كورەيا مەديتسيناسى – جەتىسۋدا

وڭتۇستىك كورەيا ەلىنىڭ مەديتسيناسى الەمنىڭ ۇزدىك ەمدەۋ ورتالىقتارىنا جاتادى. سوندىقتان ءداستۇرلى تۇردە ءبىر توپ بىلىكتى دارىگەر جىلدا تالدىقورعانعا كەلىپ, ماماندارعا كەڭەس بەرەدى. بۇعان قوسا ءارتۇرلى وپەراتسيا جاساپ, سىر­قاتتاردىڭ جايىنا ۇڭىلەدى. الىس­تاعى تۇرعىنداردى قابىلداپ, ەم-دوم شاراسىن ۇيىمداستىرادى.

وبلىستىق دەنساۋلىق ساقتاۋ باس­قار­ماسىنىڭ مالىمەتىنشە, بۇل – حيوندە گوسپيتالى دارىگەرلەرىنىڭ جەتىسۋ وڭىرىنە وسىمەن ءتورتىنشى رەت كەلۋى. گوسپيتال ديرەكتورى كيم بۋ سوپ باستاعان ماماندار بەس كۇن ىشىندە مىڭنان اسا تۇرعىندى تەكسەرۋدەن وتكىزىپ, تراۆماتولوگيا مەن حيرۋرگيا باعىتىندا 33 وپەراتسيا جاسادى.

حيوندە گوسپيتالىنىڭ ديرەكتورى كيم بۋ سوپتىڭ ايتۋىنشا, ارنايى توپ قۇرامىندا گوسپيتالدىڭ جانە «چۋنگ-انگ» ۋنيۆەرسيتەتىنىڭ مەديتسينالىق ورتالىعىنىڭ نەيروحيرۋرگ, حيرۋرگ, تەراپەۆت, حيرۋرگ-تراۆماتولوگ جانە شۇعىل مەديتسينالىق كومەك كورسەتەتىن 50 شاقتى مامانى بار. ولار مۇنداي قايى­­رىمدىلىق اكتسياسىن جىلدا وتكى­زە­­تىنىن ايتادى.

«1930 جىلدارى قازاقستانعا جەر اۋدارىلىپ كەلگەن كورەي حالقىنا اشتىق كەزىندە قازاقتار ۇلكەن كومەك كورسەتتى. قازاقتارعا العىس ءبىلدىرۋ, ەكى ەل اراسىنداعى دوستىقتى نىعايتۋ ءۇشىن ءبىز جىل سايىن كەلىپ, دارىگەرلەرمەن تاجىريبە الماسىپ, تەگىن تەكسەرۋلەر مەن وپەراتسيالار جاسايمىز», دەدى گوس­پيتال ديرەكتورى.

ءوڭىر اكىمىنىڭ ءباسپاسوز قىزمەتىنىڭ مالىمەتىنە سۇيەنسەك, 2018 جىلى وبلىس اكىمدىگى, قازاقستان حالىقتارى اسسامبلەياسى جانە قازاقستانداعى كورەي حالقى قاۋىمداستىعى بىرلە­سىپ حيوندە گوسپيتالىمەن جەتىسۋ ءوڭىرىنىڭ تۇرعىندارىن جىل سايىن مەديتسينالىق تەگىن تەكسەرۋدەن وتكىزۋ تۋرالى مەموراندۋمعا قول قويعان ەدى. مەموراندۋمعا قول قويىلعان ساتتەن باستاپ شەتەلدىك ماماندار تىزە, جامباس جانە باسقا بۋىنداردى اۋىستىرۋ بويىنشا 50-دەن اسا وپەراتسيا جاسادى. سونىمەن قاتار حيوندە كلينيكاسىنىڭ ەسەبىنەن ەلىمىزدىڭ دارىگەرلەرى وڭتۇستىك كورەيادا ءبىلىم الىپ جاتىر.

تالدىقورعان قالالىق كوپسالالى اۋرۋحاناسىنىڭ ديرەكتورى اسقار سا­دىقوۆ كورەي ەلىنىڭ دارىگەرلەرى تراۆ­ما­تولوگيالىق, حيرۋرگيالىق وپەراتسيالار جاساۋمەن قاتار, تاجىريبە الما­سىپ, جاڭا ءدارى-دارمەكتەر مەن مەدي­تسينالىق جابدىقتاردى ەنگىزۋ تۋرا­لى اقپاراتپەن الماسىپ وتىراتىنىن ايتتى.

«2018 جىلدان باستاپ ءبىزدىڭ بىرقا­تار قىزمەتكەرىمىز جانە بىرنەشە اۋدان­دىق اۋرۋحانالاردىڭ ماماندارى حيوندە گوسپيتالىندە بىلىكتىلىكتى ارتتىرۋ كۋرس­تارىنا قاتىستى. 4 جىلدان بەرى ماماندار ەرىكتىلەرمەن, جەتەكشى پروفەسسورلارمەن جانە كلينيكانىڭ ديرەكتورىمەن بىرلەسىپ ءبىزدىڭ اۋرۋحاناعا كەلىپ, كونسۋلتاتسيالىق-دياگنوستيكالىق كو­­مەك كورسەتىپ كەلەدى. سونداي-اق بىر­قاتار حيرۋرگيا جانە تراۆماتولوگيا سالاسى بويىنشا وپەراتسيا جاسالدى», دەدى ا.سادىقوۆ.

وسى ساپار اياسىندا جەتىسۋ وبلى­سى­نىڭ اكىمدىگى مەن كورەيا رەسپۋب­ليكاسى حيوندە گوسپيتالى جانە «چۋنگ-انگ» ۋنيۆەرسيتەتىنىڭ مەديتسينالىق ورتالىعى حالىق دەنساۋلىعىن جاقسارتۋ, ەكى ەل اراسىنداعى ىنتىماقتاستىقتى نىعايتۋ ماقساتىندا مەموراندۋمعا قول قويدى. مەموراندۋم نەگىزىندە ەكى ەلدىڭ ماماندارى تراۆماتولوگيا, حيرۋرگيا جانە راديولوگيا سالالارى بويىنشا بىرلەسە جۇمىس اتقارادى.