. ەندى ازاماتتارىمىز مەديتسينالىق كۋالاندىرۋدان ءوتۋ, جەكە ىستەرگە قۇجاتتار جيناۋ ءۇشىن اسكەري كوميسسارياتقا ارنايى كەلىپ جۇرمەيدى. بۇل وقۋشىلاردىڭ ساباقتان قالماۋىنا مۇمكىندىك بەرەدى. سونىمەن قاتار جىل سايىن جەرگىلىكتى اتقارۋشى ورگاندار بولەتىن 1 ملرد تەڭگەدەن استام قاراجاتتى ۇنەمدەپ, شاقىرۋ ۋچاسكەلەرىنە تىركەلۋ تۋرالى كۋالىكتەردى الۋ قاجەتىن جويادى, – دەدى ول.
قورعانىس ءمينيسترىنىڭ ورىنباسارى ازاماتتاردى اسكەرگە شاقىرۋ تۋرالى SMS-حابارلامانىڭ زاڭدىلىعى جانە اسكەرگە شاقىرۋ ۋچاسكەسىنە كەلۋ قاجەتتىگى تۋرالى كەلىپ تۇسكەن سۇراقتارىنا بايلانىستى حابارلاما 1414 قىزمەتى ارقىلى جۇزەگە اسىرىلاتىنىن جانە ونىڭ قوسىمشا شارا ەكەنىن ايتادى.
بۇعان دەيىن كوتەرىلىپ كەلە جاتقان ماڭىزدى باستامالاردىڭ ءبىرى – مەرزىمدى اسكەري قىزمەتكە شاقىرىلعان ازاماتتارعا ۋاقىتشا نەسيەلىك دەمالىس بەرۋ ماسەلەسى. قورعانىس مينيسترلىگىنىڭ مالىمەتىنشە, بيىل اسكەري قىزمەتتىڭ بەدەلى مەن تارتىمدىلىعىن ارتتىرۋ ماقساتىندا قارجى نارىعىن رەتتەۋ جانە دامىتۋ اگەنتتىگىمەن بىرلەسىپ, مەرزىمدى اسكەري قىزمەتشىلەرگە بانكتىك قارىزدار مەن ميكرونەسيەلەر بويىنشا تولەمدەردى كەيىنگە قالدىرۋ ماسەلەسى ءوز شەشىمىن تاپقان. ناتيجەسىندە, مەرزىمدى اسكەري قىزمەتكە شاقىرىلعان 2 600-دان استام ازاماتتىڭ نەسيە بويىنشا تولەمدەرى كەيىنگە قالدىرىلدى.
– بۇل جوبا ۇزاق مەرزىمدىك سيپاتقا يە بولعاندىقتان, الداعى ۋاقىتتا ازاماتتىڭ ءوتىنىشىنسىز پرواكتيۆتى فورماتتا نەسيەلىك دەمالىس بەرۋ الگوريتمى ازىرلەندى. بۇل نەسيەلىك مىندەتتەمەلەر بويىنشا تولەمدەردى كەيىنگە شەگەرۋدى نەعۇرلىم جەدەل ۇسىنۋعا جانە مەرزىمدى اسكەري قىزمەتتەگى ازاماتتاردى 100% قامتۋعا مۇمكىندىك بەرەدى, – دەدى قورعانىس ءمينيسترىنىڭ ورىنباسارى دارحان احمەديەۆ. ونىڭ ايتۋىنشا, بۇل الگوريتم قازىرگى كۇنى دامۋ ساتىسىندا.
مينيسترلىك وكىلى ازاماتتاردى كەلىسىمشارت نەگىزىندە اسكەري قىزمەتكە قابىلداۋ بويىنشا «Jauynger.kz» سەرۆيسى سىناقتان ءوتىپ جاتقانىن ايتتى. قىزمەتتەگى «اشىقتىقتى» جانە «قولجەتىمدىلىكتى» قامتاماسىز ەتۋ, سونداي-اق سىبايلاس جەمقورلىق تاۋەكەلدەرىن بارىنشا ازايتۋ ءۇشىن ازىرلەنگەن سەرۆيستىڭ ارتىقشىلىعى – اقپاراتتىق جۇيەلەرمەن ءوزارا ينتەگراتسيالىق ءىس-قيمىلدىڭ ارقاسىندا ۆەدومستۆوىشىلىك جانە ۆەدومستۆوارالىق قۇجات اينالىمى اۆتوماتتاندىرىلماق. سول ارقىلى مەملەكەتتىك ورگانداردان ونلاين رەجىمدە شىنايى اقپارات الۋ اسكەري قىزمەتكە كىرۋ مەرزىمىن 3-4 ايدان 15-30 كۇنگە دەيىن قىسقارتادى. بۇل جاعدايدا ادام فاكتورى جانە ونىڭ شەشىم قابىلداۋعا اسەرى بولماسى انىق.
