جامبىل وبلىسى پوليتسيا دەپارتامەنتىنىڭ ەسىرتكى قىلمىسىنا قارسى ءىس-قيمىل باسقارماسىنىڭ قىزمەتكەرلەرى تارازدا ەسىرتكى وندىرەتىن فيتوزەرتحانانى انىقتادى, دەپ حابارلايدى Egemen.kz Polisia.kz-كە سىلتەمە جاساپ.
پوليتسيا قىزمەتكەرلەرى 61 جاستاعى رەسەي ازاماتىنىڭ تۇرعىلىقتى جەرى بويىنشا ءتىنتۋ شارالارىن جۇرگىزدى.
تەكسەرۋ بارىسىندا ءۇي باقشاسىندا تۇرعان كولىك دوڭگەلەگىنەن 4 كاننابيس بۇتاسى تابىلدى. سونداي-اق قىزمەتكەرلەر فيتولابوراتورياعا اينالدىرىلعان مونشانى انىقتادى. وندا 2 كاننابيس بۇتاسى تابىلدى. سونداي-اق ءۇيدىڭ ءار جەرىنەن كەپتىرىلگەن ماريحۋانا ەسىرتكى زاتتارى تابىلدى.
ارنايى وپەراتسيا بارىسىندا جالپى سالماعى 2400 گرامم كاننابيس وسىمدىگىنىڭ 6 بۇتاسى, جالپى سالماعى 113 گرامم كەپتىرىلگەن ماريحۋانا تاركىلەندى.
«ۇستالعان ادام ءوز كىناسىن مويىندادى. قازىرگى ۋاقىتتا اتالعان دەرەك بويىنشا قازاقستان رەسپۋبليكاسى قىلمىستىق كودەكسىنىڭ 300-بابىنىڭ 1-بولىگىمەن سوتقا دەيىنگى تەرگەپ-تەكسەرۋ باستالدى. وسى باپ ەكى مىڭ ايلىق ەسەپتىك كورسەتكىشكە دەيىنگى مولشەردە ايىپپۇل تۇرىندەگى جازانى كوزدەيدى نە سول مولشەردە تۇزەۋ جۇمىستارىمەن نە التى ءجۇز ساعاتقا دەيىنگى مەرزىمگە قوعامدىق جۇمىستارعا تارتۋمەن نە ەكى جىلعا دەيىنگى مەرزىمگە باس بوستاندىعىن شەكتەۋمەن نە سول مەرزىمگە باس بوستاندىعىنان ايىرۋمەن جازالانادى», دەدى وبلىستىق پد ەققىب باستىعى ءالىم باجىقباەۆ.