حالىقارالىق فۋتبول فەدەراتسياسى (فيفا) ۇلتتىق قۇرامالاردىڭ شىلدە ايىنداعى رەيتينگىن جاريالادى. ماۋسىم ايىندا قازاقستان ۇلتتىق قۇراماسى سەگىز ساتى جوعارىلاپ, 112-دەن 104-ورىنعا كوتەرىلگەن ەدى. شىلدەدەگى رەيتينگتە اسا قاتتى وزگەرىس بولا قويعان جوق.
ماگومەد اديەۆ شاكىرتتەرى ماۋسىم ايىندا 2024 جىلعى ەۋروپا چەمپيوناتىنىڭ ىرىكتەۋ كەزەڭىندە ەكى ماتچ وتكىزىپ, ەكەۋىندە دە جەڭىسكە جەتكەن بولاتىن. سىرت الاڭداعى ءبىرىنشى كەزدەسۋدە سان-مارينو قۇراماسىن جەڭسە (3:0), ەكىنشى ويىندا سولتۇستىك يرلانديانى تىزە بۇكتىرگەن-ءدى – 1:0.
فيفا رەيتينگىنىڭ العاشقى وندىعىندا تۇرعان قۇرامالاردىڭ دا ورىندارى وزگەرىسسىز قالدى. ادەتتەگىدەي رەيتينگتە 2022 جىلعى الەم چەمپيوندارى – ارگەنتينا قۇراماسى كوش باستاپ تۇر. ودان كەيىنگى ورىندارعا فرانتسيا, برازيليا, انگليا, بەلگيا, حورۆاتيا, نيدەرلاند, يتاليا, پورتۋگاليا جانە يسپانيا جايعاسقان.