دەرەكتەر بازاسىن ينتەگراتسيالاۋ ەل ىشىندە تۇرعىلىقتى جەرىنىڭ وزگەرۋىنە بايلانىستى اسكەري كوميسسارياتقا كەلۋ قاجەتتىگىن جويادى. ۆەدومستۆو وكىلىنىڭ اقپاراتى بويىنشا ازاماتتاردى اسكەري ەسەپتەن شىعارۋ جانە قويۋ تىركەلگەن مەكەنجايى بويىنشا اۆتوماتتى تۇردە جۇزەگە اسىرىلادى.
– اسكەردە بولماعان ازاماتتارعا اسكەري بيلەت الۋ قاجەتتىگى بولمايدى. بۇل شارا سىبايلاس جەمقورلىق تاۋەكەلدەرىن ايتارلىقتاي تومەندەتىپ, بيۋدجەت قاراجاتىن ۇنەمدەيدى. مۇنداي جاڭاشىلدىقتار زاڭ تۇرعىسىنان بەكىتۋ ساتىسىندا تۇر, – دەدى ءمينيستردىڭ ورىنباسارى.
سوڭعى ۋاقىتتا كوپ كوتەرىلىپ جۇرگەن ماسەلەلەردىڭ تاعى ءبىرى – اسكەردەگى الىمجەتتىك جانە سۋيتسيد جاساۋ جاعدايلارى. وسىندا كەلەڭسىز وقيعالاردىڭ الدىن الۋ ءۇشىن قارۋلى كۇشتەردە «اق سۇڭقار» امبەباپ پسيحودياگنوستيكالىق كەشەنى قولدانىلا باستادى. ول پسيحولوگيالىق تۇراقسىزدىعى, سۋيتسيدكە بەيىمى بولۋى مۇمكىن ادامداردى ۋاقتىلى انىقتاۋعا ارنالعان. دياگنوستيكانىڭ 60-تان استام قۇرالى بار اتالعان كەشەن اۆتوماتتى رەجىمدە پسيحولوگيالىق زەرتتەۋ ناتيجەسىن بەرمەك.
– مەرزىمدى قىزمەت ساربازدارىنىڭ كۇندەلىكتى قىزمەتىن جالپى باقىلاۋ ءۇشىن قارۋلى كۇشتەر ورىندارىندا 50 مىڭعا جۋىق بەينەباقىلاۋ كامەراسى ورناتىلعان. بەينەاناليتيكانىڭ زاماناۋي تەحنولوگيالارى ماتەريالدىڭ اۋقىمدى كولەمىن وڭدەۋگە مۇمكىندىك بەرەدى. وسىعان بايلانىستى مينيسترلىك تاراپىنان بەينەاناليتيكا جۇيەسى ەنگىزىلىپ جاتىر. بۇل قۇقىق بۇزۋشىلىقتاردى, جارعىلىق ەمەس قاتىناستاردى ۋاقىتىندا توقتاتۋعا, ءوز-وزىنە قول جۇمساۋ ارەكەتتەرىن بولدىرماۋعا مۇمكىندىك بەرەدى. اتالعان جۇيە كامەرا ماتەريالدارىن تالدايدى جانە جوعارىدا ايتىلعانداي, وقيعالار انىقتالعان جاعدايدا جەدەل شارا قابىلدانادى, – دەيدى مينيستر ورىنباسارى دارحان احمەديەۆ.
بۇدان وزگە قورعانىس مينيسترلىگى egov پورتالىنداعى جەكە كابينەتكە ۇقساس «اسكەري قىزمەتشىنىڭ كابينەتى» ءمودۋلىن ازىرلەدى. بۇل – ناقتى ۋاقىت رەجىمىندە اسكەري قىزمەتشىگە قاتىستى مالىمەتتەردى كورۋگە, قاجەتتى انىقتامالار الۋعا جانە باياناتتار بەرۋگە مۇمكىندىك ۇسىنادى. بۇل قىزمەت ءتۇرى قاعاز قۇجات اينالىمىن ەداۋىر قىسقارتىپ, ارتىق بيۋروكراتيالىق راسىمدەردى بولدىرمايدى.