رەسەيدىڭ ۇلكەن تەاترىنىڭ تاريحي ساحناسىندا «Benois de la Danse» حالىقارالىق بالەت فەستيۆالى اياقتالدى. حالىقارالىق ماڭىزى بار مادەني شارادا اباي اتىنداعى ۇلتتىق وپەرا جانە بالەت تەاترىنىڭ جەتەكشى بالەت سوليستەرى ماليكا ەلشىباەۆا مەن بوگدان ۆەربوۆوي ايتۋلى بالەت فەستيۆالى سىيلىعىنىڭ ديپلومانتتارى اتاندى.
تەاتردىڭ بالەت ترۋپپاسىنىڭ كوركەمدىك جەتەكشىسى, قازاقستاننىڭ حالىق ءارتىسى گۇلجان تۇتكىباەۆا ميلانداعى «لا سكالا» تەاترىنىڭ جانە ۇلكەن تەاتردىڭ پريما بالەريناسى سۆەتلانا زاحاروۆانىڭ شاقىرتۋىمەن وسى فەستيۆالدىڭ قازىلار القاسىنىڭ مۇشەسى رەتىندە قاتىستى.
«Benois de la Danse» – 1991 جىلى 29 ساۋىردە حالىقارالىق حورەوگرافتار وداعىنىڭ ۇيىتقى بولۋىمەن بي كۇنىنە وراي ۇيىمداستىرىلاتىن ءداستۇرلى بالەت فەستيۆالى. العاشىندا ءتۇرلى بالەت مەكتەپتەرى مەن زاماناۋي باعىتتاعى ءبيدىڭ ۇزدىك وكىلدەرىنىڭ باسىن قوساتىن, الەمدىك قويىلىمدار وتكىزەتىن بالەت ونەرىنىڭ گالا-كونتسەرتى رەتىندە ويلاستىرىلعان ەدى. بيىلعى نومينانتتاردىڭ قاتارىندا كلاسسيكالىق باعىتتاعى التى جەتەكشى ۇجىم جانە ءارتۇرلى ەلدىڭ زاماناۋي بي سوليستەرى قاتىستى. فەستيۆالدە رەسەيدىڭ ۇلكەن تەاترى, سانكت-پەتەربۋرگتەگى ماريا تەاترى, قىتاي ۇلتتىق بالەت تەاترى, اباي اتىنداعى قازاق ۇلتتىق وپەرا جانە بالەت تەاترى, سەۋلدەگى يۋنيۆەرسال بالەت تەاترى, ءنوۆوسىبىر وپەرا جانە بالەت تەاترىنىڭ سوليستەرى ونەر كورسەتتى. «Benois de la Danse جۇلدىزدارى» اتتى ءار جىلدارداعى لاۋرەاتتاردىڭ گالا-كونتسەرتى ءوتىپ, كەش باعدارلاماسى بي ونەرىندەگى ءتۇرلى ستيل مەن بۇگىنگى ساحنانىڭ سۇرانىسىنا ساي ەڭ ەرەكشە بي تۋىندىلارىن قامتىدى. بۇل كەشتە ماليكا ەلشىباەۆا مەن ازامات اسقاروۆ تيمۋر مىڭباەۆتىڭ «فرەسكالار» بالەتىنەن اداجيو, ال بوگدان ۆەربوۆوي مەن جانەل تۇكەەۆا سەرگەي پروكوفەۆتىڭ «رومەو مەن دجۋلەتتا» بالەتىنەن اداجيو ورىندادى.