بۋحگالتەرلەردىڭ بىلىعى

ايتالىق, مۇنداي قىلمىستار ءبىلىم سالاسىندا دا از جاسالماپتى. مىسالى, جۋىردا پروكۋرورلار جەتىسۋ وبلىسىنىڭ اقسۋ اۋدانىندا وزىنە جوعارى جالاقىنى زاڭسىز تولەۋ ارقىلى 40 ملن تەڭگەگە جۋىق بيۋدجەت قاراجاتىن ۇرلادى دەگەن كۇدىكپەن بالاباقشا بۋحگالتەرىن ۇستادى. جىمقىرۋ فاكتىسى شتات كەستەسى مەن بانكتىك شوتتاردى سالىستىرۋ كەزىندە انىقتالعان. وندا ءتيىستى جالاقى مەن ناقتى تولەنگەن قاراجات اراسىنداعى ايىرماشىلىق بايقالعان.

وسى فاكتى بويىنشا پروكۋراتۋرا قىلمىستىق كودەكستىڭ 189-بابى 4-بولىگى 2-تارماعى بويىنشا سوتقا دەيىنگى تەرگەپ-تەكسەرۋدى باستادى (اسا ءىرى مولشەردە ۇرلاۋ). ءىستى جەتىسۋ وبلىسى پروكۋراتۋراسىنىڭ سوتقا دەيىنگى تەرگەپ-تەكسەرۋ باسقارماسى تەكسەرىپ جاتىر. بۇل باپتىڭ سانكتسياسى بەلگىلى ءبىر لاۋازىمداردى اتقارۋعا نەمەسە بەل­گىلى ءبىر قىزمەتپەن اينالىسۋ­عا تى­يىم سالا وتىرىپ, 12 جىلعا دەيىن باس بوستاندىعىنان ايىرۋدى قاراستىرادى.

سونىمەن قاتار اقمولا وبلىسىندا 83 ملن تەڭگەدەن استام بيۋدجەت قاراجاتىن يەمدەنگەن بۋحگالتەرلەر انىقتالىپ وتىر. مىسالى, بۇلاندى اۋدانىندا بالاباقشا بۋح­گالتەرى كاسىپكەرلەرمەن ويدان شىعارىلعان مامىلەلەر جاساي وتىرىپ, تۋىستارىنىڭ شوتتا­رىنا اقشا اۋدارىپ كەلگەن. اۋدا­رىمداردىڭ شىنايىلىعىن كور­سەتۋ ءۇشىن بۋحگالتەر تاۋارلاردى جەتكىزۋگە كەلىسىمشارتتار جاسال­عان كاسىپورىنداردىڭ اتاۋلارىن كورسەتكەن. بانكتىك شوتتار ونىڭ جاقىن تۋىستارىنا راسىمدەلىپ, بۋح­گالتەر جۇمىس ىستەگەن كەزەڭدە بار­لىعى 47 ملن تەڭگە اۋدارىلعان.

ال ستەپنوگور قالاسىنىڭ مەك­تەپتەرىنىڭ بىرىندە بۋحگالتەر ءوز شوتىنا 36 ملن تەڭگەنى جالاقى رەتىندە زاڭسىز اۋدارعان. وسى فاكتىلەرگە وراي قك-ءنىڭ 189-بابى, 2-تارماعىنىڭ 4-بولىگى بو­يىنشا ءىس تىركەلىپ, اقمولا وبلىستىق پروكۋراتۋراسىنىڭ ارنايى پروكۋرورلارى جانە اقمولا وبلىسى بويىنشا ەكونوميكالىق تەرگەۋ دەپارتامەنتى ونى قاراپ جاتىر.

قازاق «ۇرلىق جەردە جاتپايدى» دەيدى. كۇندەردىڭ كۇنى ايتەۋىر ءبىر جەرىڭدى تەسىپ شىعاتىنى اقيقات. جوعا­رىداعى قىلمىسى اشكەرەلەنگەن ادام­داردىڭ جاعدايى وزگە دە جان­دارعا «ساباق» بولسا جاقسى...