ونەر – ۇلتتىڭ جانى. ونى تۇسىنۋگە ءتىلدىڭ دە كەرەگى جوق. بۇگىندە دومبىراعا قىزىعىپ, كۇي تارتۋعا تالاپتى جاستاردىڭ سانى ارتىپ كەلەدى. سولاردىڭ ءبىرى – قۇرلىق اسكەرلەرى «استانا» وڭىرلىك قولباسشىلىعى اسكەرلەرىنىڭ 06708 اسكەري بولىمىندە وتان الدىنداعى بورىشىن وتەپ جۇرگەن مەرزىمدىك قىزمەت اسكەري قىزمەتشىسى, قاتارداعى جاۋىنگەر يسلام مۇسا.
دومبىرانىڭ قۇلاعىندا وينايتىن قاتارداعى جاۋىنگەر اسكەر قاتارىنا بيىل كوكتەمدە شاقىرىلىپ, جاقىندا عانا 06708 اسكەري ءبولىمىنىڭ جاس ساربازدارىمەن بىرگە اسكەري انت قابىلدادى. قاراپايىم وتباسىندا دۇنيەگە كەلگەن ول بالا جاسىنان ونەرگە قۇشتار. 3-سىنىپتا وقىپ جۇرگەندە پاۆلودار قالاسىنىڭ دارىندى بالالارعا ارنالعان مۋزىكالىق مەكتەپ-ينتەرناتىندا ءدارىس الىپ, كۇي ونەرىنە دەن قويادى. بۇگىندە وتان الدىنداعى بورىشىن وتەپ جۇرگەن جاۋىنگەر ەسىمى ەلگە تانىمال كۇيشىلەردىڭ تۋىندىلارىن شەبەرلىكپەن ورىندايدى.
پاۆلودار وبلىسىنان تالاي ونەر مايتالماندارىنىڭ شىققانىن جاقسى بىلەمىز. ماسەلەن, ءارى اقىن, ءارى كومپوزيتور جاياۋ مۇسا, انشىلىك, ارتىستىك, دومبىرا تارتۋ ونەرلەرىن قاتار الىپ جۇرگەن يسا بايزاقوۆ وسى ءوڭىردىڭ تۋمالارى. انشىلىك ونەرىمەن مايرا ۋاليقىزى مەن مەرۋەرت تۇسىپباەۆا حالىققا تانىلسا, بۇگىنگى كۇندە كوپشىلىك قاۋىم پاۆلودار وبلىسىنىڭ تۋماسى يمانبەك زايكەنوۆتىڭ Rosses SAINt IHN كومپوزيتسياسىمەن الەمدىك «گرەممي» (Gremmi) جۇلدەسىن جەڭىپ العانىن جاقسى بىلەدى. وسى تۇرعىدا ونەرپاز سارباز يسلامنىڭ دا ارمانى كوپ ەكەن. ول وتان الدىنداعى بورىشىن وتەگەن سوڭ, استانا قالاسىنداعى ۇلتتىق ونەر ۋنيۆەرسيتەتىنە وقۋعا ءتۇسۋدى جوسپارلاپ ءجۇر. «اسكەري قىزمەتتە دە دومبىرانى تاستاماي, وزىممەن بىرگە الىپ ءجۇرمىن. بۇل – كيەلى اسپاپ. ونەر تاۋسىلماس قازىنا دەپ بىلەمىن», دەيدى قاتارداعى جاۋىنگەر.
ونەردى ءومىرىنىڭ مانىنە اينالدىرعان يسلام مۇسانىڭ ءالى تالاي بيىكتەردى باعىندىراتىنى ءسوزسىز. ونەرپاز ساربازدىڭ جولى ارقاشان اشىق بولعاي