قىتايدىڭ چەندۋ قالاسىندا ءوتىپ جاتقان ءحححى دۇنيەجۇزىلىك جازعى ۋنيۆەرسيادادا جەرلەستەرىمىز كەزەكتى جۇلدەلەرىمەن جانكۇيەرلەرىن قۋانتىپ جاتىر.
جارىستىڭ كەزەكتى كۇنىندە ەلىمىزدىڭ ستۋدەنت سپورتشىلارى تاعى ءتورت مەدال جەڭىپ الدى. اتاپ ايتار بولساق, ءۇش پوزيتسيادان 50 مەترگە مىلتىقپەن وق اتۋدا قۇرامىندا كونستانتين مالينوۆسكي, يسلام ساتباەۆ جانە نيكيتا شاحتورين بار ەلىمىزدىڭ ۇلتتىق قۇراماسى مەن جۋىردا عانا وق اتۋ سپورتىنان وڭتۇستىك كورەيادا مارەسىنە جەتكەن جاسوسپىرىمدەر اراسىنداعى الەم چەمپيوناتىندا توپ جارعان نيكيتا چيريۋكين ۋنيۆەرسيادانىڭ كۇمىس جۇلدەگەرى اتاندى.
سونداي-اق ون مەتردەن مىلتىقتان وق اتۋ بويىنشا كوماندالىق سايىستا كونستانتين مالينوۆسكي, يسلام ساتباەۆ جانە نيكيتا شاحتورين ءۇندىستان مەن قىتاي وكىلدەرىنە جول بەرىپ, ءۇشىنشى ناتيجە كورسەتتى. دزيۋدو باسەكەسىندە بەلدەسكەن اسقار نارقۇلوۆ تا ۇزدىكتەر قاتارىنان كورىنىپ, ەل قورجىنىنا كەزەكتى قولا جۇلدەنى سالدى. 73 كيلو سالماقتا بەلدەسكەن جەرلەسىمىز ءۇشىنشى ورىن ءۇشىن وتكەن بەلدەسۋدە قىرعىزستان وكىلى شىڭعىسجان ساعىناليەۆتەن باسىم ءتۇستى.
ەكىنشى جارىس كۇنىنىڭ قورىتىندىسى بويىنشا, جەرلەستەرىمىزدىڭ ەنشىسىندە 5 جۇلدە (2 كۇمىس, 3 قولا) بار.