ستراتەگيالىق جوسپارلاۋ جانە رەفورمالار اگەنتتىگى ۇلتتىق ستاتيستيكا بيۋروسىنىڭ دەرەگى بويىنشا, 2023 جىلدىڭ العاشقى 4 ايىندا (قاڭتار-ءساۋىر) ەلىمىزگە 3,5 ملن تۋريست كەلگەن. بۇل – وتكەن جىلدىڭ سايكەس كەزەڭىمەن سالىستىرعاندا 36%-عا ارتىق. مادەنيەت جانە سپورت مينيسترلىگى وسى ۋاقىت ارالىعىندا ىشكى ءتۋريزمدى ىنتالاندىرۋعا ارنالعان بىرنەشە باعدارلاما ازىرلەپ, ىسكە قوستى. سونىڭ ناتيجەسى بولار, كەيىنگى جىلدارى ەلىمىزگە كەلەتىن ساياحاتشىلاردىڭ سانى كۇرت ارتىپ وتىر.
وسى رەتتە, ەلىمىزگە كەلگەن 3,5 ملن ءتۋريستىڭ نازارىن وزدەرىنە اۋدارىپ, قىزىعۋشىلىعىن تۋدىرعان قازاقستاننىڭ ۇزدىك بەس قالاسىن نازارلارىڭىزعا ۇسىنامىز. ازىرگە, ەلگە كەلەتىن تۋريستەردىڭ باسىم بولىگى الاتاۋدىڭ بوكتەرىندە ورنالاسقان الماتىعا سوقپاي كەتپەيتىنى بايقالادى. ياعني الماتىنىڭ تاۋ-شاڭعى كۋرورتتارى, سۇلۋ تابيعاتى, قولايلى كليماتى مەن قوناقجايلىلىعى تۋريستەردى بەيجاي قالدىرماسا كەرەك. وسى جانە باسقا دا ارتىقشىلىقتارى بار الماتى قازىرگى تاڭدا ەلىمىزدەگى بىرەگەي تۋريستىك قالا سانالادى. بيىلعى جىلدىڭ العاشقى ءتورت ايىندا وڭتۇستىكتەگى مەگاپوليسكە 1 185 130 ادام ساياحاتتاپ كەلگەن ەكەن.
ەلىمىزگە كەلەتىن تۋريستەردىڭ ەكىنشى باعىتى – استانا قالاسى. ەلىمىزدىڭ باس شاھارى اكىمشىلىك-ىسكەرلىك ورتالىق قانا ەمەس, تۋريستەر ءجيى تاڭدايتىن باسىم باعىتتاردىڭ بىرىنە اينالىپ ۇلگەردى. 2023 جىلدىڭ العاشقى ءتورت ايىندا عانا استانا 951 750 مەيماندى قابىلداعان. بۇگىندە مادەنيەت جانە سپورت مينيسترلىگىنىڭ قولداۋىمەن ەلوردا ىرگەسىندە ەلىمىزدەگى ەڭ ۇلكەن اشىق اسپان استىنداعى مۋزەي قۇرىلىسى ءجۇرىپ جاتىر. بوزوق – باس قالانىڭ تۋريستىك بويتۇمارى رەتىندە قوناقتار مىندەتتى تۇردە تاماشالاۋعا باراتىن ورىنعا اينالادى.
قوناقجايلىلىق بويىنشا ەشكىمگە ەسە جىبەرمەيتىن شىمكەنت تۋريستەر سانى جاعىنان دا كوش باسىندا. قاڭتار-ءساۋىر ارالىعىندا شىرايلى شىم شاھارعا 346 280 ادام ساياحاتتاپ بارعان. مۇندا كەز كەلگەن تۋريست كوڭىلى قالاعان دەمالىستى تاڭداي الادى. كيەلى تاريحي ورىندارعا ساياحات, شيپايجايداعى دەمالىس نەمەسە قالادا ءجيى ۇيىمداستىرىلاتىن سپورتتىق, مادەني-بۇقارالىق ءىس-شارالارعا قاتىسۋعا بولادى.
اتىراۋ قالاسى دا شەتەلدىك تۋريستەر اراسىندا تانىمال قالاعا اينالىپ بارادى. 2023 جىلدىڭ العاشقى ءتورت ايىندا قالاعا 305 460 قوناق كەلگەن. مامىر ايىندا مادەنيەت جانە سپورت مينيسترلىگىنىڭ قولداۋىمەن وڭىردە «سارايشىق» ۆيزيت-ورتالىعى اشىلدى. مۇندا تۋريستەرگە قازاق حاندىعى, التىن وردا جانە ەجەلگى داۋىردەگى قالاشىق تاريحىمەن تانىسۋعا بارلىق جاعداي جاسالعان. دەمەك جازعى ماۋسىمدا اتىراۋعا كەلۋشىلەر سانى تاعى دا ارتاتىنى انىق.
سونىمەن قاتار قارت كاسپيدىڭ اقمارجانى – اقتاۋ دا تۋريستەرگە تارتىمدى قالا سانالادى. بيىل قاڭتار-ءساۋىر ارالىعىندا اقتاۋعا 220 660 قوناق كەلگەن. ال جازعى ماۋسىمدا تۋريستەر تاراپىنان ماڭعىستاۋ وبلىسىنىڭ ورتالىعىنا قىزىعۋشىلىق 20%-عا دەيىن ارتىپ وتىر.