باتىس قازاقستان وبلىسى, ءبورلى اۋدانى, اقبۇلاق اۋىلىندا كوكتەمگى سۋ تاسقىنىنان زارداپ شەككەن 6 وتباسىعا ءۇي بەرىلدى, دەپ حابارلايدى Egemen.kz.
اقبۇلاق اۋىلىندا مامىر ايىندا باستالعان قۇرىلىس جۇمىستارى اياقتالدى.
باسپانالى بولعانداردى قۇتتىقتاعان وبلىس اكىمى ناريمان تورەعاليەۆ مەملەكەت باسشىسىنىڭ كەز كەلگەن توتەنشە جاعداي كەزىندە زارداپ شەككەندەرگە ۋاقتىلى كومەك كورسەتۋگە ەرەكشە ءمان بەرىپ وتىرعانىن اتاپ ءوتتى.
«قيىن جاعدايعا قاراماستان, توزىمدىلىك تانىتا بىلگەن تۇرعىندارعا العىسىمدى ايتامىن. ۇيلەر قىسقا مەرزىمدە ءارى ساپالى سالىندى. بۇل, ارينە, قۋانتادى.», دەدى وبلىس اكىمى.
قيىن كەزدە قول ۇشىن سوزعان اكىمدىككە ءوز كەزەگىندە باسپانالى بولعاندار ريزاشىلىقتارىن ايتتى.
ايتا كەتەلىك, كەلەسى ايدىڭ ورتاسىنا تامان ءبورلى اۋدانىنىڭ 3 اۋىلىندا تاعى 10 ءۇيدىڭ قۇرىلىسى اياقتالماق.
ءبورلى اۋدانى اكىمدىگىنىڭ مالىمەتىنشە, 175 ءوتىنىش بويىنشا م ۇلىكتەر باعالانىپ, قورىتىندى شىعارىلعان. سونداي-اق «Amanat» پارتياسى «اقجايىق» قورى ارقىلى زارداپ شەككەن 93 ادامعا 41 ملن تەڭگە بولگەن, ال «قىزىل جارتى اي» قوعامى 177 وتباسىنا 96 ملن تەڭگەنىڭ جاردەمىن بەرگەن. سونىمەن قاتار اۋدان اكىمدىگى تاراپىنان 31 ملن تەڭگە كولەمىندە ءبىر جولعى الەۋمەتتىك كومەك بەرىلگەن.