مەملەكەت باسشىسى سپورت ارداگەرى سەيىلدا بايشاقوۆتىڭ وتباسى مەن جاقىن تۋىستارىنا كوڭىل ايتتى, دەپ حابارلايدى Egemen.kz اقوردانىڭ ءباسپاسوز قىزمەتىنە سىلتەمە جاساپ.
پرەزيدەنت قاسىم-جومارت توقاەۆ قازاق فۋتبولىنىڭ اڭىزىنا اينالعان داڭقتى سپورت ارداگەرى سەيىلدا بايشاقوۆتىڭ دۇنيەدەن وتۋىنە بايلانىستى ونىڭ وتباسى مەن جاقىن تۋىستارىنا كوڭىل ايتۋ جەدەلحاتىن جولدادى.«سەيىلدا يكرام ۇلى «قايرات» فۋتبول كومانداسىنىڭ ساپىندا كوپ جىلدار بويى ونەر كورسەتىپ, جاسىنداي جارقىراعان ەدى. بىلىكتى باپكەر رەتىندە جاستاردى جەڭىسكە جەتۋدىڭ قىر-سىرىنا ۇيرەتىپ, ەلىمىزدە وسى سپورت ءتۇرىنىڭ دامۋىنا زور ۇلەس قوستى. ومىردە ادال ەڭبەك ەتىپ, وشپەس ءىز قالدىرعان سەيىلدا يكرام ۇلىنىڭ ەسىمى مەن بەينەسى ماڭگى ۇمىتىلمايدى. مارقۇمنىڭ يمانى سالامات, جانى ءجانناتتا بولسىن», دەپ جازىلعان جەدەلحاتتا.