قوناەۆ قالاسىندا ءى حالىقارالىق مەديا جانە تۋريزم فورۋمى ءوتتى. ەكى كۇنگە سوزىلعان ءىس-شارانى «تۇركىتىلدەس جۋرناليستەر قورى» قوعامدىق قورى, الماتى وبلىسىنىڭ اكىمدىگى, اقپارات جانە قوعامدىق دامۋ مينيسترلىگى جانە مادەنيەت مينيسترلىگى بىرلەسىپ ۇيىمداستىردى. الەمنىڭ جەتەكشى باق وكىلدەرى مەن وتاندىق ماسس-مەديا جۋرناليستەرىنىڭ باسىن قوسقان ايتۋلى فورۋمعا اقپارات جانە قوعامدىق دامۋ ءمينيسترى دارحان قىدىرالى جانە الماتى وبلىسىنىڭ اكىمى مارات سۇلتانعازيەۆ قاتىستى.
وسىلايشا قوناەۆ قالاسىندا وتكەن فورۋم قازاقستان, ۇلىبريتانيا, شۆەيتساريا, اۆستريا, بەلگيا, گەرمانيا, فرانتسيا, نيدەرلاند, مولدوۆا, سولتۇستىك كيپر, تۇركيا, وزبەكستان, ازەربايجان, قىرعىزستان سياقتى شەت مەملەكەتتەردەن كەلگەن 200 مەديا ماماننىڭ باسىن قوستى. فورۋمنىڭ اشىلۋىندا اقپارات جانە قوعامدىق دامۋ ءمينيسترى دارحان قىدىرالى, الماتى وبلىسىنىڭ اكىمى مارات سۇلتانعازيەۆ جانە «تۇركىتىلدەس جۋرناليستەر قورى» قوعامدىق قورىنىڭ باسشىسى ءنازيا جويامەرگەنقىزى ءسوز سويلەدى. اۋەلى ءسوز العان وبلىس اكىمى مارات سۇلتانعازيەۆ شەتەلدىك تۋريستەر ءۇشىن ەلدىڭ جاعىمدى كەلبەتى مەن سەنىمىن قالىپتاستىرۋدىڭ ەرەكشە ماڭىزدى ەكەنىنە توقتالدى.
«الماتى وبلىسى بارلىق ەلدىڭ جۋرناليستەرىمەن ءوزارا ىنتىماقتاستىق ورناتۋ ماسەلەلەرىندە اشىق ەكەنىن الدەنەشە رەت تانىتتى جانە بۇل ۇستانىمىنان اينىمايدى», – دەدى الماتى وبلىسىنىڭ اكىمى.
ال ءىس-شارانى ۇيىمداستىرۋشى, «تۇركىتىلدەس جۋرناليستەر قورى» قوعامدىق قورىنىڭ پرەزيدەنتى ءنازيا جويامەرگەنقىزى پاندەميادان كەيىن الەمدە تۋريزم قايتا قالپىنا كەلىپ قانا قويماي, قارقىندى دامىپ كەلە جاتقانىن, بىلتىر بۇل سالادان تۇسكەن تابىس 50 پايىزعا ارتىپ, 1 ترلن دوللارعا جەتكەنىن ايتتى.
«الماتى وبلىسى – ەجەلگى قازاق سالت-داستۇرلەرى, عۇرىپتارى مەن تاريحى دامىعان نەگىزگى ايماق. سول سەبەپتى فورۋمدى بيىل وسى وبلىستا ۇيىمداستىردىق. تامىز ايىندا مۇندا انتاليادان جۋرناليستەر كەلەدى دەپ جوسپارلاپ وتىرمىز. سونىمەن قاتار, ايماق باسشىسىنىڭ قولداۋىمەن تاعى ءبىر ۇلكەن ءىس-شارا وتەدى. وندا ءتۋريزمدى دامىتۋ, ينۆەستيتسيا تارتۋ سياقتى ماسەلەلەر قارالادى. شەتەلگە شىققان جاقسى, دەگەنمەن قازاقستاننىڭ وزىندە ساياحاتتاۋعا بولاتىن ورىندار جەتەرلىك. سوندىقتان دا ىشكى ءتۋريزمدى دامىتۋ ماقساتىندا الەۋمەتتىك جەلىلەردە ەلىمىزدىڭ تابيعاتىن كەڭىنەن ناسيحاتتاپ, كورسەتۋگە شاقىرامىن», دەدى ءنازيا جويامەرگەنقىزى.
