فۋتبولدان ۋەفا چەمپيوندار ليگاسىنىڭ ىرىكتەۋ كەزەڭىنە قاتىسىپ جاتقان ەلوردانىڭ «استاناسى» كەزەكتى ويىنىن سىرت الاڭدا وتكىزىپ, حورۆاتيانىڭ «دينامو زاگرەب» كومانداسىنان ءىرى ەسەپپەن جەڭىلىپ قالدى. ىرىكتەۋ ساتىسىنىڭ ەكىنشى اينالىمىنداعى العاشقى ماتچتا الاڭ قوجايىندارى ەل چەمپيوندارىنىڭ قاقپاسىنا جاۋاپسىز ءتورت گول سوقتى.
ەۋروكۋبوك ويىندارىندا «استانا» مەن «دينامو» كوماندالارىنىڭ جولى جاسىل الاڭدا وسىمەن ەكىنشى رەت ءتۇيىسىپ وتىر. العاش رەت ەكى ۇجىم وسىدان بەس جىل بۇرىن, ياعني 2018 جىلى چەمپيوندار ليگاسىنىڭ ءۇشىنشى كەزەڭىندە كەزدەسىپ, ەكى رەتىندە دە حورۆاتيالىق فۋتبولشىلار مىقتىلىق تانىتقان ەدى – 3:0 (1:0, 2:0). سول كەزدەگى «دينامونىڭ» قۇرامىن قازىرگىمەن سالىستىرعاندا الدەقايدا مىقتى بولسا دا, زاگرەب كلۋبى جەرلەستەرىمىزدىڭ قاقپاسىنا نەبارى ءۇش-اق گول سوعۋعا شامالارى جەتكەن-ءدى. قازىر دە «دينامو» فۋتبولشىلارىنىڭ دەڭگەيى ناشارلاپ كەتتى دەپ ايتا المايمىز, بىراق بەس جىل بۇرىنعى زاگرەبتىكتەر ەمەس ەكەنى انىق. سوعان قاراماستان, «دينامونىڭ» جاس فۋتبولشىلارى كەشەگى ويىندا «استانا» قاقپاسىنا ءتورت گول سالدى. الدا ءالى قارىمتا ويىن بار ەكەنىن ۇمىتپايىق.
وتاندىق فۋتبول جانكۇيەرلەرىنىڭ پىكىرى بويىنشا, كەشەگى ويىندا «استانانىڭ» جەڭىلىسىنە بىردەن-ءبىر سەبەپكەر – باس باپكەر گريگوري بابايان. ويتكەنى ماتچتان ءبىر كۇن بۇرىنعى ءباسپاسوز ءماسليحاتىنا قاتىسقان باس جاتتىقتىرۋشى بۇل كەزدەسۋدە دينامولىقتاردىڭ ايقىن فاۆوريت ەكەنىن ايتىپ, ولارعا ەكى ويىندا دا قارسىلىق كورسەتۋ مۇمكىن ەمەس ەكەنىن اشىق مويىنداعان-دى. ءتىپتى كوماندانىڭ كوشباسشىسى سانالعان حورۆاتيالىق مارين توماسوۆ تا چەمپيوندار ليگاسىنىڭ ەكىنشى كەزەڭىنە دەيىن جەتۋ «استانا» ءۇشىن ۇلكەن مارتەبە ەكەنىن ايتىپ, تومەنگى ليگالاردىڭ بىرىندە ويناۋدى ماقسات تۇتىپ وتىرعاندارىن مالىمدەگەن-ءدى.
ء«بىز ءتبيليسيدىڭ «ديناموسىن» جەڭگەننەن كەيىن چەمپيوندار ليگاسىنداعى ءوز مىندەتىمىزدى ورىندادىق. ويتكەنى چەمپيوندار ليگاسىنىڭ توپتىق كەزەڭىنە شىعاتىنداي مۇمكىندىگىمىز جوق. سوندىقتان ەۋروپا ليگاسىنىڭ نەمەسە كونفەرەنتسيا ليگاسىنىڭ توپتىق كەزەڭىنىڭ بىرىندە ويناعىمىز كەلەدى», دەگەن بولاتىن م.توماسوۆ شەتەلدىك باسىلىمعا بەرگەن سۇحباتىندا.
