قىرعىز رەسپۋبليكاسىنىڭ ىستىقكول وڭىرىندە ورتالىق ازياداعى تۇركىتىلدەس ەلدەردىڭ فۋتبول قاۋىمداستىقتارى باسشىلارىنىڭ بەيرەسمي جۇمىس كەزدەسۋى ءوتتى.
قاۋىمداستىقتار اراسىنداعى ىنتىماقتاستىقتى نىعايتۋ جانە بىرلەسكەن جوبالاردى جۇزەگە اسىرۋدىڭ نەگىزگى ماسەلەلەرىن تالقىلاۋعا باعىتتالعان باسقوسۋعا قازاقستان فۋتبول فەدەراتسياسىنىڭ پرەزيدەنتى ادىلەت بارمەنقۇلوۆ, قىرعىز فۋتبول وداعىنىڭ پرەزيدەنتى مەدەربەك سىدىقوۆ, تۇرىكمەنستان فۋتبول فەدەراتسياسىنىڭ پرەزيدەنتى ارسلان اينازاروۆ جانە وزبەكستان فۋتبول قاۋىمداستىعىنىڭ ءبىرىنشى ۆيتسە-پرەزيدەنتى راۆشان يرماتوۆتىڭ قاتىسۋىمەن ءوتتى.
كەزدەسۋدە تاراپتار ءار فۋتبول قاۋىمداستىعىنىڭ دامۋىنىڭ نەگىزگى فاكتورلارى سانالاتىن ينفراقۇرىلىمدى جاقسارتۋ, كادرلىق رەسۋرستاردى ۇلعايتۋ جانە جەتكىلىكتى قارجىلاندىرۋدى قامتاماسىز ەتۋ, سونداي-اق ءار قاۋىمداستىقتىڭ تابىستى بولۋى ءوزارا جەمىستى ىنتىماقتاستىقتىڭ كەپىلى ەكەنىن اتاپ ءوتتى.
سونىمەن قاتار تاراپتار فۋتبولشىلار مەن تورەشىلەردىڭ وقۋ-جاتتىعۋ جيىندارىن وتكىزۋگە قاجەتتى ينفراقۇرىلىمدى سالۋ بويىنشا ءوزارا ءتيىمدى جوبالاردى جۇزەگە اسىرۋ جونىندە پىكىر الماستى. كەزدەسۋگە قاتىسۋشىلار ءارتۇرلى حالىقارالىق تۋرنيرلەردى, ونىڭ ىشىندە ءار جاس ساناتىنداعى كوماندالار اراسىنداعى الەم بىرىنشىلىكتەرىن, سونداي-اق فۋتبولدان الەم چەمپيوناتىن بىرلەسىپ ۇيىمداستىرۋدىڭ شارتتارى مەن ەرەجەلەرىنىڭ تالاپتارىن تالقىلادى.
جيىنعا قاتىسۋشىلار ءبىر-بىرىنە تۇراقتى اقپارات پەن تاجىريبە الماسۋدى قامتيتىن جان-جاقتى قولداۋ كورسەتۋدى جالعاستىرۋعا نيەتتى ەكەنىن جەتكىزدى. كەزدەسۋ بارىسىندا بىرلەستىكتەردىڭ بارلىق جەتەكشىلەرى ىنتىماقتاستىقتى جاڭا دەڭگەيگە كوتەرۋگە دايىن ەكەندىكتەرىن ءبىلدىردى.
كەزدەسۋ ناتيجەسى بويىنشا جۇمىس توبى قۇرىلىپ, سول ارقىلى فۋتبولدىڭ دامۋ ديناميكاسىن جاقسارتۋ بويىنشا جۇمىس باستالادى. ايتا كەتۋ كەرەك, فۋتبول قاۋىمداستىقتارىنىڭ ىنتىماقتاستىعى فۋتبولدى دامىتۋ ماسەلەلەرىندە مەملەكەتارالىق دەڭگەيدە قارىم-قاتىناستاردى ودان ءارى نىعايتۋعا ىقپال ەتۋگە ءتيىس.