كاراتەدەن قازاقستان قۇراماسى مالايزيادا وتكەن ازيا چەمپيوناتىندا 3 التىن, 4 كۇمىس جانە 4 قولا مەدال ولجالاپ, جالپىكوماندالىق ەسەپتە ءبىرىنشى ورىنعا يە بولدى.
وتانداستارىمىزدىڭ اراسىنان جەڭىس تۇعىرىنا ەرلەر اراسىنداعى پرەمەر-ليگا جارىستارىنىڭ جەڭىمپازى, يسلام ىنتىماقتاستىعى ويىندارىنىڭ چەمپيونى قايسار الپىسباي (60 كگ) جانە ازيا بىرىنشىلىگىنىڭ جەڭىمپازى مەن الەم چەمپيوناتىنىڭ ەكى دۇركىن قولا جۇلدەگەرى, توكيو وليمپياداسىنا قاتىسۋشى نۇرقانات اجىقانوۆ (75 كگ) كوتەرىلسە, قىزدار سايىسىندا ازيا چەمپيونى, توكيو وليمپياداسىنىڭ قولا جۇلدەگەرى سوفيا بەرۋلتسەۆا (68 كگ) توپ جاردى. سونىمەن قاتار ديدار ءامىرالى (67 كگ), ءمولدىر جاڭبىرباي (50 كگ), گۇلميرا ۇسەنوۆا (55 كگ) جانە «كۋميتە» بويىنشا ەرلەر كومانداسى كۇمىس مەدال جەڭىپ الدى.
ال جولامان بيعابىل (55 كگ), ليا قوشقارباەۆا («كاتا» جاتتىعۋى), دانيار يۋلداشەۆ (84 كگ) جانە ابىلاي ءتولتاي (84 كگ) ەل قورجىنىنا قولا جۇلدە سالدى. ايتا كەتەيىك, بيىلعى ازيا بىرىنشىلىگىنە سارى قۇرلىقتىڭ 31 ەلىنەن كەلگەن ەڭ تاڭداۋلى 400-دەن اسا كاراتە شەبەرى قاتىستى. ولاردىڭ اراسىندا ەل نامىسىن 19 سپورتشى قورعادى.