«كەش»: رەجيسسەر تۇسىرگەن سۋرەتتەر

جاڭا البومعا كەيىنگى 4-5 جىلدا تۇسىرىلگەن سۋرەتتەر ەنىپ وتىر. ونىڭ ىشىندە كينو الاڭىنان, قازاقستاننىڭ جانە دۇنيەجۇزىنىڭ ءار تۇكپىرىنەن – مەكسيكادا, ۆەنادا, پاريجدە, باسقا دا قالالاردا تۇسىرىلگەن ساتتەر بار. اتالعان فوتوالبوم «Lantar books» باسپاسىنان جارىق كوردى.

ەسكە سالساق, رەجيسسەر-فوتوگرافتىڭ «دوستا­رىم­نىڭ پورترەتتەرى» دەگەن البومى مادەني ورتادا رەزونانس تۋدىرعان ەدى. سونداعى اۆتوردىڭ دوسى – كىتاپ. دارەجان ومىرباەۆ كىتاپتى كوپ وقيتىنىن بىلەمىز. سول البومعا جەكە كىتاپحاناسىنان الىنعان, سۇيسىنە وقىعان 100-دەن اسا كىتاپتىڭ پورترەتىن جاساعان. البومنىڭ وڭ جاعىنداعى بەتىندە كىتاپتىڭ فوتوپورترەتى, سول جاعىندا كىتاپتان الىنعان ەڭ ماڭىزدى دەگەن ءۇزىندى بار. قىزىق. تاڭدانباسقا شا­راڭ جوق. الەمدە ادامداردىڭ, جان-جانۋارلار مەن قۇستاردىڭ, گۇلدەردىڭ پورترەتى جاسالاتىنى ءسوزسىز. ال كىتاپتىڭ پورترەتىن جاساپ, فوتوالبومعا جيناقتاۋ سيرەك كەزدەسەدى. ەلىمىزدە مۇنداي جوبانى ءالى ەشكىم تۇسىرگەن جوق. ەندى ءبىر جاعىنان بۇل كىتاپتار الەمىن ناسيحاتتاۋدىڭ ادەمى نۇسقاسى بولىپ تۇر.

وسى يدەيا اۆتورعا قايدان كەلدى دەيسىز عوي. ول ءبىر سۇحباتىندا ايتادى: «ۇيدە پول سەزاننىڭ البومى بار ەدى. بىردە سول كىتاپتىڭ ۇستىنە قىزىم ادەمى المانى قويىپ كەتىپتى. سونى ءتۇسىرىپ الدىم. جەكە ءبىر وبراز. كىتاپتار دا ادام سياقتى عوي. پۋشكين كەزىندە سورەدەگى كىتاپتارىنا قاراپ: «قوش بولىڭدار, دوستارىم», دەپ قوشتاسىپتى دەيدى. ءاربىر كىتاپتىڭ وزىندىك ءبىر الەمى, وبرازى بولادى. نەگە سول الەمدى تەك وقىپ قانا قويماي, سۋرەتكە تۇسىرمەسكە». ءيا, اۆتوردىڭ ويىنشا جاقسى شىقسا, ءاربىر تۇسىرىلگەن سۋرەت كىشكەنتاي فيلم سياقتى. ارينە, مۇنداعى باستى تالانت – كوزقاراس پەن تالعام. كوكىرەك كوز­دىڭ ارقاشان شىعارماشىلىق باعىتتا ەستەتيكالىق نۇكتەدە ءومىردىڭ ءتۇرلى ساتتەرى مەن بوياۋلارىن بايقاپ, «ۇستاپ» الۋى – شەبەرلىك. اسىرەسە قازىرگىدەي قازاق قوعامىنىڭ فوتوالبوم جانرىن قابىلداي دا, تۇسىنە دە الماي جاتقان تۇسىندا وسىنداي جيناقتاردىڭ ەل ىشىنە كەڭىنەن جايىلىپ, كوزايىمعا اينالۋى كەرەك-اق.