سونداي-اق, اقپارات جانە قوعامدىق دامۋ ءمينيسترى دارحان قىدىرالى فورۋمدا سويلەگەن سوزىندە تۋريزم سالاسىن دامىتۋ مەن تۋعان جەردىڭ تابيعاتىن ناسيحاتتاۋداعى اقپاراتتىق قولداۋدىڭ ماڭىزدىلىعىن ايتتى.
ء«بىزدىڭ باي دالامىزدا اسقار تاۋ-اساۋ وزەندەر دە, جىنىس ورمان دا, ايناداي كولدەر دە, قۇمدى شولدەر دە جەتەرلىك. وسى الماتى وبلىسىنىڭ وزىندە جۇرتقا تانىس شارىن شاتقالى, ۇلكەن الماتى كولى, تۇرگەن سارقىرامالارىنان وزگە ايعاي قۇم, بۇرحان-بۇلاق سارقىراماسى, اقبۇلاق, ويقاراعاي, تاباعان, تۇركى ءداۋىرىنىڭ بىرەگەي ەسكەرتكىشى تامعالى تاس سياقتى قانشاما عاجاپ جەرلەر بار. ءبىز وسى سۇلۋ جەرىمىزدى كورسەتىپ, ءار جەردىڭ وزگەشە تابيعاتىن, ءوز ەرەكشەلىگىن ءتۇسىرىپ, ناسيحاتتاعان ءجون دەپ ويلايمىز. وسىعان بايلانىستى ارنايى دەرەكتى فيلمدەر جەلىسىن ءتۇسىرۋدى جوسپارلاپ وتىرمىز. سونىمەن قوسا, ەكولوگيالىق ساۋاتتىلىق, دەمالىس مادەنيەتى, ەكوجۇيەمەن ۇيلەسىم ماسەلەلەرىن دە ۇنەمى نازاردا ۇستاعان ابزال. ءبىز قازىر سەريالدارىمىزدا وسى تۋرالى كوبىرەك كورسەتىپ, مۇمكىندىگىنشە ەلىمىزدىڭ باي تابيعاتىن رەتىمەن ناسيحاتتاۋعا تىرىسىپ كەلەمىز. قىسقاسى, باق سالاسى ەل ءتۋريزمىنىڭ دە باعىنا اينالۋعا ءتيىس دەپ سانايمىز», دەدى ءوز سوزىندە مينيستر.
ەكى كۇنگە سوزىلعان بۇل فورۋم «تۋريزم مەن جاڭا كوممۋنيكاتسيالاردى دامىتۋداعى باق-تىڭ ماڭىزى», «قازاقستانداعى تۋريزم: دامۋ كەلەشەگى مەن مۇمكىندىكتەر», «مەديا. PR جانە تۋريزم يندۋسترياسى», «سينتەتيكالىق مەديا: كونتەنت قالىپتاستىرۋداعى نەيروجۇيە» سىندى تاقىرىپتاردى قامتىدى. سونداي-اق, فورۋم اياسىندا «مىڭ بوياۋلى اسپان» اۋە شارلارى فەستيۆالى ءوتتى. قوناەۆ قالاسىندا العاش رەت الەمنىڭ تۇكپىر-تۇكپىرىنەن اكەلىنگەن 30 شار اسپانعا كوتەرىلىپ, جينالعانداردى جارقىن اسەرلەرىمەن قۋانتتى. بۇل شار فەستيۆالىن ۇيىمداستىرۋشىلاردىڭ باستى ماقساتى – قالدىقتاردى بولەك جيناۋ, قايتا وڭدەۋ, ەكولوگيالىق تازا قايتا وڭدەۋگە بولاتىن ىدىس-اياقتار مەن باسقا دا ەكوماتەريالداردى پايدالانۋ ارقىلى تابيعاتقا جانە ونىڭ رەسۋرستارىنا قۇرمەتپەن قاراۋدى ناسيحاتتاۋ ەكەن. فەستيۆالدە الماتى وبلىسىنىڭ اكىمى مارات سۇلتانعازيەۆ قۇتتىقتاۋ ءسوز سويلەدى.
