جىلدىڭ باسىنان بەرى ۇلتتىق مۋزەيگە 310 مىڭ ادام كەلگەن. ال بىلتىر ءبىر جىلدىڭ قورىتىندىسى بويىنشا 330 مىڭ ادام مۋزەيدى ارالاعان.
ۇلتتىق مۋزەي ديرەكتورىنىڭ مىندەتىن اتقارۋشى ايبەك سىدىقوۆتىڭ ايتۋىنشا, كەلۋشىلەردىڭ ءوسۋ ديناميكاسىنىڭ سەبەبى بيىلعى ساۋىردە ەكى جاڭا زالدىڭ اشىلۋىمەن بايلانىستى. بۇل بارلىق جاستاعى كەلۋشىلەر ءۇشىن قىزىعۋشىلىق تۋدىراتىن پالەونتولوگيا زالى مەن قولونەرشىلەر ورتالىعى. پالەونتولوگيا زالىندا تيرانوزاۆر, گيپپاريون جىلقىسى, ۇلكەن ءمۇيىزدى بۇعى, الىپ يندريكوتەري مۇيىزتۇمسىعى, مامونت جانە باسقا دا ءبىزدىڭ زامانعا دەيىنگى ەجەلگى داۋىردەگى جانۋارلاردىڭ قاڭقالارى مەن قالدىقتارى بار. ال قولونەرشىلەر ورتالىعىندا ءتۇرلى كادەسىيلار مەن شەبەرلەردىڭ ۇزدىك ساندىك-قولدانبالى ونەر تۋىندىلارى ۇسىنىلادى.
بيىل ۇلتتىق مۋزەيدە 22 اۋقىمدى كورمە ءوتتى. ونىڭ 4-ءى حالىقارالىق دەڭگەيدەگى جوبا. سونداي-اق «مۋزەي ءتۇنى» حالىقارالىق اكتسياسى اياسىندا مۋزەيگە ءبىر تۇندە 47 مىڭنان استام ادام كەلىپ, رەكورد ورناتقان بولاتىن. ءبىرىنشى جارتىجىلدىقتا مۋزەي قورى 4000-نان استام ەكسپوناتپەن تولىقتى.
«2014 جىلدان بەرى ۇلتتىق مۋزەي تاريحىندا كەلۋشىلەر سانى بويىنشا ەكى ءىرى كورسەتكىش تىركەلدى. 2017 جىلى, ەكسپو حالىقارالىق كورمەسى اياسىندا 280 مىڭ ادام كەلسە, بىلتىر بۇل كورسەتكىش 330 مىڭ ادامعا جەتتى. ال بيىل العاشقى التى ايدا عانا 310 مىڭ كەلۋشى تىركەلىپ وتىر. بۇل قازاقستاندىقتار مەن شەتەلدىك قوناقتار تاراپىنان حالقىمىزدىڭ مىڭجىلدىق مادەني مۇراسى مەن تاريحىنا قىزىعۋشىلىقتىڭ ارتقانىن بىلدىرەدى», دەدى ۇلتتىق مۋزەي ديرەكتورىنىڭ مىندەتىن اتقارۋشى ايبەك سىدىقوۆ.