باس باپكەردىڭ دە, كوماندا نەگىزگى ويىنشىسىنىڭ دا «دينامومەن» وتەتىن ويىن الدىنداعى وسىنداي كەرىتارتپا پىكىرىنەن كەيىن جانكۇيەرلەردىڭ «استانادان» بۇل ويىندا جەڭىس كۇتۋىنىڭ ءوزى دە ابەستىك بولار ەدى. ماتچ باستالماي جاتىپ «جەڭىلگەن» ەلوردالىقتار, باسەكە كەزىندە دە تۇك ىستەي المادى.
ماتچتى بەس قورعاۋشى, ءتورت جارتىلاي قورعاۋشى جانە ءبىر عانا شابۋىلشىمەن باستاعان «استانا» فۋتبولشىلارى الاڭ يەلەرىنىڭ قارقىنىنا تەك 35 مينۋت قانا شىداپ بەردى. جارتى ساعات بويى يوسيپ چوندريچ قاقپاسىنىڭ ماڭايىندا بىرنەشە مارتە قاۋىپتى شابۋىل ۇيىمداستىرعان «دينامو» فۋتبولشىلارى 36-مينۋتتا ءوز دەگەندەرىنە جەتتى. برۋنو پەتكوۆيچتىڭ ايىپ الاڭىنىڭ سىرتىنان تەپكەن دوبى جەرلەستەرىمىزدىڭ بىرىنە ءتيىپ, قاقپا تورىندا تۋلادى. ارادا بەس مينۋت وتكەندە لۋكا يۆانۋشەتس «استانا» قاقپاسىنا ءوز كومانداسىنىڭ ەكىنشى دوبىن ەنگىزىپ, ءۇزىلىس الدىندا «ديناموعا» ايقىن باسىمدىق سىيلادى. جەرگىلىكتى جانكۇيەرلەر يۆانۋشەتس گولىنا شاتتانىپ بولامىن دەگەنشە ءدال سول فۋتبولشى «استانا» قاقپاسىنا دۋبل جاساپ, ەسەپتى 3:0-گە جەتكىزدى. «استانا» فۋتبولشىلارى العاشقى تايمدا قارسىلاس قاقپاسىنا قاراي ءبىر رەت بولسىن ءدال سوققى جاساي الماي پۇشايمان بولدى.
ەكىنشى تايمدى دا «دينامو» ويىنشىلارى بەلسەندى باستادى. 56-مينۋتتا 24 جاستاعى شابۋىلشى يۆانۋشەتس الىستان ءدال سوققى جاساپ, كەزدەسۋدەگى ءۇشىنشى گولىن تويلادى. ءتورتىنشى گول قاقپاعا ەنگەن سوڭ «استانانىڭ» باس باپكەرى الاڭعا دۋشان يوۆانچيچ پەن ەلحان استانوۆتى شىعاردى. وسى فۋتبولشى ماتچقا ارالاسقاننان كەيىن «استانانىڭ» ويىنى جاندانىپ شىعا كەلدى. ناتيجەسىندە, 69-مينۋتتا بۇرىشتامادان كەيىن دۋشان يوۆانچيچ قاقپاعا جاتا-جاستانا جويقىن سوققى جاسادى. بىراق دوپ قاقپادان قيىس كەتتى. بۇل – «استانانىڭ» 90 مينۋت ىشىندە جاساعان ءتورت سوققىنىڭ ىشىندەگى ەڭ قاۋىپتىسى ەدى. ءسويتىپ, «استانا» مەن «دينامو» اراسىنداعى العاشقى ماتچ 4:0 ەسەبىمەن اياقتالدى.
ەندى قارىمتا كەزدەسۋ ءبىر اپتادان سوڭ, ياعني 2 تامىز كۇنى «استانا ارەنادا» وتەدى. ال بۇگىن «ورداباسى» مەن «اقتوبە» كوماندالارى كونفەرەنتسيا ليگاسىنداعى العاشقى ويىندارىن وتكىزەدى. شىمكەنتتىك ۇجىم ءوز الاڭىندا پولشانىڭ «لەگيا» كلۋبىن قابىلداسا, «اقتوبە» سىرت الاڭدا گرۋزيانىڭ «تورپەدو كۋتايسي» كومانداسىمەن كەزدەسەدى. سونىمەن قاتار ءبىرىنشى كەزەڭنەن ءساتتى ءوتىپ, ەكىنشى كەزەڭگە شىققان «توبىل» شۆەيتساريادا «بازەلمەن» جاسىل الاڭدا جولىعادى.