«وبلىستا ءتۋريزمدى ىلگەرىلەتۋ جانە دامىتۋ وقيعالى تۋريزمىنە نەگىزدەلگەن. وسىعان وراي, «Konayev international balloon fest» شار فەستيۆالىنىڭ ءىس-شاراسى ءبىزدىڭ وڭىرىمىزدەگى ايتۋلى وقيعا بولماق, بۇل ءبىزدىڭ قوناقتارىمىز ءۇشىن تابيعاتتىڭ سۇلۋلىعىن تاماشالاۋعا تاماشا مۇمكىندىك بولىپ تابىلادى جانە ءسىز مۇندا ءبىر-بىرىڭىزبەن تانىسۋعا, دوستىق قارىم-قاتىناس ورناتۋعا جانە ۇمىتىلماس اسەر الۋعا ۋاقىت تاباسىز. تاڭعى ساعات 5-تەن باستاپ فەستيۆالگە جينالعان كورەرمەندەر وسىنداي سۇلۋلىقتى تاماشالاۋعا شابىتتاندى, ءتىپتى ساعات 7-گە تامان شارلارمەن بيىكتىككە شىعۋعا نيەت بىلدىرگەندەردىڭ ۇلكەن كەزەگى پايدا بولدى. ياعني, وسى ارقىلى ءبىز وقيعالى ءتۋريزمنىڭ جۇمىس ىستەي باستاعانىن كورسەتەمىز. ءبىز بۇل شاراعا 6 اي بويى دايىندالدىق, تالداي كەلە, قازاقستاندا اۋە شارىنا ارنالعان ءىس-شارالار بولماعانىن كوردىك. الەۋمەتتىك جەلى قولدانۋشىلارى تۇسىنىكتەمەلەردە قوناەۆ تۇرعاندا كاپپادوكياعا بارۋدىڭ قاجەتى جوق دەپ جازىپ جاتىر» دەدى ءوز سوزىندە ايماق باسشىسى.
فورۋمعا ايماقتاردان ارنايى كەلگەن ارىپتەستەر الماتى وبلىسىنىڭ كورىكتى جەرلەرىن ارالادى. تۋريستىك نىسانداردى كورىپ, كوزايىم بولعان جۋرناليستەر اق جارما لەبىزدەرىن دە ءبىلدىردى. ماسەلەن «اقتوبە مەديا» جاۋاپكەرشىلىگى شەكتەۋلى سەرىكتەستىگىنىڭ ديرەكتورى راۋكەن وتىنشين الماتى وبلىسىنىڭ تۋريستىك الەۋەتى زور ەكەنىن ايتادى.
«قازاقستاندا تۋريزم سالاسى كەنجەلەپ تۇرعانى جاسىرىن ەمەس. ونىڭ ۇستىنە, تۋريستىك ورىندار ازداۋ, بار بولعان كۇننىڭ وزىندە, قازاقستاندىقتار ەلىمىزدى ارالاي بەرمەيدى. دەسە دە, ءبىز وسى فورۋمنىڭ اياسىندا تۇرگەننىڭ تورىنە, كولساي كولىنە, شارىن شاتقالىنا بارىپ, وبلىستىڭ تۋريستىك الەۋەتى زور ەكەنىنە كوزىمىزدى جەتكىزدىك. كورىكتى جەرلەردى ارالاپ, كوزايىم بولدىق. مۇنداي شارالار كوپتەپ ۇيىمداستىرىلسىن دەۋ ارتىقتاۋ, بىراق, تىلشىلەردىڭ باس قوسىپ تۇرۋى كەرەك-اق», دەيدى راۋكeن وتىنشين.