الماتىدا بالدىرعان سۋرەتشىلەردى باۋليتىن ورتالىقتار از ەمەس. الەمگە بالالار كوزىمەن ۇڭىلسەڭىز, ونەردەن ورنەك ىزدەگەن ورەندەردىڭ ءومىردى قابىلداۋى دا ءارتۇرلى ەكەنىن بايقار ەدىڭىز.
جۋىردا شىعارماشىل بالالاردى ءبىر الاڭدا جيناعان سۋرەت كورمەسى ءوتتى. جوباعا جۇزدەگەن جەتكىنشەكتىڭ جەكە جۇمىستارى قويىلعان. كورمە قاتىسۋشىلارى ىشىندە حالىقارالىق بايقاۋلاردا توپ جارعان تالانتتار بار. زاڭعار كوككە قول سوزعان اسقار تاۋلار, قىزعالداعى قۇلپىرعان جازيرا جوتالار, ايناداي تۇنىق ايدىن كولدەر ولاردىڭ ارمانىنا قانات بىتىرگەن.
شاھارداعى «بىرگە جاسايمىز» جوباسى مەن «سەن سۋرەتشىسىڭ» شەبەرحاناسى كەسكىندەمە مەكتەبى رەتىندە 10 جىل بويى قالالىق جانە اۋداندىق كورمەلەرگە بەلسەندى قاتىسىپ كەلەدى. جاس سۋرەتشىلەرگە ارناپ قازاقستان مەن ۋكراينانىڭ بەلگىلى بەينەلەۋ ونەر شەبەرلەرى شىعارماشىلىق ساباقتار, ءتۇرلى پلەنەرلەر وتكىزۋدى داستۇرگە اينالدىرعان. مەكتەپ تۇلەكتەرى بۇگىندە تەك الماتى قالاسىنىڭ عانا ەمەس, سونىمەن قاتار اقش, انگليا, اۋستراليا جانە باسقا دا ەلدەردىڭ كوركەمسۋرەت كوللەدجدەرى مەن جوعارى وقۋ ورىندارىنىڭ ستۋدەنتتەرى.
ەڭ باستىسى – اتالعان شىعارماشىل ورتا تەك بالالاردى عانا ەمەس, ونەرگە نەمقۇرايدى قارامايتىن, ءوز دارىندارىن شىڭداعىسى كەلەتىن ءتۇرلى جاستاعى ادامداردى بىرىكتىرە بىلگەن. سەبەبى شىعارماشىلىق ۇشقىنىن ءاربىر ادامنىڭ بويىنان تابۋعا بولادى دەيدى جوبا اۆتورلارى. كەنەپ بەتىندە سەنىمدى سىرعىعان قىلقالام قيمىلىنان ءتۇرلى جولاقتار, بوياۋلار مەن بەينەلەر پايدا بولىپ, سوڭىندا تاماشا ءبىر كارتينانىڭ دۇنيەگە كەلۋىن باقىلاۋ ءبىر عانيبەت. بالالار شىعارماشىلىعىن قولداۋ, اتا-انالار مەن وقىتۋشىلاردىڭ ءوزارا قارىم-قاتىناستارىن دارىپتەۋ ماقساتىندا اشىلعان كورمە شاھار تۇرعىندارى مەن قوناقتارىنا جايلى اسەر سىيلادى.
بەينەلەۋ ونەرىنىڭ بارلىق ءتۇرىن قامتىعان تۋىندىلار جاس شەبەرلەردىڭ ىشكى الەمىندەگى تولقىنىسىن پاش ەتەدى. قانشاما جازىقسىز جاندار جاپا شەككەن اسكەري قاقتىعىستار, الەمدەگى گەوساياسي تۇراقسىزدىق بالالاردىڭ دا كوڭىل الاڭىنا اينالعان. ادامزاتتى بەيبىت ومىرگە شاقىرعان كارتينالاردا بالالار جىلاماسا, اتا-انالار امان بولسا دەگەن اپپاق تىلەك جاتىر. بىرلىك پەن ىنتىماقتى تۋ ەتكەن كەنەپ جاعىندىلارىنان تازالىقتىڭ ءيىسى اڭقيدى.