«AMANAT» پارتياسى فراكتسياسىنىڭ مۇشەلەرى اتىراۋدا ءىرى مۇناي-گاز كاسىپورىندارى باسشىلارىمەن وڭىردەگى وزەكتى ماسەلەلەردى تالقىلادى. كاسىپورىنداعى جۇمىسشىلاردىڭ ءوتىنىشى بويىنشا وندىرىستە ۆاحتالىق اۋىسىم ۋاقىتىن 14 كۇنگە اۋىستىرۋ, كوگالداندىرۋ جۇمىسىن جەدەلدەتىپ, الەۋمەتتىك-ينفراقۇرىلدىمدىق دامۋ باعدارلاماسىنا بولىنەتىن قارجىنى كوبەيتۋ سياقتى بىرقاتار ماسەلەنى كوتەردى, دەپ حابارلايدى Egemen.kz.
ءماجىلىس دەپۋتاتى باقتىقوجا ىزمۇحامبەتوۆ «ەمبىمۇنايگاز» اق ۇجىمىمەن كەزدەسىپ, زاڭ شىعارۋشى ورگاننىڭ جۇمىسى مەن قابىلدانىپ جاتقان زاڭدار تۋرالى اقپارات بەردى. جيىندا دەپۋتات ونلاين جارناما, شەتەلگە شىعارىلعان اكتيۆتەردى ەلگە قايتارۋ تۋرالى زاڭداردىڭ تالاپتارى مەن تيىمدىلىگى تۋرالى ايتىپ, «AMANAT» پارتياسىنىڭ جوبالارىنا دا توقتالدى. سونىڭ ىشىندە «اۋىل اماناتى» جوباسىنىڭ ماقسات-مىندەتتەرىنە نازار اۋداردى.
«پرەزيدەنتىمىز قاسىم-جومارت توقاەۆتىڭ باستاماسىمەن ادىلەتتى قازاقستان قۇرۋ جولىندا ءبىراز شارۋا اتقارىلىپ جاتىر. وسىعان وراي پارلامەنتتە, ۇكىمەتتە يگى ىستەر قولعا الىندى. ءبىز وڭىرلەردە وزەكتى تۇيتكىلدەر تۋىنداپ جاتقانىن جاقسى بىلەمىز. رەسپۋبليكالىق دەڭگەيدە شەشىلەتىن ماسەلەلەردى ۇكىمەتكە جەتكىزەتىن بولامىز», دەدى باقتىقوجا ىزمۇحامبەتوۆ.
ال ءماجىلىس دەپۋتاتتارى دۇيسەنباي تۇرعانوۆ پەن ءادىل جۇبانوۆ وسى وڭىردەگى ءىرى مۇناي-گاز مەكەمەلەرىنىڭ ۇجىمدارىمەن كەزدەستى. جيىنعا «ەمبىمۇنايگاز» اق, «تەڭىزشەۆرويل» جشس جانە North Caspian Operating Company N.V. كومپانياسىنىڭ وكىلدەرى قاتىستى. وندا الەۋمەتتىك ينفراقۇرىلىمدىق جوبالار جانە كوگالداندىرۋ تاقىرىپتارى قوزعالدى.
قازىرگى تاڭدا دەپۋتاتتاردىڭ اتسالىسۋىمەن «تەڭىزشەۆرويل» كومپانياسى مەردىگەر كومپانيالارمەن تەڭىزدەگى اۋىسىمدىق جۇمىس كەستەسىن 28 كۇننەن 14 كۇنگە وزگەرتۋ باعىتىندا كەلىسسوزدەر جۇرگىزۋدە.
سونىمەن قاتار تەڭىز كەنىشىنە جۇمىسقا جاڭادان قابىلداناتىن ازاماتتاردىڭ وزدەرىنە جۇمىس اۋىسىمىنىڭ ۋاقىتىن, ياعني 28 كۇندىك نەمەسە 14 كۇندىك ۆاحتالىق ءادىستى تاڭداۋىنا مۇمكىندىك بەرىلەتىن بولادى. بۇل ماسەلە تولىق شەشىلگەنگە دەيىن ءماجىلىس دەپۋتاتتارىنىڭ تىكەلەي باقىلاۋىندا بولادى.
كەزدەسۋ بارىسىندا «تەڭىزشەۆرويل» كومپانياسىمەن ىسكە اسىرىلىپ وتىرعان «يگىلىك» باعدارلاماسىنىڭ جىلدىق بيۋدجەتىن كوبەيتۋ جانە قۇرىلىستاردى ساپالى جۇرگىزۋ ماسەلەسى كوتەرىلدى.
سونداي-اق دەپۋتاتتار «تەڭىزشەۆرويل» كومپانياسىن جىلىوي اۋدانىن كوگالداندىرۋ ماسەلەلەسىن تەزدەتۋگە شاقىردى.
2021 جىلى وبلىستىق اكىمدىكپەن جاساقتالعان مەموراندۋم تالاپتارىنا سايكەس, «تەڭىزشەۆرويل» مەكەمەسى جوسپارلانعان 647 گا جەردىڭ 2022 جىلى 15 گا جەرىنە 9000 دانا اعاش كوشەتتەرىن وتىرعىزىپ, جوسپاردىڭ 2,3%-ىن عانا ورىنداعان.